Keta husik Ita-nia domin sai malirin

1, 2. (a) Jesus nia liafuan iha Mateus 24:12, foufoun sai loos ba sé? (b) Oinsá mak livru Apóstolu hatudu katak ema kristaun barak iha nafatin domin ba Maromak? (Haree dezeñu iha leten.)

BAINHIRA Jesus iha rai, nia koʼalia kona-ba sinál balu neʼebé hatudu katak “mundu neʼe atu hotu”. Sinál ida mak kona-ba, “ema barak nia domin sei sai malirin.” (Mateus 24:3, 12) Jesus nia liafuan neʼe foufoun aplika ba ema judeu sira iha apóstolu sira-nia tempu. Sira hatete katak sira mak Maromak nia povu, maibé sira husik sira-nia domin ba Maromak sai malirin.

² Maski nuneʼe, ema kristaun barak la hatudu hahalok hanesan neʼe. Sira haklaken “liafuan diʼak kona-ba . . . Kristu” ho badinas no hatudu domin ba Maromak, ba maluk fiar-naʼin, no mós ba ema seluk neʼebé seidauk hatene kona-ba lia-loos. (Apóstolu 2:44-47; 5:42) Maibé triste mak, ema kristaun balu husik duni sira-nia domin sai malirin. Oinsá mak ita hatene?

3. Karik saida mak book ema kristaun balu nia domin hodi sai malirin?

³ Jesus hatete ba ema kristaun sira neʼebé hela iha Éfeso: “Ó husik ona ó-nia domin uluk nian.” (Apokalipse 2:4) Karik ema kristaun iha Éfeso husik ema seluk nia hahalok neʼebé buka diʼak deʼit ba sira-nia an mak halo sira-nia domin sai malirin. (Éfeso 2:2, 3) Éfeso mak sidade riku neʼebé ema buka deʼit moris diʼak no rikusoin. Ema barak iha Éfeso mós moris iha dalan neʼebé la morál no la hatudu respeitu ba Maromak nia ukun-fuan sira. Sira buka liu atu goza moris duké hatudu domin ba Maromak no ema seluk.

4. (a) Oinsá mak Jesus nia liafuan mós sai loos ohin loron? (b) Iha lisaun neʼe ita sei koʼalia kona-ba saida?

⁴ Jesus nia liafuan mós sai loos iha ita-nia tempu. Ohin loron, ema nia domin ba Maromak sai menus ba beibeik. Ema barak sadere deʼit ba ema nia organizasaun sira atu rezolve problema duké sadere ba Maromak. Domin husi Jeová nia atan mós bele sai malirin hanesan ema kristaun sira iha Éfeso. Tan neʼe, mai ita haree toʼok oinsá mak ita bele iha nafatin domin ba: (1) Jeová, (2) lia-loos husi Bíblia, (3) irmaun-irmán sira.

DOMIN BA JEOVÁ

5. Tanbasá mak ita tenke hadomi Maromak?

⁵ Sé mak ita tenke hadomi liu hotu? Jesus dehan: “‘Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.’ Neʼe mak mandamentu neʼebé boot liu no uluk liu.” (Mateus 22:37, 38) Domin ba Maromak ajuda ita atu halo tuir ninia mandamentu, tahan terus, no odi buat neʼebé aat. (Lee Salmo [Mazmur] 97:10.a) Maibé Satanás ho ninia mundu sempre koko atu halo fraku no halakon ita-nia domin ba Maromak.

6. Saida mak sei akontese se ema la hadomi tan Maromak?

⁶ Ema iha mundu neʼe iha hanoin neʼebé laloos kona-ba domin. Ema barak “hadomi deʼit sira-nia an” duké hatudu domin ba Maromak. (2 Timóteo 3:2) Sira hanoin liu kona-ba “hakarak aat isin nian no hakarak aat matan nian no foti-an kona-ba rikusoin”. (1 João 2:16) Apóstolu Paulo fó avizu kona-ba saida mak sei akontese se ita mak tau uluk ita-nia hakarak. Nia dehan: “Hanoin buat isin nian lori ba mate.” Tanbasá? Tanba ema sira neʼebé halo hanesan neʼe sei sai Maromak nia inimigu. (Roma 8:6, 7) Ema neʼebé uza sira-nia moris hodi buka deʼit osan ka buka hakarak seksuál nian, ikusmai sei la sai kontente no haterus sira-nia an.​—1 Korinto 6:18; 1 Timóteo 6:9, 10.

