“Lia-foun reinu nian neʼe, ema sei haklaken!”
1. Oinsá ita hatene katak la iha buat ida mak bele hapara serbisu haklaken?
1 La iha buat ida mak bele hapara Maromak Jeová atu halaʼo ninia hakarak. (Isa 14:24) Iha tempu uluk kuandu Gideão ho nia soldadu naʼin-300 atu halo funu hasoru tropa boot husi ema Midian hamutuk naʼin-135.000, tuir ema nia haree Gideão la bele manán funu neʼe. Maibé Maromak Jeová hatete ba Gideão: “Ó sei salva duni Izraél husi ema Midian nia liman. Haʼu mak haruka ó, loos ka lae?” (Juíz 6:14) Ohin loron mós Maromak Jeová ajuda ninia povu atu halaʼo ninia hakarak. Jesus hatete: “Lia-foun reinu nian neʼe, ema sei haklaken iha mundu tomak.” (Mt 24:14) Ema ida la bele hapara serbisu neʼe!
2. Tansá mak ita bele fiar katak Maromak Jeová sei ajuda ita ida-idak nuʼudar ita halaʼo serbisu haklaken?
2 Maromak Jeová ajuda ita ida-idak: Maski ita bele fiar metin katak Maromak Jeová sei apoia ninia Testemuña nuʼudar grupu, nia mós ajuda ita ida-idak ka lae? Apóstolu Paulo sente katak Maromak Jeová ajuda nia liuhusi ninia Oan Jesus. (2 Tim 4:17) Ita mós bele fiar katak Maromak Jeová sei haraik bensaun ba ita ida-idak nia hakaʼas-an atu halaʼo ninia hakarak.—1 Joao 5:14.
3. Iha situasaun saida deʼit mak Maromak Jeová sei ajuda ita?
3 Ita sente katak susar neʼebé Ita hasoru loroloron halo Ita la iha forsa atu haklaken ka lae? Maromak Jeová promete katak nia sei “fó forsa ba ema neʼebé kole”. (Isa 40:29-31) Ita hasoru problema husi ema neʼebé kontra lia-loos ka lae? Bíblia hatete: “Soe ó-nia todan ba Jeová, no nia rasik sei apoia ó.” (Sal 55:22) Dala ruma Ita sente Ita-nia matenek la toʼo ka lae? Maromak Jeová dehan: “Bá, haʼu rasik sei apoia ó-nia ibun.” (Êx 4:11, 12) Ita iha problema kona-ba saúde no ladún hola parte iha serbisu haklaken ka lae? Maski Ita bele halo uitoan deʼit, maibé Maromak Jeová hafolin Ita-nia hakaʼas-an ho laran, no mós bele uza Ita atu halaʼo ninia hakarak.—1 Kor 3:6, 9.
4. Tau fiar ba Maromak Jeová book ita atu halo saida?
4 ‘Maromak Jeová nia liman neʼebé lolo ona, sé mak bele dada fali?’ (Isa 14:27) Sin, hodi tau fiar ba Maromak Jeová nia bensaun, mai ita kontinua atu haklaken “ho aten-brani tan Naʼi”.—Apos 14:3.