Hahalok importante liu neʼebé mestre diʼak hatudu
1. Hahalok importante saida mak mestre diʼak tenke hatudu?
1 Oinsá mak ema ida bele sai mestre Bíblia nian neʼebé diʼak? Eskola boot, esperiénsia barak, ka matenek rasik ka lae? Tuir loloos lae. Atu ema ida bele sai mestre diʼak, nia presiza hatudu hahalok neʼebé kumpre Ukun-Fuan, hahalok neʼebé sai nuʼudar sinál ba Jesus nia dixípulu sira, no hahalok boot liu husi Maromak Jeová nia hahalok furak sira. (Joao 13:35; Gal 5:14; 1 Joao 4:8) Saida mak hahalok neʼe? Neʼe mak domin. Sin, mestre neʼebé diʼak tenke hatudu domin.
2. Tansá mak importante ba ita atu hatudu domin ba ema?
2 Hadomi ema: Mestre Boot, Jesus, hatudu domin ba ema, no ida-neʼe book ema neʼebé nia hanorin atu rona ninia mensajen. (Lc 5:12, 13; Joao 13:1; 15:13) Se ita hanoin ema, ita sei aproveita oportunidade hotu atu haklaken. Maski ema fó-terus mai ita ka la hatudu interese ba ita-nia mensajen, ita sei la husik neʼe hapara ita. Ita sei hatudu interese ba ema neʼebé ita haklaken, no ita sei hatoʼo informasaun tuir sira-nia situasaun. Ita sei prontu atu fó ita-nia tempu laʼós deʼit kuandu ita estuda ho ema, maibé mós atu prepara informasaun neʼebé ita atu estuda ho sira.
3. Oinsá mak domin ba lia-loos husi Bíblia ajuda ita iha serbisu haklaken?
3 Hadomi lia-loos husi Bíblia: Jesus mós hadomi lia-loos husi Bíblia no haree ida-neʼe nuʼudar rikusoi. (Mt 13:52) Se ita hadomi lia-loos, ita sei haklaken ho laran-manas, no ida-neʼe sei book ita-nia rona-naʼin atu hakarak rona ita-nia mensajen. Domin ba lia-loos sei ajuda ita atu hanoin liuliu ba informasaun neʼebé ita hakarak hatoʼo ba ema, no ida-neʼe ajuda ita atu la hanoin demais kona-ba ita-nia fraku, no mós sei ajuda ita hodi la taʼuk atu haklaken.
4. Oinsá mak ita bele haburas domin?
4 Hatudu domin: Oinsá mak ita bele haburas domin ba ema? Ita bele halo ida-neʼe hodi hanoin kleʼan kona-ba domin neʼebé Jeová no ninia Oan-Mane hatudu ba ema, no mós hodi hanoin kona-ba ema iha ita-nia haklaken-fatin nia situasaun. (Mc 6:34; 1 Joao 4:10, 11) Hodi estuda Bíblia beibeik no hanoin kleʼan, ita-nia domin ba lia-loos sei aumenta liután. Domin mak hahalok ida neʼebé espíritu santu lori mai. (Gal 5:22) Entaun, ita bele husu Maromak Jeová atu haraik espíritu santu mai ita no ajuda ita atu haburas domin. (Lc 11:13; 1 Joao 5:14) Maski ita la eskola boot, ladún iha esperiénsia, no ladún iha matenek, ita bele sai mestre Bíblia nian neʼebé diʼak se ita hatudu domin.