7. Hanoin saida deʼit mak bele kona ema kristaun ohin loron?

⁷ Ema sira neʼebé fiar ba evolusaun no sira neʼebé la fiar ba Maromak, koko atu halo ema seluk mós la fiar katak Maromak iha, ka lalika hadomi Maromak. Sira halo ema sente katak ema beik ka ema la eskola mak fiar katak iha Kriadór ida. Iha mós ema sira neʼebé tau fiar liu ba sientista duké tau fiar ba ita-nia Kriadór. (Roma 1:25) Se la kuidadu, hanoin hanesan neʼe mós bele kona ema kristaun. Neʼe bele halo fraku ita-nia relasaun ho Jeová no ita-nia domin bele sai malirin.​—Ebreu 3:12.

8. (a) Situasaun hanesan saida deʼit mak bele halo ita sai laran-tun? (b) Oinsá mak eskritura husi Salmo 136 bele fó kmaan ba ita?

⁸ Tanba ita moris daudauk iha Satanás nia mundu aat neʼe, iha buat barak mak bele halo ita laran-tun. (1 João 5:19) Maibé se ita mak sai laran-tun demais, neʼe bele halo fraku ita-nia fiar no halo ita-nia domin sai malirin. Porezemplu, karik ita hasoru problema balu kona-ba idade, saúde, ka ekonomia. Ka karik ita sente triste tanba ita la bele kumpre knaar ruma ho didiʼak tuir ita-nia hakarak. Karik ita sai laran-tun tanba buat balu la sai loos tuir ita-nia hanoin. Maski problema saida deʼit mak ita hasoru, ita sei nunka fiar katak Jeová husik ona ita. Hanoin kona-ba liafuan furak husi Salmo 136:23: “Nia hanoin-hetan ita bainhira ema hamoe ita, tanba ninia domin neʼebé laran-metin iha ba nafatin.” Sin, ita bele fiar katak Jeová rona ba ita-nia “harohan atu husu ajuda” no nia sei hatán ba orasaun sira-neʼe.​—Salmo (Mazmur) 116:1; 136:24-26.

9. Saida mak fó forsa ba apóstolu Paulo hodi kaer metin ninia domin ba Maromak?

⁹ Apóstolu Paulo hanoin kleʼan kona-ba oinsá Jeová ajuda ona nia no neʼe hametin nia. Nia dehan: “Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?” (Ebreu 13:6) Apóstolu Paulo tau fiar ba Jeová no neʼe ajuda nia hodi tahan hasoru susar sira. Bainhira nia monu ba susar ruma, nia hatudu nafatin fiar ba Jeová. Maski iha tempu neʼebé ema sulan nia iha komarka, nia fó nafatin ajuda ba maluk fiar-naʼin seluk liuhusi karta neʼebé nia hakerek ba kongregasaun sira. (Éfeso 4:1; Filipe 1:7; Filemon 1) Problema saida deʼit mak nia hasoru, nia kaer metin nafatin ninia domin ba Jeová. Nia sadere deʼit ba ‘Maromak neʼebé fó kmaan ba ema iha situasaun hotu, ida neʼebé fó kmaan ba ita iha ita-nia susar hotu’. (2 Korinto 1:3, 4) Oinsá mak ita bele banati-tuir apóstolu Paulo?

