Hatudu agradese ba Jeová nia laran-luak

JEOVÁ mak Maromak laran-luak nian. (Tiago 1:17) Ita bele haree ninia laran-luak iha buat hotu neʼebé nia kria, hanesan fitun rihun ba rihun iha lalehan, no duʼut matak neʼebé taka rai.—Salmo (Mazmur) 65:12, 13; 147:7, 8; 148:3, 4.

Ema neʼebé hakerek salmu ida hafolin tebes Jeová nuʼudar ninia Kriadór toʼo nia halo knananuk ida hodi hahiʼi buat hotu neʼebé Jeová halo. Lee toʼok Salmo 104 no haree toʼok se Ita mós sente hanesan nia. Nia hatete: “Haʼu sei kanta ba Jeová durante haʼu-nia moris tomak; haʼu sei toka múzika ba haʼu-nia Maromak iha tempu hotu neʼebé haʼu moris.” (Salmo [Mazmur] 104:33) Ita mós sente hanesan neʼe ka lae?

EZEMPLU DIʼAK LIU HOTU KONA-BA LARAN-LUAK

Jeová hakarak ita atu banati-tuir ninia ezemplu kona-ba hatudu laran-luak. Nia mós fó razaun diʼak tanbasá atu halo nuneʼe. Haree toʼok liafuan neʼebé Jeová haleno apóstolu Paulo atu hakerek: “Haruka sira neʼebé riku iha mundu neʼe atu labele foti-an, no mós haruka sira atu la tau fiar ba sira-nia riku, maibé tau fiar ba Maromak, ida neʼebé fó ho laran-luak buat hotu neʼebé halo ita kontente. No dehan ba sira atu halo hahalok diʼak, sai riku ho hahalok loos, hatudu laran-luak, sai prontu atu fahe buat neʼebé sira iha, hodi halo ida-neʼe sira halibur rikusoin husi Maromak. Neʼe katak sira sei harii fundasaun neʼebé diʼak ba futuru, hodi nuneʼe sira bele kaer metin ba moris neʼebé loloos.”—1 Timóteo 6:17-19.

Iha Paulo nia karta segundu ba kongregasaun iha Korinto, nia koʼalia kona-ba hahalok saida mak diʼak atu hatudu bainhira fó kontribuisaun. Nia dehan: “Diʼak atu ema ida-idak fó tuir buat neʼebé nia deside ona iha laran, laʼós ho laran-todan ka obriga an, tanba Maromak hadomi ema neʼebé fó ho laran-ksolok.” (2 Korinto 9:7) Depois neʼe apóstolu Paulo koʼalia kona-ba oinsá laran-luak bele fó buat diʼak ba ema. Primeiru neʼe ajuda atu taka ema nia presiza, no segundu, ema neʼebé fó mós bele sente kontente no Maromak sei fó bensaun ba sira.—2 Korinto 9:11-14.

Paulo remata ninia karta hodi hatudu saida mak evidénsia boot liu kona-ba Jeová nia laran-luak. Nia dehan: “Obrigadu ba Maromak tanba ninia prezente boot liu neʼebé nia fó ona ba ita.” (2 Korinto 9:15) Prezente neʼe mak inklui buat diʼak hotu neʼebé nia fó ba ita liuhusi Jesus Kristu. Prezente neʼe boot tebes toʼo ita-nia liafuan la toʼo atu esplika buat hotu neʼebé Jeová fó.

Oinsá mak ita bele hatudu katak ita hafolin buat hotu neʼebé Jeová no Jesus halo ona mai ita, no sei halo iha futuru? Dalan ida mak hodi fó ita-nia tempu, forsa no rikusoin, atu adorasaun loos bele laʼo ba oin nafatin, maski ita fó barak ka uitoan.—1 Crônicas (Tawarikh) 22:14; 29:3-5; Lucas 21:1-4.