Ita-nia oan prontu atu fó sasin iha eskola ka lae?

1. Oan sira tenke prontu atu halo saida?

¹ Klaru katak kuandu oan sira bá eskola, sira hasoru susar oioin. No sira mós iha oportunidade atu “fó sasin kona-ba lia-loos”. (Joao 18:37) Sira prontu ona atu halo ida-neʼe ka lae?

2. Saida deʼit mak oan sira presiza hatene hodi sai prontu atu fó sasin iha eskola?

² Ita-nia oan komprende ho klaru ona tanbasá mak hola parte iha loron-boot nasaun nian ka relijiaun nian mak sala? Kuandu mestre mestra sira hakaʼas ita-nia oan atu halo planu hodi kontinua sira-nia eskola toʼo universidade, ka kuandu kolega eskola sira hakaʼas ita-nia oan atu namora, hemu tua ka uza droga, sira prontu ona atu tahan hasoru susar sira-neʼe ka lae? Se ema ruma hakaʼas ita-nia oan atu halo hahalok neʼebé kontra Bíblia, oinsá nia sei hatán? Nia hatán deʼit: “Ida-neʼe kontra haʼu-nia relijiaun,” ka nia hatene oinsá atu esplika ninia fiar?—1 Ped 3:15.

3. Oinsá mak inan-aman bele uza Adorasaun Família nian atu prepara sira-nia oan?

³ Uza Adorasaun Família nian: Diʼak atu koʼalia nuʼudar família kona-ba problema neʼebé oan sira hasoru iha eskola, tanba ida-neʼe ajuda sira atu hamriik metin. Tuir Ita-nia hanoin, diʼak atu uza Adorasaun Família nian atu prepara oan sira hodi sai prontu ba problema neʼebé sira rasik hasoru ka lae? Atu inan-aman hatene kona-ba informasaun saida mak diʼak atu uza iha Adorasaun Família nian, bele husu oan saida mak halo sira hanoin liu. Maski ita estuda ona informasaun ruma iha tempu uluk, maibé karik ita bele estuda fali tanba agora ita-nia oan boot ona no sira hatene buat barak liután. (Sal 119:95) Ita mós bele halo drama kiʼik, porezemplu ita bele finje sai mestre, mestra ka kolega eskola. Hanorin ita-nia oan oinsá atu hatán hodi uza Bíblia, uza livru hanesan Bertukar Pikiran no Pertanyaan Kaum Muda, Jilid 1 no 2, ka uza livru seluk. Inan ida uza drama kiʼik atu treinu ninia oan sira hodi hakbesik ba sira-nia mestre ka mestra foun no fó-hatene katak sira mak Testemuña ba Jeová.—Haree Livru Haklaken 15 Dezembru 2010, pájina 3-5.

4. Saida mak inan-aman neʼebé matenek hakarak halo?

⁴ Tanba ita moris iha loron ikus sira, joven kristaun sira hasoru “susar barak” no susar sira-neʼe aumenta ba beibeik. (2 Tim 3:1) Inan-aman neʼebé matenek sei hakaʼas an atu buka-hatene problema neʼebé sira-nia oan rasik sei hasoru. (Prov 22:3) Entaun, hakaʼas an atu halo buat hotu neʼebé ita bele atu ajuda ita-nia oan sira atu sai prontu atu fó sasin.