10. Oinsá mak ita bele kaer metin ita-nia domin ba Jeová?

¹⁰ Apóstolu Paulo fó-hatene dalan ida neʼebé bele ajuda ita atu kaer metin ita-nia domin ba Maromak, nia dehan: “Halo orasaun beibeik.” Iha tempu seluk nia dehan tan: “La kole atu halo orasaun.” (1 Tesalónika 5:17; Roma 12:12) Tanbasá mak orasaun bele ajuda ita hakbesik ba Maromak? Tanba bainhira ita halo orasaun, ita koʼalia ho Jeová. Halo nuneʼe ajuda ita atu iha relasaun neʼebé diʼak ho nia. (Salmo [Mazmur] 86:3) Bainhira ita fó sai ita-nia hanoin no sentimentu ba ita-nia Aman iha lalehan, neʼe halo ita hakbesik liu ba nia. (Salmo [Mazmur] 65:2) No mós bainhira ita haree oinsá Jeová hatán ba ita-nia orasaun, neʼe haburas liután ita-nia domin ba nia. Ita la iha duvida katak “Jeová besik ba sira hotu neʼebé bolu nia”. (Salmo [Mazmur] 145:18) Ita-nia fiar ba Jeová nia domin no apoiu sei ajuda ita atu tahan hasoru problema naran deʼit ohin loron no iha futuru.

DOMIN BA LIA-LOOS HUSI BÍBLIA

11, 12. Oinsá mak ita bele haburas ita-nia domin ba lia-loos husi Bíblia?

¹¹ Nuʼudar ema kristaun, ita hadomi lia-loos. No lia-loos mai husi Maromak nia Liafuan. Iha Jesus nia orasaun ba ninia Aman nia dehan: “Ita-nia liafuan mak lia-loos.” (João 17:17) Ita tenkesér hatene Bíblia hakerek saida deʼit hodi ita bele iha domin ba lia-loos husi Bíblia. (Koloso 1:10) Maibé hatene deʼit seidauk toʼo. Mai ita haree toʼok saida mak Salmo 119 hatete ita presiza halo. (Lee Salmo [Mazmur] 119:97-100.b) Iha moris loroloron nian, ita tenke hanoin kleʼan beibeik kona-ba saida mak ita lee husi Bíblia. Bainhira ita hanoin kleʼan kona-ba oinsá mak lia-loos husi Bíblia bele ajuda ita-nia moris, neʼe sei halo ita hadomi liután lia-loos sira-neʼe.

¹² Eskritura husi Salmo mós hatete: “Ita-nia liafuan sira mak midar iha haʼu-nia nanál, midar liu fali bani-been iha haʼu-nia ibun!” (Salmo [Mazmur] 119:103) Livru sira neʼebé bazeia ba Bíblia husi Maromak nia organizasaun mak hanesan ai-han neʼebé gostu. Se ita mak han ai-han neʼebé ita gosta, karik ita sei la ansi, maibé nata didiʼak. Hanesan neʼe mós bainhira estuda, ita la bele ansi. Uza tempu atu estuda didiʼak sei halo ita gosta liután “liafuan furak” sira husi lia-loos, no neʼe sei halo fasil liu ba ita atu hanoin-hetan buat neʼebé ita lee no oinsá atu uza informasaun sira-neʼe hodi ajuda ema seluk.​—Eclesiastes (Pengkhotbah) 12:10.

13. Saida mak ajuda Jeremias hodi hadomi Maromak nia liafuan sira? Neʼe book nia atu halo saida?

¹³ Profeta Jeremias hadomi tebes Maromak nia liafuan sira. Nia dehan: “Haʼu hetan Ita-nia liafuan sira, no haʼu han tiha; no Ita-nia liafuan sai buat neʼebé halo haʼu-nia laran kontente no haksolok, tanba haʼu lori Ita-nia naran, oh Jeová, Maromak ukun-naʼin ba tropa lalehan nian.” (Jeremias [Yeremia] 15:16) Jeremias hanoin kleʼan kona-ba Maromak nia liafuan furak sira no nia hadomi tebes liafuan sira-neʼe. Nia hafolin tebes oportunidade neʼebé nia iha hodi reprezenta Jeová no haklaken ninia mensajen. Se ita mak hadomi lia-loos husi Bíblia, ita sei hatene katak ita iha duni priviléjiu espesiál hodi sai Testemuña ba Jeová no haklaken kona-ba Maromak nia Ukun iha loron ikus sira-neʼe.

