Pergunta husi haklaken-naʼin
◼ Tanbasá mak ita presiza badinas atu hatama ita-nia relatóriu fulan-fulan?
Ita hotu sente kontente kuandu ita rona kona-ba rezultadu diʼak neʼebé ita hetan iha serbisu haklaken. (Haree Provérbios 25:25.) Apostolu 2:41 fó sai katak depois apóstolu Pedro hatoʼo diskursu iha loron Pentekostes, “besik ema rihun tolu” hetan batizmu. Lakleur deʼit, númeru neʼe aumenta sai “besik rihun lima”. (Apos 4:3) Ita bele fiar katak relatóriu sira-neʼe halo ema kristaun sira iha tempu neʼebá kontente tebes. Ita mós sente kontente hanesan neʼe kuandu ita rona rezultadu diʼak husi ita-nia serbisu haklaken. Ita kontente tebes atu rona kona-ba rezultadu diʼak neʼebé ita-nia irmaun-irmán sira hetan, iha serbisu haklaken iha mundu tomak.
Tanba presiza tempu barak atu halibur no sura relatóriu sira, katuas sira iha kongregasaun sei hafolin tebes haklaken-naʼin ida-idak nia ajuda kona-ba neʼe. Ita badinas atu hatama Ita-nia relatóriu fulan-fulan ka lae?
Kuandu relatóriu sira hatudu oinsá ita-nia atividade aumenta liután, ida-neʼe halo ita kontente. Liután neʼe, relatóriu sira ajuda sukursál atu hatene kona-ba oinsá ita-nia serbisu iha mundu tomak laʼo ba oin. Porezemplu, relatóriu sira ajuda irmaun sira atu hatene kona-ba rai ida-neʼebé mak presiza ajuda liután ka atu hatene livru hira mak presiza haruka ba rai neʼe. Katuas sira iha kongregasaun, uza relatóriu haklaken nian atu hatene saida mak haklaken-naʼin sira bele halo atu hetan rezultadu diʼak liután. Relatóriu sira neʼebé hatudu rezultadu diʼak fó laran-manas mai ita, no book ita hotu atu hanoin kona-ba ita-nia serbisu haklaken, no buka dalan oinsá ita bele halo serbisu neʼe diʼak liután.
Haklaken-naʼin hotu presiza rekoñese sira ida-idak nia responsabilidade, atu hatama sira-nia relatóriu haklaken nian fulan-fulan. Katuas neʼebé tau matan ita-nia grupu haklaken prontu atu fó ajuda ba irmaun no irmán sira neʼebé sente susar uitoan atu hola parte beibeik iha serbisu haklaken. Fulan-fulan kuandu sira halaʼo grupu haklaken iha semana ikus, sira bele fó-hanoin ba irmaun-irmán sira atu hatama sira-nia relatóriu. Se irmaun-irmán sira la biban atu fó sira-nia relatóriu iha Reuniaun-Fatin, katuas grupu haklaken nian sei halibur relatóriu husi haklaken-naʼin sira iha sira-nia grupu, atu fó ba sekretáriu antes nia haruka kongregasaun nia relatóriu fulan-fulan nian ba sukursál.
Kuandu ita hotu badinas atu hatama ita-nia relatóriu haklaken nian, neʼe sei ajuda atu halo kmaan katuas sira-nia knaar.