Kontinua iha domin neʼebé boot ba malu

1-2. (a) Tanbasá apóstolu Paulo dehan katak domin mak hahalok “ida neʼebé boot liu”? (b) Ita sei koʼalia kona-ba pergunta saida deʼit?

BAINHIRA apóstolu Paulo koʼalia kona-ba fiar, esperansa, no domin, nia dehan katak hahalok “ida neʼebé boot liu mak domin”. (1 Kor 13:13) Tanbasá Paulo dehan nuneʼe? Iha futuru, ita la presiza iha fiar ba Maromak nia promesa sira kona-ba mundu foun, ka iha esperansa katak promesa sira-neʼe sei sai loos tanba buat hotu sai loos ona. Maibé ita nafatin presiza hatudu domin ba Jeová no ba ema seluk. Ita-nia domin ba sira sei kontinua sai boot ba beibeik.

² Tanba ita sei presiza hatudu domin ba nafatin, mai ita haree kona-ba pergunta tolu. Primeiru, tanbasá ita presiza hatudu domin ba malu? Segundu, oinsá ita bele hatudu domin ba malu? Terseiru, oinsá ita bele kontinua hametin ita-nia domin ba malu?

TANBASÁ ITA PRESIZA HATUDU DOMIN BA MALU?

3. Ita iha razaun saida deʼit atu hatudu domin ba malu?

³ Tanbasá importante atu hatudu domin ba malu? Bainhira ita hatudu domin ba malu, ita prova katak ita mak ema Kristaun neʼebé loos. Jesus hatete ba ninia apóstolu sira: “Se imi hadomi malu, ema hotu sei hatene katak imi mak haʼu-nia dixípulu.” (João 13:35) Liután neʼe, se ita hadomi malu, neʼe sei ajuda ita atu mantein unidade. Paulo hatete katak “domin mak kesi ita hamutuk iha dalan neʼebé perfeitu”. (Kol 3:14) Maibé iha razaun importante seluk tan tanbasá ita presiza hadomi malu. Apóstolu João hakerek ba irmaun-irmán sira: “Ema neʼebé hadomi Maromak tenke hadomi mós ninia maluk.” (1 João 4:21) Bainhira ita hatudu domin ba malu, ita hatudu katak ita hadomi Maromak.

4-5. Fó toʼok ilustrasaun oinsá ita-nia domin ba Maromak iha ligasaun ho ita-nia domin ba malu.

⁴ Oinsá mak ita-nia domin ba Maromak iha ligasaun ho domin neʼebé ita hatudu ba irmaun-irmán sira? Hanoin toʼok kona-ba ligasaun entre ita-nia fuan ho parte seluk husi ita-nia isin-lolon. Doutór bele hatene ita-nia kondisaun fuan mak fraku ka lae hodi cek dalan neʼebé ita-nia fuan tuku-tuku. Oinsá mak ezemplu neʼe liga ho hahalok domin?

⁵ Hanesan doutór bele hatene ita-nia fuan nia kondisaun hodi cek dalan neʼebé ita-nia fuan tuku-tuku, ita mós bele hatene ita-nia domin ba Maromak mak boot oinsá se ita ezamina ita-nia domin ba irmaun-irmán sira. Se ita nota katak ita-nia domin ba irmaun-irmán sira sai fraku, karik neʼe hatudu katak ita-nia domin ba Maromak mós sai fraku. Maibé kuandu ita hatudu beibeik domin ba irmaun-irmán sira, neʼe hatudu katak ita-nia domin ba Maromak metin nafatin.

6. Se ita-nia domin ba irmaun-irmán sira komesa sai fraku, tanbasá neʼe mak problema neʼebé sériu? (1 João 4:​7-9, 11)

⁶ Se ita-nia domin ba irmaun-irmán sira komesa sai fraku, neʼe mak problema neʼebé sériu. Tanbasá? Tanba neʼe katak ita-nia relasaun ho Jeová sai fraku ona. Apóstolu João esplika ho klaru hodi hatete: “Se [ema ida] la hadomi ninia maluk neʼebé nia haree, sá tan hadomi Maromak neʼebé nia labele haree.” (1 João 4:20) Lisaun mak saida? Se ita hakarak halo Jeová kontente, ita presiza “hadomi malu”.—Lee 1 João 4:​7-9, 11.

