Konvite ba Memoriál fahe iha mundu tomak!
1. Kampaña espesiál saida mak sei halaʼo iha mundu tomak antes Memoriál?
1 “Halo ida-neʼe hodi hanoin haʼu.” (Lc 22:19) Hodi halo tuir Jesus nia mandamentu neʼe, ema neʼebé adora Maromak Jeová hamutuk ho ema neʼebé hatudu interese ba lia-loos sei halibur an atu komemora Jesus nia mate iha loron 30 Marsu 2010. Haklaken-naʼin sira sei fahe konvite espesiál ba Memoriál iha mundu tomak komesa iha loron 13 Marsu toʼo 30 Marsu.
2. Oinsá mak ita bele fahe konvite neʼe?
2 Oinsá atu fahe konvite: Karik ita fó konvite ba uma-naʼin hodi nia bele haree dezeñu iha oin, no hatete: “Iha kalan 30 Marsu, ema rihun ba rihun iha mundu tomak sei halibur an atu hanoin-hetan Jesus nia mate. Haʼu mai atu fó konvite neʼe ba Ita-Boot no Ita-Boot nia família atu asiste. Ita-Boot nia kolega sira mós bele bá asiste. Oras no fatin ba reuniaun neʼe mak hakerek iha neʼe.” Depende ba situasaun, ita bele lee Lukas 22:19 atu esplika katak asiste reuniaun neʼe mak halo tuir Bíblia nia mandamentu. Maibé, la haluha katak ita la iha tempu barak no ita hakarak fahe konvite barak liu, tan neʼe diʼak atu koʼalia lalais deʼit.
3. Ita bele konvida sé deʼit?
3 Se Ita-nia kongregasaun nia haklaken-fatin mak boot liu, karik katuas sira deside atu Ita tau konvite iha odamatan okos kuandu Ita bá toʼo uma ida neʼebé ema la iha. Dala ruma, diʼak atu fahe livru fulan-fulan nian hamutuk ho konvite. La haluha atu fahe konvite ba ita-nia família, vizita fali, estudante Bíblia, kolega iha serbisu-fatin, kolega eskola, viziñu sira, no ema seluk neʼebé ita koñese.
4. Tanba ita hafolin Maromak Jeová nia domin hodi fó ninia Oan nuʼudar sakrifísiu, ita hakarak halo saida?
4 Prepara an atu hola parte: Tempu Memoriál mak tempu diʼak atu halo barak liután iha atividade haklaken. Ita bele halo planu atu foti pioneiru ausiliár ka lae? Ita iha oan ka estudante Bíblia neʼebé laʼo ba oin iha lia-loos ka lae? Se nuneʼe, hakbesik katuas ida atu husu se oan ka estudante neʼe prontu ona atu hola parte iha kampaña espesiál nuʼudar haklaken-naʼin ka lae. Tanba ita hafolin no agradese ba Maromak Jeová nia domin hodi fó ninia Oan nuʼudar sakrifísiu neʼebé kasu ita-nia sala, ita hakarak duni atu tuir Memoriál no mós atu konvida ema barak liután atu asiste hamutuk ho ita.—Joao 3:16.