Fahe konvite ba Memoriál hahú iha loron 2 Abríl
1. Iha tinan neʼe, bainhira mak ita sei fahe konvite ba Memoriál? Tansá mak kampaña neʼe importante tebes?
1 Husi loron 2 toʼo 17 Abríl, ita sei fahe konvite ba loron neʼebé importante liu hotu, loron neʼe mak atu komemora Kristu nia mate. Liuhusi kampaña neʼebé ita halaʼo tinan-tinan, ema barak neʼebé interese simu konvite no tuir Memoriál. Porezemplu, iha loron neʼebé atu halaʼo Memoriál, feto ida telefone sukursál no hatete: “Haʼu foin toʼo uma, no haʼu haree konvite iha haʼu-nia odamatan okos. Haʼu hakarak tuir, maibé haʼu la hatene oras.” Irmaun esplika oinsá bele hetan informasaun neʼe iha konvite. Feto neʼe ramata ninia koʼalia hodi promete: “Orasida kalan, haʼu sei tuir!”
2. Ita bele hatete saida kuandu fahe konvite?
2 Oinsá atu fahe konvite: Tanba ita la iha tempu barak no ita hakarak fahe konvite barak liu, diʼak atu koʼalia lalais deʼit. Ita bele hatete: “Bondia. Ami hakarak fó ba Ita-nia família konvite ba loron espesiál neʼebé sei halaʼo iha mundu tomak iha loron-domingu 17 Abríl. [Fó konvite ba uma-naʼin.] Iha loron ida-neʼe, ami sei komemora Jesus nia mate. Iha neʼebá ita sei rona diskursu husi Bíblia neʼebé sei esplika oinsá ita bele hetan bensaun husi Kristu nia sakrifísiu. Iha konvite neʼe, hakerek tiha ona fatin no oras neʼebé sei halaʼo reuniaun espesiál neʼe iha ita-nia área.”
3. Oinsá mak ita bele konvida ema barak liu?
3 Se ita-nia kongregasaun nia haklaken-fatin mak boot liu, karik katuas sira deside atu ita tau konvite iha odamatan okos iha uma neʼebé ema la iha. La haluha atu fahe konvite ba ita-nia vizita fali, família, kolega iha serbisu-fatin, kolega eskola, no ema seluk neʼebé ita koñese. Kuandu ita hola parte atu fahe konvite iha findesemana, diʼak atu fahe livru fulan-fulan hamutuk ho konvite. Ita bele ka lae serbí nuʼudar pioneiru estra iha fulan-Abríl hodi bele hola parte liután iha kampaña neʼebé halo ita haksolok?
4. Tansá mak ita hakarak ema sira-neʼebé interese atu tuir Memoriál?
4 Sira neʼebé tuir Memoriál sei rona hanorin importante husi Bíblia. Sira sei rona oinsá Maromak Jeová hatudu domin neʼebé boot hodi fó Jesus nia moris nuʼudar sakrifísiu. (Joao 3:16) Sira sei aprende oinsá mak ema bele hetan bensaun husi Maromak nia Reinu, ka ukun. (Isa 65:21-23) Sira mós sei hetan laran-manas atu hakbesik ba asistente sira no husu atu Testemuña ida estuda Bíblia ho sira atu aprende liután. Ita hotu hein katak sira neʼebé hakarak hatene kona-ba Maromak Jeová sei simu konvite hodi hamutuk ho ita atu komemora Memoriál!