OINSÁ ITA BELE HATUDU DOMIN BA MALU?

7-8. Oinsá ita bele hatudu katak ita hadomi malu?

⁷ Maromak nia Liafuan temi beibeik mandamentu atu “hadomi malu”. (João 15:​12, 17; Rom 13:8; 1 Tes 4:9; 1 Ped 1:22; 1 João 4:11) Maski nuneʼe, domin mak sentimentu iha ita-nia laran neʼebé ema seluk labele haree. Entaun, oinsá mak ita bele hatudu katak ita hadomi irmaun-irmán sira? Liuhusi ita-nia liafuan no hahalok.

⁸ Iha dalan oioin atu hatudu katak ita hadomi irmaun-irmán sira. Tuirmai mak ezemplu balu: “Koʼalia loloos ba malu.” (Zac 8:16) “Kontinua iha dame iha imi-nia leet.” (Mc 9:50) “Buka uluk atu hatudu respeitu ba malu.” (Rom 12:10) “Simu malu bá.” (Rom 15:7) “Kontinua . . . fó perdua ba malu.” (Kol 3:13) “Kontinua ajuda malu iha susar laran.” (Gal 6:2) “Kontinua fó kmaan ba malu no hametin malu.” (1 Tes 5:​11, nota) “Halo orasaun ba malu.”—Tgo 5:16.

9. Tanbasá fó kmaan ba malu mak dalan importante atu hatudu domin? (Haree mós foto.)

⁹ Mai ita koʼalia kona-ba dalan ida atu hatudu domin ba malu. Ita sei koʼalia kona-ba Paulo nia liafuan: “Kontinua fó kmaan ba malu.” Tanbasá fó kmaan ba malu mak dalan importante atu hatudu domin? Matenek-naʼin ida kona-ba Bíblia hatete katak liafuan “fó kmaan” neʼebé Paulo temi signifika “hamriik iha ema ida nia sorin no anima nia bainhira nia hasoru susar”. Entaun, bainhira ita fó kmaan ba maluk neʼebé hasoru susar, ita ajuda nia atu kontinua serbí Jeová ho laran-metin. No tempu ida-idak neʼebé ita fó kmaan ba ita-nia maluk, ita hatudu katak ita hadomi nia.—2 Kor 7:​6, 7, 13.

10. Saida mak ligasaun entre sentimentu hanoin ema no fó kmaan?

¹⁰ Sentimentu hanoin ema seluk no fó kmaan mak liga malu. Iha dalan oinsá? Baibain ema neʼebé hanoin ema seluk hakarak atu fó kmaan ba ema neʼebé hasoru susar no koko halo buat ruma atu ajuda. Bainhira ita hanoin ema seluk, neʼe ajuda ita atu fó kmaan ba sira. Paulo esplika katak tanba Jeová hanoin ema, neʼe book Nia atu fó kmaan ba sira. Paulo hatete katak Jeová mak nuʼudar “Aman neʼebé laran-sadiʼa no Maromak neʼebé fó kmaan ba ema iha situasaun hotu”. (2 Kor 1:3) Iha neʼe, Paulo uza liafuan “laran-sadiʼa” atu esplika kona-ba sentimentu hanoin ema seluk. Entaun Maromak mak Aman ka Hun ba hahalok laran-sadiʼa tanba nia hanoin tebes ema, no neʼe book nia atu “fó kmaan ba ita iha ita-nia susar hotu”. (2 Kor 1:4) Hanesan bee malirin halo ema sente fresku iha loron manas, nuneʼe mós Jeová fó kmaan ba ema neʼebé hasoru susar. Oinsá mak ita bele banati-tuir Jeová hodi hanoin ema seluk no fó kmaan ba sira? Dalan ida mak hodi haburas hahalok neʼebé bele ajuda ita atu hanoin ema no fó kmaan ba sira. Neʼe inklui hahalok saida deʼit?

