Kampaña atu konvida ema tuir Memoriál sei hahú iha 1 Marsu
1. Bainhira mak kampaña atu fahe konvite ba Memoriál sei hahú? Tanbasá mak iha tinan neʼe ita iha tempu naruk liu atu fahe konvite?
1 Iha loron-sesta, 1 Marsu, ita sei hahú kampaña atu fahe konvite hodi konvida ema seluk atu tuir Memoriál hamutuk ho ita. Loron Memoriál sei monu iha 26 Marsu, neʼe katak ita-nia tempu atu fahe konvite naruk liu se kompara ho tinan uluk. Ida-neʼe sei fó oportunidade ba ema barak liután atu simu konvite, liuliu se ita-nia kongregasaun nia haklaken-fatin mak boot liu.
2. Saida mak kongregasaun nia arranju kona-ba foti konvite no mós kona-ba haklaken?
2 Halo arranju: Katuas sira sei fó matadalan kona-ba oinsá atu fahe konvite ba ema hotu iha ita-nia haklaken-fatin, inklui mós se presiza ka lae, atu husik konvite iha uma neʼebé uma-naʼin la iha. Depois haklaken tiha husi uma ba uma no iha konvite neʼebé resin, bele fahe neʼe iha fatin públiku. Katuas haklaken nian mak iha knaar atu haree katak konvite neʼebé hakerek ona diresaun, tau iha meza livru-fatin nian hodi haklaken-naʼin sira bele foti deʼit. Diʼak atu la tau kedas konvite hotu iha meza leten, maibé tau natoon deʼit. Tan neʼe, kuandu ita foti konvite, ita presiza foti deʼit buat neʼebé ita bele fahe iha semana ida nia laran.
3. Diʼak atu halo saida deʼit kuandu ita fahe konvite?
3 Saida mak ita sei hatete? Diʼak liu atu koʼalia badak deʼit, hodi nuneʼe ita bele haklaken ba ema barak. Iha pájina 4, ita sei hetan ezemplu kona-ba oinsá mak ita bele koʼalia ho ema iha ita-nia haklaken-fatin. Maski nuneʼe, ita lakohi ansi se uma-naʼin hatudu laran-diʼak ka iha pergunta ruma. Kuandu ita fahe konvite iha findesemana, ita mós bele fahe ho revista sira. Iha 2 Marsu, ita sei hakaʼas an atu fahe deʼit konvite duké konvida uma-naʼin atu estuda Bíblia.
4. Tanbasá mak ita hakarak hola parte iha kampaña neʼe ho laran-manas?
4 Ita hein katak ema barak sei tuir Memoriál. Diskursu iha Memoriál sei esplika ho klaru kona-ba sé mak Jesus. (1 Kor 11:26) Diskursu neʼe mós sei esplika kona-ba oinsá mak ninia mate ajuda ita. (Rom 6:23) No mós sei esplika tansá importante tebes mai ita atu hanoin-hetan Jesus. (Joao 17:3) Tan neʼe, mai ita hotu ho laran-manas hola parte iha kampaña neʼe!