Kampaña espesiál atu fahe konvite ba Memoriál!
1. Komesa iha loron 21 Marsu, haklaken-naʼin iha mundu tomak sei halo saida? Tansá?
1 Iha loron-kinta, 9 Abríl 2009, ema hotu neʼebé adora Maromak Jeová sei halibur hamutuk atu hanoin fali domin boot neʼebé Maromak hatudu ba ema hotu. (Rom 5:6-8) Ita hein katak ema rihun ba rihun sei komemora Jesus nia mate hamutuk ho ita. Tan neʼe, komesa iha loron 21 Marsu iha mundu tomak ita sei fahe konvite ba Memoriál.
2. Oinsá mak ita bele fahe konvite?
2 Oinsá atu fahe konvite neʼe: Uza didiʼak dezeñu, pergunta sira, no eskritura neʼebé temi iha konvite laran. Porezemplu, ita bele hatudu dezeñu iha oin no hatete: “Haʼu hakarak atu konvida Ita atu komemora Jesus nia mate, neʼebé sei halaʼo iha loron-kinta, 9 Abríl 2009.” Depois hatudu konvite nia títulu no pergunta rua. La haluha atu fó-hatene uma-naʼin katak nia mós bele konvida ninia família no kolega sira atu mós tuir.
3. Kuandu fahe tiha konvite, saida mak Ita bele halo antes loron Memoriál?
3 Se Ita-nia kongregasaun iha haklaken-fatin neʼebé boot tebes, karik katuas sira sei husu Ita atu husik konvite iha uma hotu maski uma-naʼin la iha. Iha loron-sábadu no domingu, fahe Menara Pengawal ho Sedarlah! hamutuk ho konvite neʼe. Diʼak se Ita konvida ema neʼebé Ita vizita fali, sira neʼebé estuda Bíblia, família, kolega eskola, kolega serbisu, viziñu, no ema seluk neʼebé Ita koñese. Tinan kotuk, irmán ida konvida ema naʼin-30 husi nia família atu tuir Memoriál. Antes loron Memoriál nia mós vizita sira dala balu tan hodi fó-hanoin sira katak Memoriál mak buat neʼebé importante tebes. Nia kontente tebes kuandu nia haree katak sira naʼin-25 tuir reuniaun neʼe, no ema naʼin-4 komesa atu estuda Bíblia!
4. Planu saida mak ita bele halo agora? Tansá?
4 Halo planu agora: Karik haklaken-naʼin barak bele aumenta sira-nia serbisu haklaken durante fulan Marsu no Abríl. Se ita iha oan ka estudante Bíblia neʼebé laʼo ba oin iha lia-loos, karik agora mak tempu diʼak ba sira atu sai haklaken-naʼin neʼebé seidauk batizmu. Agora mak tempu atu halo planu hodi hakaʼas an liután atu hola parte iha kampaña neʼe. Mai ita konvida ema hotu atu hanoin fali domin neʼebé Maromak no Jesus hatudu ba ita.—Joao 3:16; 15:13.