11. Tuir Koloso 3:12 no 1 Pedro 3:​8, hahalok saida deʼit mak bele ajuda ita atu hatudu domin no fó kmaan ba ema seluk?

¹¹ Saida mak bele ajuda ita atu mantein ita-nia domin no “kontinua fó kmaan ba malu” loroloron? Ita presiza haburas hahalok hanesan hanoin malu, hadomi malu hanesan maun-alin, no laran-diʼak. (Lee Koloso 3:12; 1 Pedro 3:8.) Oinsá mak hahalok sira-neʼe ajuda ita? Bainhira ita hanoin irmaun-irmán sira no hadomi sira, ita hakarak tebes atu fó kmaan ba sira iha situasaun susar. Jesus hatete: “Buat neʼebé sai husi ema nia ibun mai husi laran. Ema neʼebé diʼak koʼalia sai buat diʼak tanba ninia laran nakonu ho buat diʼak.” (Mt 12:​34, 35) Dalan importante ida atu hatudu domin ba irmaun-irmán sira mak hodi fó kmaan ba sira.

OINSÁ ITA BELE KONTINUA HAMETIN ITA-NIA DOMIN BA MALU?

12. (a) Ita presiza kuidadu kona-ba saida? (b) Ita sei koʼalia kona-ba pergunta saida?

¹² Ita hotu hakarak “hatudu nafatin domin ba malu”. (1 João 4:7) Maski nuneʼe, ita presiza hanoin-hetan Jesus nia avizu kona-ba “ema barak nia domin sei sai malirin”. (Mt 24:12) Jesus la dehan katak ninia dixípulu barak sei la hatudu domin ba malu. Maibé ohin loron ema barak iha mundu la hatudu domin ba malu, tan neʼe ita presiza kuidadu atu sira-nia hahalok la fó influénsia ba ita. Agora, mai ita koʼalia kona-ba pergunta importante ida: Saida mak sei ajuda ita atu hatene se ita-nia domin ba irmaun-irmán sira mak boot?

13. Saida mak bele ajuda ita atu hatene se ita-nia domin ba irmaun-irmán sira mak boot?

¹³ Dalan ida atu hatene katak ita iha domin neʼebé boot mak hodi hanoin kona-ba ita-nia hahalok iha situasaun balu. (2 Kor 8:8) Apóstolu Pedro temi kona-ba situasaun ida: “Buat neʼebé importante liu mak imi tenke hadomi malu tebetebes, tanba ema neʼebé iha domin, sempre prontu atu fó perdua ba sala barak.” (1 Ped 4:8) Entaun buat neʼebé ita halo kuandu irmaun-irmán sira hakanek ita-nia laran ka halo sala, sei ajuda ita hatene se ita-nia domin ba sira mak boot ka lae.

14. Tuir 1 Pedro 4:​8, ita presiza hatudu domin hanesan saida? Fó toʼok ilustrasaun.

¹⁴ Mai ita hanoin didiʼak kona-ba Pedro nia liafuan. Parte primeiru husi versíkulu 8 hatete katak ita presiza “hadomi malu tebetebes”. Liafuan neʼebé Pedro uza nuʼudar “tebetebes” signifika “halo boot liután”. Parte segundu husi versíkulu neʼe esplika rezultadu husi hadomi malu tebetebes. Bainhira ita hadomi malu tebetebes, ita prontu atu fó perdua ba malu. Imajina toʼok ita iha meza ida neʼebé iha riska barak. Klaru katak ita sei uza hena ruma neʼebé boot atu taka riska sira-neʼe, laʼós riska ida ka rua deʼit, maibé riska hotu. Iha dalan neʼebé hanesan, se ita hadomi tebetebes irmaun-irmán sira, ita laʼós perdua sala ida ka rua deʼit, maibé ita “fó perdua ba sala barak”.

