“Serbisu neʼe boot tebes”

NEʼE mak enkontru neʼebé importante tebes iha Jeruzalein. Liurai David halibur ninia ema-boot, no asuwaʼin sira hamutuk. Sira hotu haksolok bainhira rona avizu espesiál ida husi liurai. Jeová fó knaar ba David nia oan Salomão atu harii uma boot ida hodi sai fatin neʼebé atu adora Maromak neʼebé loos. Liurai David simu planu ida atu harii uma neʼe no nia fó planu neʼe ba Salomão. David dehan: “Serbisu neʼe boot tebes, tanba templu neʼe laʼós halo ba ema, maibé ba Maromak Jeová.”—1 Crônicas (Tawarikh) 28:1, 2, 6, 11, 12; 29:1.

Tuirmai David husu: “Sé mak voluntáriu atu mai ohin ho prezente ida iha nia liman hodi fó ba Jeová?” (1 Crônicas [Tawarikh] 29:5) Se Ita mak iha tempu neʼebá, Ita sei halo saida? Ita-nia laran sei book Ita atu apoia serbisu boot neʼe ka lae? Ema Izraél fó kedas sira-nia apoiu. Sira “haksolok hodi fó kontribuisaun sira-neʼe, . . . sira fó kontribuisaun ba Jeová ho laran tomak”.—1 Crônicas (Tawarikh) 29:9.

Tinan atus ba atus liutiha, Jeová harii fali buat ida neʼebé boot liu fali templu, neʼe mak templu espirituál nian. Ho arranju neʼe ema bele hakbesik atu adora Jeová liuhusi Jesus nia sakrifísiu. (Ebreu 9:11, 12) Ohin loron, oinsá mak Jeová ajuda ema atu hadame malu fali ho nia? Liuhusi serbisu haklaken. (Mateus 28:19, 20) Tanba liuhusi atividade neʼe mak tinan-tinan iha ema rihun ba rihun komesa estuda Bíblia, hetan batizmu, no harii kongregasaun foun atus ba atus.

Tanba serbisu haklaken laʼo ba oin ho lalais, presiza mós atu halo livru barak liután, harii no tau matan didiʼak ba Reuniaun-Fatin, no aluga fatin ba reuniaun boot sira. Ita bele haree duni katak atu habelar Maromak nia Liafuan mak serbisu neʼebé boot no lori bensaun barak, loos ka lae?—Mateus 24:14.

Tanba domin ba Maromak, domin ba ema, no serbisu haklaken urjente tebes mak book Maromak nia povu “atu mai . . . ho prezente ida iha nia liman hodi fó ba Jeová” kontribuisaun neʼebé sira fó ho laran. Ita kontente tebes tanba bele “hahiʼi Jeová ho [ita-nia] sasán neʼebé folin-boot” no hodi haree katak sasán sira-neʼe uza ho didiʼak no matenek atu halo serbisu neʼebé boot liu hotu iha ema nia moris!—Provérbios (Amsal) 3:9.

Dalan balu atu fó kontribuisaun ba serbisu iha mundu tomak

Ema barak ohin loron “tau ketak” osan uitoan atu bele tau iha kaixa kontribuisaun ho marka “Serbisu iha Mundu Tomak”. (1 Korinto 16:2) Fulan-fulan, kongregasaun sira haruka osan sira-neʼe ba sukursál husi Testemuña ba Jeová neʼebé tau matan ba serbisu iha sira ida-idak nia rai. Ita rasik mós bele haruka kedas kontribuisaun ba sukursál husi Testemuña ba Jeová neʼebé tau matan ba Ita-nia rai. Atu hatene ho loloos organizasaun nia naran neʼebé Testemuña ba Jeová uza, favór ida, kontaktu sukursál neʼebé tau matan ba Ita-nia rai. Ita bele hetan informasaun kona-ba sukursál liuhusi internét, www.jw.org. Informasaun tuirmai mak kona-ba dalan balu neʼebé Ita bele fó kontribuisaun:

KONTRIBUISAUN NEʼEBÉ FÓ DEʼIT

Osan, kadeli, korrente, ka buat seluk tan neʼebé iha folin.
Hakerek karta hodi hatete katak osan ka sasán sira-neʼe mak kontribuisaun neʼebé Ita fó deʼit ho hakarak rasik.

ARRANJU KONA-BA HUSIK ORGANIZASAUN UZA ITA-NIA OSAN

Ita bele halo arranju ho Testemuña ba Jeová hodi sira bele uza Ita-nia osan, maibé kuandu Ita presiza osan neʼe, Ita bele hetan fali. Atu hetan informasaun liután, bele kontaktu sukursál neʼebé tau matan ba kontribuisaun sira hodi hakerek ba diresaun iha kraik.

PLANU KONA-BA FÓ KONTRIBUISAUN

Maski Ita bele fó osan ka sasán neʼebé folin nuʼudar kontribuisaun, maibé iha mós dalan seluk tan atu Ita bele fó kontribuisaun ba serbisu iha mundu tomak. Dalan sira-neʼe mak hakerek tuirmai neʼe. Antes atu fó kontribuisaun hanesan neʼe, kontaktu uluk lai ho sukursál neʼebé tau matan ba Ita-nia rai. Tanba lei kona-ba impostu la hanesan iha rai ida-idak, tan neʼe importante atu buka-hatene informasaun impostu nian antes atu fó kontribuisaun.

Asuransi: Fó kontribuisaun ba Testemuña ba Jeová atu uza Ita-nia asuransi ka Ita-nia pensaun.

Saham no obligasi: Fó kontribuisaun ba Testemuña ba Jeová atu uza Ita-nia saham no obligasi.

Uma ka rai: Ita bele fó uma ka rai neʼebé bele faʼan nuʼudar prezente ba Testemuña ba Jeová. Se Ita hakarak hela iha uma neʼe, Ita bele halo arranju atubele kontinua hela nafatin toʼo Ita mate.

Testamentu: Liuhusi surat legál neʼebé Ita asina, Ita bele fó sai Ita-nia hakarak atu fó rai, uma ka osan ba Testemuña ba Jeová bainhira Ita mate.

Atu hetan informasaun liután, Ita bele kontaktu Watchtower Bible and Tract Society of Australia liuhusi telefone ka hodi hakerek karta ba diresaun iha kraik, ka bele mós kontaktu sukursál neʼebé tau matan ba Ita-nia rai. No mós bele asesu ba sítiu jw.org no klik iha kraik kona-ba “Fó kontribuisaun ba ami-nia servisu iha mundu tomak.