Ema kristaun presiza halo orasaun
1. Atu halaʼo serbisu haklaken, ita presiza halo saida?
1 Ita la bele halaʼo serbisu haklaken ho ita rasik nia forsa. Maromak Jeová mak fó kbiit mai ita atu halaʼo serbisu neʼe. (Flp 4:13) Nia mós uza ninia anju sira ajuda ita atu hetan ema neʼebé iha hahalok hanesan bibi-malae. (Apok 14:6, 7) Maromak Jeová mak halo moris fini lia-loos nian neʼebé ita kuda no rega. (1 Kor 3:6, 9) Tan neʼe importante tebes ba ita ema kristaun atu sadere ba ita-nia Aman iha lalehan liuhusi orasaun!
2. Ita bele halo orasaun kona-ba saida deʼit?
2 Orasaun kona-ba ita rasik: Ita tenke halo orasaun bainhira ita bá haklaken. (Ef 6:18) Ita sei halo orasaun kona-ba saida deʼit? Ita bele husu ajuda atu haklaken ho haksolok no aten-brani. (Apos 4:29) Ita bele husu Maromak Jeová nia ajuda atu bele hasoru ema neʼebé buka lia-loos no hakarak estuda Bíblia. Se ema ruma husu pergunta ba ita, ita bele halo orasaun badak hodi husu ajuda atu fó resposta neʼebé diʼak. (Neem 2:4) Diʼak mós atu husu matenek atu bele kontinua haklaken nuʼudar serbisu neʼebé importante liu iha ita-nia moris. (Tgo 1:5) Liután neʼe, Maromak Jeová sei sente kontente kuandu ita fó-agradese ba knaar espesiál neʼebé ita simu nuʼudar ninia atan.—Kol 3:15.
3. Oinsá mak orasaun kona-ba ema seluk bele ajuda atu halaʼo serbisu haklaken?
3 Orasaun kona-ba ema seluk: Ita mós presiza “reza ba malu”, dala ruma diʼak mós atu temi ita-nia maluk kristaun nia naran. (Tgo 5:16; Apos 12:5) Problema kona-ba saúde halo Ita la bele haklaken barak ka lae? Se nuneʼe, karik diʼak atu halo orasaun ba sira neʼebé isin-diʼak, neʼebé halaʼo serbisu haklaken. Keta haluha katak orasaun neʼebé ita halo ba ita-nia maluk kristaun iha forsa boot! Diʼak mós atu halo orasaun ba ukun-naʼin sira atu sira husik ita halaʼo ita-nia serbisu haklaken, hodi nuneʼe ita-nia irmaun sira “bele moris hakmatek no iha dame”.—1 Tim 2:1, 2.
4. Tansá mak ita labele kole atu harohan?
4 Hatoʼo lia-foun diʼak iha mundu tomak mak serbisu neʼebé todan tebes. Se ita “la kole atu harohan”, ita bele halaʼo serbisu neʼe ho Maromak Jeová nia ajuda.—Rom 12:12.