Ita bele haklaken iha loron-domingu ka lae?
1. Saida mak ita bele aprende husi Paulo no ninia maluk sira-nia ezemplu, kuandu sira iha Filipe?
1 Paulo no nia maluk sira vizita sidade Filipe durante sira-nia viajen nuʼudar misionáriu. Iha loron Sábadu ida, ema judeu sira iha sidade neʼe deskansa. Ema ida sei la koʼalia aat ba Paulo sira, se sira mós deskansa husi sira-nia serbisu haklaken iha loron neʼe. Maibé, sira hatene katak iha loron neʼe ema judeu sira halibur hamutuk iha sidade liʼur atu harohan, nuneʼe sira haree ida-neʼe nuʼudar oportunidade diʼak atu haklaken ba sira. Paulo ho ninia maluk sira kontente duni kuandu Lídia no ninia umakain tomak rona ba sira no hetan batizmu! (Apos 16:13-15) Ohin loron, ema barak mós deskansa iha loron-domingu. Nuneʼe, diʼak atu ita uza oras balu iha loron neʼe atu haklaken ba sira, loos ka lae?
2. Susar saida deʼit mak Jeová nia povu tahan hasoru hodi bele haklaken iha loron-domingu ho livre?
2 Tahan hasoru susar: Durante tinan 1927, Jeová nia povu sai toman atu uza oras balu hodi haklaken kada loron-domingu. Maibé, lakleur deʼit, ema komesa atu kontra hasoru sira. Iha rai-Estadus Unidus polísia sira kaer Testemuña barak. Sira dehan katak Testemuña sira kontra lei loron deskansa nian iha loron-domingu, sira la respeita ema nia loron hakmatek, no sira faʼan livru maski la iha lisensa. Maibé Maromak Jeová nia povu la para haklaken. Iha tinan 1930, irmaun sira arranja “kampaña área nian” iha neʼebé haklaken-naʼin sira husi kongregasaun balu bá fatin ida atu haklaken. Dala ruma, kuandu polísia atu mai kaer haklaken-naʼin sira neʼebé haklaken daudauk, iha haklaken-naʼin barak tebes toʼo polísia la bele hapara sira. Ita agradese tebes tanba ita bele haklaken iha loron-domingu, no ema ladún fó susar mai ita, loos ka lae?
3. Tanbasá mak diʼak atu hola parte iha serbisu haklaken iha loron-domingu?
3 Loron diʼak atu haklaken: Iha loron-domingu, baibain ema barak deskansa deʼit iha uma tanba feriadu husi serbisu. No sira ladún estrese iha loron neʼe. Ema balu neʼebé gosta bá igreja hakarak koʼalia kona-ba Maromak iha loron neʼe. Se ita tuir reuniaun iha loron-domingu, ita hatais diʼak ona no prontu atu bá haklaken. Nuneʼe, bele halo planu atu bá haklaken antes ka depois tuir reuniaun ka lae? Se presiza, ita bele lori hahán uitoan.
4. Ita bele sente saida deʼit se ita uza tempu balu atu haklaken iha loron-domingu?
4 Se ita uza oras balu iha loron-domingu atu hola parte iha serbisu haklaken, ita mós sei iha tempu uitoan atu deskansa. No kuandu ita deskansa, ita sei sente haksolok tanba ita hola parte iha serbisu neʼebé sagradu. (Prov 19:23) Karik ita mós bele sente haksolok hodi hetan ema hanesan Lídia!