15. Se ita hadomi tebes irmaun-irmán sira, neʼe sei book ita atu halo saida? (Koloso 3:13)

¹⁵ Ita-nia domin ba irmaun-irmán sira tenke boot, hodi nuneʼe ita bele fó perdua ba sira maski dala ruma susar tebes atu halo ida-neʼe. (Lee Koloso 3:13.) Bainhira ita fó perdua ba ema seluk, ita hatudu katak ita hadomi tebes sira no ita hakarak halo Jeová kontente. Saida tan mak bele ajuda ita atu fó perdua ba ema seluk neʼebé halo sala hasoru ita?

16-17. Saida tan mak bele ajuda ita atu fó perdua ba ema neʼebé halo sala kiʼik? Fó toʼok ilustrasaun. (Haree mós foto.)

¹⁶ Ita presiza tau fokus ba irmaun-irmán sira-nia hahalok diʼak, laʼós ba buat neʼebé negativu. Hanoin toʼok komparasaun tuirmai. Ita han hamutuk ho irmaun-irmán sira, goza tempu hamutuk ho sira, no antes atu fila ita hasai foto hamutuk. Ita hasai foto dala rua ka dala tolu. Maibé ita haree foto ida iha irmaun ida neʼebé ninia oin haree ladún diʼak. Ita sei halo saida ba foto neʼe? Klaru katak, ita sei hamoos foto neʼe tanba ita sei iha foto rua seluk neʼebé ema hotu haree oin-midar.

¹⁷ Ita bele kompara foto neʼebé ita rai hanesan ho memória neʼebé ita iha. Baibain ita iha memória diʼak kona-ba tempu neʼebé ita goza ho irmaun-irmán sira. Maibé oinsá se loron ida irmaun ka irmán ida hakanek Ita-nia laran? Diʼak atu koko haluha deʼit hanesan Ita hamoos foto neʼebé Ita la gosta. (Prov 19:11; Éf 4:32) Ita bele haluha deʼit sala kiʼik neʼebé irmaun-irmán sira halo tanba ita iha memória furak barak hamutuk ho sira no ita hakarak rai didiʼak memória furak sira-neʼe.

TANBASÁ IMPORTANTE TEBES ATU HATUDU DOMIN OHIN LORON?

18. Iha lisaun neʼe, saida mak ita aprende ona kona-ba domin?

¹⁸ Tanbasá ita hakarak hametin liután ita-nia domin ba malu? Hanesan ita aprende ona, bainhira ita hatudu domin ba irmaun-irmán sira, ita hatudu katak ita hadomi Jeová. Oinsá mak ita hatudu domin ba irmaun-irmán sira? Dalan ida mak hodi fó kmaan ba sira. Se ita hanoin ema seluk, neʼe sei book ita atu “kontinua fó kmaan ba malu”. Oinsá ita bele kontinua hametin ita-nia domin ba malu? Hodi fó perdua ba irmaun-irmán sira maski neʼe susar.

19. Tanbasá importante tebes atu hatudu domin ohin loron?

¹⁹ Tanbasá importante tebes atu hatudu domin ohin loron? Haree toʼok razaun neʼebé Pedro hatete: “Maibé buat hotu nia rohan besik daudaun ona. Tan neʼe, . . . imi tenke hadomi malu tebetebes.” (1 Ped 4:​7, 8) Tanba ita moris iha loron ikus sira, saida mak sei akontese? Jesus hatete ba ninia dixípulu sira: “Nasaun sira hotu sei odi imi tanba haʼu-nia naran.” (Mt 24:9) Atu tahan hasoru ida-neʼe, ita presiza mantein unidade. Se ita halo nuneʼe, Satanás sei labele haketak ita tanba “domin mak kesi ita hamutuk iha dalan neʼebé perfeitu”.—Kol 3:14; Flp 2:​1, 2.