Kampaña atu konvida ema tuir Memoriál hahú iha loron 17 Marsu
1. Iha loron-sábadu 17 Marsu ita sei hahú kampaña saida?
1 Memoriál neʼebé ita halaʼo tinan-tinan fó-hanoin mai ita kona-ba Jesus nia mate. (1 Kor 11:26) Tan neʼe, ita hakarak konvida ema barak atu tuir no rona kona-ba oinsá Jeová hatudu nia domin hodi fó Jesus nia moris nuʼudar sakrifísiu. (Joao 3:16) Iha tinan neʼe, ita-nia kampaña atu konvida ema tuir Memoriál hahú iha loron-sábadu 17 Marsu. Ita hein namanas ona atu hola parte iha kampaña neʼe ka lae?
2. Saida mak ita bele hatete kuandu fahe konvite?
2 Saida mak ita bele hatete: Kuandu ita fahe konvite, diʼak atu koʼalia badak deʼit. Karik ita bele hatete: “Bondia. Ami mai atu fó konvite neʼe ba Ita-nia família atu tuir reuniaun importante neʼebé sei halaʼo iha mundu tomak iha loron 5 Abríl. Iha reuniaun neʼe ita sei rona diskursu ida husi Bíblia neʼebé esplika kona-ba Jesus nia mate kumpre saida, no mós buat neʼebé Jesus halo daudauk. Iha konvite neʼe, Ita bele haree fatin no oras neʼebé sei halaʼo reuniaun neʼe.” Kuandu ita hola parte atu fahe konvite iha findesemana, diʼak mós atu fahe Livru Haklaken no Sedarlah! se bele.
3. Oinsá mak ita bele konvida ema barak atu tuir Memoriál?
3 Hakaʼas an atu konvida ema barak: Ita hotu hakarak konvida ema barak atu tuir Memoriál. Tan neʼe, la haluha atu konvida ema neʼebé ita estuda Bíblia hamutuk, vizita fali, família, kolega serbisu, kolega eskola, viziñu, no ema seluk neʼebé ita koñese. Katuas sira sei fó matadalan kona-ba oinsá atu fahe konvite ba ema hotu iha ita-nia haklaken-fatin. Kampaña neʼebé ita halaʼo tinan-tinan atu konvida ema tuir Memoriál lori rezultadu diʼak. Porezemplu, iha tinan kotuk, kuandu feto ida tama iha reuniaun-fatin, asistente ida hakarak ajuda nia atu buka ema neʼebé fó konvite ba nia. Maibé feto neʼe dehan katak nia la hatene ema ida iha reuniaun-fatin neʼe, no katak nia mai tanba nia simu konvite husi ema ida neʼebé haklaken uma ba uma iha loron neʼe.
4. Tanbasá ita laran-manas atu hola parte iha kampaña neʼe?
4 Karik ema ida sei tuir Memoriál tanba konvite neʼebé ita rasik fó ba nia. Maski ema tuir ka lae, ita-nia hakaʼas-an nafatin fó sasin ba ema. Konvite neʼebé ita fahe sei hatudu katak agora Jesus ukun daudauk ona nuʼudar Liurai. Ita-nia laran-manas hodi hola parte iha kampaña neʼe sei hatudu ba ema iha haklaken-fatin, ba maluk kristaun, no importante liu ba Maromak Jeová, katak ita hafolin duni Jesus nia moris nuʼudar sakrifísiu.—Kol 3:15.