Hakaʼas an atu estuda ho ema, maski ita la fiar-an
1. Tanbasá mak haklaken-naʼin balu dada an atu estuda Bíblia ho ema?
1 Dala ruma ita dada an hodi husu ema atu estuda Bíblia? Karik ita sente katak ita la iha matenek atu estuda ho sira ka lae? Maromak nia atan sira iha tempu uluk hanesan Moisés no Jeremias, mós sente katak sira la iha matenek atu kumpre sira-nia knaar. (Êx 3: 10, 11; 4: 10; Jer 1: 4-6) Sin, dala ruma ita hotu mós sente hanesan neʼe. Maski nuneʼe, saida mak bele ajuda ita atu la dada an?
2. Tanbasá mak ita la bele dada an hodi hanoin katak ita mak haklaken husi uma ba uma deʼit, maibé irmaun-irmán sira seluk bele estuda Bíblia ho ema?
2 Diʼak atu hanoin katak Jeová sei la husu ita atu halo buat ruma neʼebé ita rasik la iha kbiit atu halo. (Sal 103:14) Tan neʼe, ita bele kumpre duni ita-nia knaar atu ajuda ema seluk sai dixípulu hodi “hanorin sira”. (Mt 28:19, 20) Jeová la fó knaar espesiál neʼe ba ema neʼebé iha esperiénsia no matenek boot deʼit. (1 Kor 1: 26, 27) Entaun, la bele dada an hodi hanoin katak haʼu mak haklaken husi uma ba uma deʼit, maibé irmaun-irmán sira seluk bele estuda Bíblia ho ema.
3. Oinsá mak Jeová fó matenek mai ita hodi bele estuda Bíblia ho ema seluk?
3 Jeová mak fó matenek mai ita: Jeová mak fó matenek mai ita hodi ita bele ajuda ema seluk sai dixípulu. (2 Kor 3:5) Liuhusi ninia organizasaun nia hanorin ita kona-ba lia-loos husi Bíblia. Maski ema barak hetan edukasaun boot iha mundu neʼe, sira la hatene kona-ba lia-loos. (1 Kor 2:7, 8) Jeová fó sai iha Bíblia kona-ba dalan oioin neʼebé ita-nia Mestre Boot Jesus hanorin ema, hodi nuneʼe, ita bele banati-tuir nia. Jeová fó treinu nafatin ba ita liuhusi kongregasaun. Nia la husik ita atu buka rasik programa hodi hanorin Bíblia ba ema seluk. No mós nia fó livru hanesan Bíblia Hanorin neʼebé esplika lia-loos iha dalan neʼebé simples no fasil atu ema bele komprende. Tan neʼe, la susar atu estuda Bíblia ho ema seluk.
4. Tanbasá mak ita bele fiar katak Jeová sei ajuda ita?
4 Moisés no Jeremias bele kumpre sira-nia knaar tanba Jeová ajuda sira. (Êx 4:11, 12; Jer 1:7, 8) Ita mós bele husu Jeová atu ajuda ita. Tuir loloos, bainhira ita estuda Bíblia ho ema seluk, ita hanorin sira lia-loos kona-ba Maromak Jeová, no ida-neʼe halo nia kontente tebes. (1 Joao 3:22) Tan neʼe, halo planu atu estuda Bíblia ho ema, tanba ida-neʼe mak parte ida ba serbisu haklaken neʼebé lori ksolok boot no bensaun barak mai ita.