14. Ita bele halo saida tan atu aumenta ita-nia domin ba lia-loos husi Bíblia?

¹⁴ Saida tan mak bele ajuda ita hadomi liután lia-loos husi Bíblia? Ita presiza tuir beibeik reuniaun sira, tanba iha neʼebá mak Jeová hanorin ita. Dalan importante ida neʼebé Jeová hanorin ita mak liuhusi Estudu Livru Haklaken semana-semana. Se ita hakarak hetan benefísiu husi estudu neʼe, ita presiza prepara uluk. Porezemplu, ita bele loke eskritura hotu neʼebé hakerek iha parágrafu sira. Ohin loron, ita bele lee ka hetan Livru Haklaken neʼe liuhusi sasán eletróniku sira. Livru neʼe agora fó sai ona iha língua oioin neʼebé bele hetan husi sítiu jw.org no aplikasaun JW Library. Sasán eletróniku balu husik ita atu bele loke lalais eskritura sira neʼebé hakerek iha parágrafu laran. Maski ita bele uza dalan oioin atu estuda lisaun sira husi Livru Haklaken, maibé se ita mak lee didiʼak eskritura sira no hanoin didiʼak kona-ba eskritura sira-neʼe, ita-nia domin ba lia-loos husi Bíblia sei aumenta liután.​—Lee Salmo (Mazmur) 1:2.c

DOMIN BA IRMAUN-IRMÁN SIRA

15, 16. (a) Tuir João 13:34, 35, Jesus fó mandamentu saida ba ita? (b) Oinsá mak ita-nia domin ba Maromak no Bíblia iha ligasaun ho domin ba irmaun-irmán sira?

¹⁵ Iha Jesus nia kalan ikus iha rai, nia hatete ba ninia dixípulu sira: “Haʼu fó ba imi ukun-fuan foun ida, katak imi hadomi malu; hanesan haʼu hadomi ona imi, atu imi mós hadomi malu. Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.”​—João 13:34, 35.

¹⁶ Hatudu domin ba irmaun-irmán iha ligasaun ho ita-nia domin ba Jeová. Se ita mak la hadomi Maromak, ita la bele hadomi ita-nia irmaun-irmán sira. No se ita mak la hadomi ita-nia irmaun-irmán sira, ita mós la bele hadomi Maromak. Apóstolu João hatete: “Ema neʼebé la hadomi ninia maluk neʼebé nia haree, la bele hadomi Maromak neʼebé nia la haree.” (1 João 4:20) Ita-nia domin ba Jeová no irmaun-irmán sira mós iha ligasaun ho ita-nia domin ba Bíblia. Tanbasá? Tanba se ita mak iha domin ba Bíblia, neʼe sei book ita atu halo tuir mandamentu sira kona-ba hadomi Maromak no irmaun-irmán sira.​—1 Pedro 1:22; 1 João 4:21.

17. Ita bele hatudu domin liuhusi dalan saida deʼit?

¹⁷ Lee 1 Tesalónika 4:9, 10. Iha dalan saida deʼit mak ita bele hatudu domin ba maluk sira husi kongregasaun? Karik irmaun ka irmán neʼebé idade ona presiza ajuda atu bá-mai reuniaun. Karik irmán faluk ida presiza ajuda atu hadiʼa buat ruma iha ninia uma. (Tiago 1:27) Irmaun-irmán sira neʼebé sente laran-tun, depresaun, ka hasoru daudauk problema seluk presiza ita atu fó atensaun no fó kmaan ba sira. (Provérbios [Amsal] 12:25; Koloso 4:11) Ita bele hatudu ita-nia domin ba “ita-nia maluk fiar-naʼin” liuhusi ita-nia liafuan no ajuda.​—Galásia 6:10.

18. Saida mak bele ajuda ita atu rezolve problema ho irmaun-irmán sira?

¹⁸ Bíblia hatete katak iha “loron ikus sira”, ema barak husi mundu aat neʼe sei hanoin an deʼit no karak-teen. (2 Timóteo 3:1, 2) Nuʼudar ema kristaun, ita presiza hakaʼas an atu haburas ita-nia domin ba Jeová, ba ninia Liafuan, no ba maluk fiar-naʼin. Tanba ita la perfeitu, dala ruma bele mosu problema kiʼik ho irmaun-irmán sira. Maibé tanba ita iha domin ba malu, ita hakarak rezolve kedas problema sira-neʼe iha dalan neʼebé diʼak. (Éfeso 4:32; Koloso 3:14) Keta husik ita-nia domin atu sai malirin! Mai ita kontinua hatudu domin neʼebé metin ba Jeová, ba ninia Liafuan, no ba irmaun-irmán sira.