Konvite espesiál
1. Bainhira mak kampaña atu fahe konvite ba reuniaun boot tinan 2015 sei komesa?
1 Hanoin toʼok, ita planu atu halo festa hodi teʼin hahán espesiál ba família no belun sira. Atu halo ida-neʼe ita presiza hakaʼas an no gasta osan barak. Ita sei laran-manas atu konvida ema mai, loos ka lae? Hanesan neʼe mós, ita-nia organizasaun halo serbisu barak ona atu prepara hahán espirituál neʼebé ita sei simu iha reuniaun boot ba loron tolu iha tinan 2015. Maromak Jeová fó ita knaar espesiál atu konvida ema seluk atu tuir, no ita sei komesa fahe konvite sira semana tolu antes ita-nia reuniaun boot komesa. Saida mak sei ajuda ita atu fahe konvite sira ho laran-manas?
2. Saida deʼit mak sei book ita atu hola parte iha kampaña atu fahe konvite?
2 Tanba ita hafolin ai-han espirituál neʼebé Jeová prepara ona ba ita liuhusi reuniaun boot sira, ida-neʼe sei book ita ida-idak hodi hakarak fahe konvite neʼe ho laran. (Isaías [Yesaya] 65:13, 14) Ita mós la bele haluha katak ema balu sei tuir reuniaun boot tanba simu konvite husi kampaña neʼe neʼebé ita halaʼo tinan-tinan. Maski ema barak ka ema uitoan deʼit mak tuir, ita-nia hakaʼas-an durante kampaña neʼe sei lori hahiʼi ba Jeová no haleno Ninia laran-luak.—Salmo (Mazmur) 145:3, 7; Apokalipse 22:17.
3. Oinsá mak ita sei fahe konvite sira?
3 Grupu katuas nian sei fó sai kona-ba oinsá kongregasaun bele fahe konvite neʼe ba ema barak. Sira sei deside se diʼak ka lae atu rai hela konvite iha odamatan kuandu ema la iha uma, ka atu fahe konvite ba ema iha fatin públiku. Iha loron-sábadu no domingu ita sei fahe revista sira hamutuk ho konvite. Maski baibain ita tau fokus atu komesa estudu Bíblia iha loron-domingu primeiru fulan-fulan, maibé durante kampaña neʼe, ita sei hakaʼas an atu fahe deʼit konvite. Kuandu kampaña neʼe ramata, ita sei kontente tebes tanba ita laran-manas atu konvida ema barak atu halibur hamutuk hodi simu hahán espirituál neʼebé Maromak Jeová fó ba ita!
[Dezeñu iha pájina 3]
Ita sei koʼalia oinsá?
Depois kumprimenta tiha uma-naʼin, ita bele hatete: “Ami hola parte iha kampaña espesiál ida neʼebé halaʼo iha mundu tomak atu konvida ema ba reuniaun importante. Bele haree informasaun kona-ba loron, oras no fatin iha konvite neʼe.”