Karta Husi Grupu Administradór

Maluk Testemuña ba Jeová:

Ita moris iha tempu neʼebé espesiál tebes! Ita hotu kontente tebes kona-ba neʼe, loos ka lae? Ami mós haksolok atu serbisu hamutuk ho imi, irmaun-irmán doben sira. Ita hotu “hamutuk ida deʼit” hodi fó sasin ba ema barak liu kona-ba ita-nia Aman iha lalehan, Jeová.—Sof 3:9; Joao 14:12.

Ita-nia ksolok atu serbí Maromak Jeová la dehan katak ita nunka hasoru susar ruma. Durante tinan serbisu 2010, imi balu hetan susar tanba rai-nakdoko, rai-nabeen, anin no udan makaʼas, no dezastre naturál boot seluk tan. (Mt 24:7) Loron-loron imi barak tahan hasoru susar tanba moras no sai ferik-katuas. No mós hanesan Bíblia fó-hatene nanis, ita hotu hasoru “terus” neʼebé aumenta ba beibeik. (Mt 24:8) Iha rai balu, inklui rai-Arménia, Eritreia, no Koreia Súl, ema hatama ita-nia irmaun sira iha komarka tanba sira-nia fiar.—Mt 24:9.

Saida mak ajuda ita atu nafatin haksolok maski ita hasoru susar sira-neʼe? Eskritura ba tinan 2010, fó-hanoin mai ita kona-ba razaun importante ida: ‘Domin tahan terus hotu. Domin hela nafatin.’ (1 Kor 13:7, 8) Sin, ita-nia domin ba malu, no ba Maromak Jeová, fó forsa mai ita atu tahan nafatin.

Ema barak neʼebé bolu sira-nia an nuʼudar kristaun hakfodak ho ita-nia serbisu haklaken neʼebé halaʼo iha mundu tomak. Maski sira la apoia buat neʼebé ita fiar no hanorin, maibé ita-nia serbisu book sira balu atu hatete: “Imi halo serbisu neʼebé tuir loloos ami tenke halo!” Saida mak ajuda Testemuña ba Jeová atu nafatin haklaken loron ba loron? Dala ida tan, resposta mak domin. Hanesan ita-nia Aman iha lalehan, ita lakohi katak ema ida lakon. (2 Ped 3:9) Ita hakarak ema hotu atu hakribi sira-nia sala no hetan salvasaun. Nuneʼe, ita la hakfodak katak iha tinan kotuk haklaken-naʼin aumenta toʼo hamutuk naʼin-7.508.050. Ohin loron, relijiaun ida neʼebé mak iha haklaken-naʼin barak hanesan neʼe, neʼebé ho domin fó sira-nia tempu atu haklaken kona-ba Maromak?

Ita sente laran-manas hodi haree oinsá profeta Isaías nia liafuan sai loos ohin loron, nia hatete: “No sei mosu duni iha loron sira nia rohan, katak foho, uma Jeová nian, sei hamriik metin aas liu fali foho sira seluk, no loloos sei sai aas liu fali foho sira, no nasaun hotu sei laʼo nadodon ba neʼebá.” (Isa 2:2-4) Sira neʼebé laʼo nadodon ba Maromak Jeová nia uma inklui mós ema naʼin-294.368 neʼebé hetan batizmu iha tinan serbisu 2010. Ho laran ita fó benvindu ba irmaun-irmán doben sira-neʼe, neʼebé sai ona ita-nia família. Ami hein katak ita-nia domin kristaun sei book ita atu kontinua ajuda sira kontra hasoru ita-nia inimigu Diabu Satanás.—1 Ped 5:8, 9.

Ema hamutuk naʼin-18.706.895 tuir Memoriál iha loron Tersa, 30 Marsu 2010. Ida-neʼe barak liu tinan sira liubá, no hatudu katak sei iha ema rihun ba rihun neʼebé karik sei hamutuk ho ita atu adora Maromak Jeová. Nuneʼe, ita kontente tanba Maromak Jeová seidauk halakon mundu aat neʼe, loos ka lae? Nuʼudar ita hein ba tempu neʼe, ita-nia domin ajuda ita atu kontinua tahan ho laran-metin.—2 Tes 3:5.

Iha tinan 2010, reuniaun boot ba loron tolu ho tema, “Hakbesik Nafatin ba Maromak Jeová!” halaʼo iha mundu tomak. Reuniaun boot neʼe ajuda ita atu hametin liután ita-nia relasaun ho ita-nia Aman iha lalehan, Jeová. Liafuan iha Salmo 144:15 mak loos duni, hodi dehan: “Ksolok ba povu neʼebé nia Maromak mak Jeová!” Maski ita hasoru situasaun saida deʼit iha futuru, maibé ita fiar katak se Jeová iha ita-nia sorin, ita sei la taʼuk buat ida. (Sal 23:4) Lakleur tan Maromak Jeová, liuhusi ninia Oan, sei “halakon buat neʼebé Diabu halo”. (1 Joao 3:8) Loos duni, ita hein namanas tempu neʼe! Maibé antes tempu neʼe mai, ita sei badinas nafatin iha serbisu neʼebé importante liu.—1 Kor 15:58.

Ami la haluha imi-nia serbisu makaʼas, no ami “temi imi beibeik” iha ami-nia orasaun. (Rom 1:9) Ami hein katak imi “hela nafatin iha Maromak nia domin hodi hein daudaun ita Naʼi Jesus Kristu nia laran-luak neʼebé sei haraik moris rohan-laek ba imi”.—Jud 21.

Ami hadomi tebes imi!

Imi-nia irmaun sira,

Grupu Administradór husi Testemuña ba Jeová