Ita bele sai mestre ka mestra ida!
1. Nuʼudar haklaken-naʼin Reinu nian, ita ida-idak iha knaar espesiál saida?
1 Bensaun ida neʼebé kapás tebes iha ita-nia serbisu ba Maromak mak hanorin ema seluk kona-ba lia-loos. Ita sente haksolok tebes kuandu haree ema neʼe simu liafuan Reinu nian no kuandu ajuda nia atu hakbesik ba Ukun-Naʼin neʼebé aas liu hotu. (Tgo 4:8) Ita ida-idak nuʼudar haklaken-naʼin Reinu nian hakarak duni atu buka ema neʼebé hamlaha ba lia-loos no hanorin nia atubele troka ninia hahalok no hanoin, hodi nuneʼe nia mós sei iha esperansa kapás ba futuru.—Mt 28:19, 20.
2. Tansá mak haklaken-naʼin balu hanoin katak sira la bele halaʼo estuda Bíblia ida? Saida mak bele ajuda sira?
2 Sadere ba Maromak Jeová: Iha tempu uluk, Maromak nia atan sira hanoin katak sira la iha matenek atu halaʼo sira-nia knaar neʼebé Maromak fó. Maibé hodi sadere ba Maromak Jeová, Moisés, Jeremias, Amós, no mós ema sira seluk halakon sira-nia dúvida atubele halaʼo sira-nia knaar neʼebé importante tebes. (Êx 4:10-12; Jer 1:6, 7; Amós 7:14, 15) Apostolu Paulo mós sai “aten-barani”. Oinsá? Nia hatete katak “Maromak fó aten-barani” ba nia. (1 Tes 2:2) Sin, ita hotu bele tau fiar ba Aman Jeová atu ajuda, fó matenek no forsa neʼebé ita presiza atubele hanorin ita-nia estudante Bíblia nian atu laʼo ba oin.—Isa 41:10; 1 Kor 1:26, 27; 1 Ped 4:11.
3, 4. Saida mak sei ajuda ita hanorin Maromak nia Liafuan ho matenek?
3 Simu hanorin: Liuhusi programa espirituál neʼebé ita halaʼo semana-semana, Ita-nia Mestre Boot, Maromak Jeová, hanorin ita atu sai mestre ka mestra neʼebé diʼak. (Isa 54:13; 2 Tim 3:16, 17) Simu no halo tuir buat neʼebé ita aprende sei ajuda ita atu hatene diʼak liu kona-ba Eskritura sira no aumenta ita-nia matenek atu hanorin lia-loos husi Bíblia. Maski husi Eskola Servisu Teokrátiku nian no Reuniaun Serbisu nian mak liuliu ajuda haklaken-naʼin sira atu sai mestre ka mestra neʼebé diʼak, maibé tuir loloos reuniaun hotu hanorin ita atubele hanorin ema seluk kona-ba Maromak nia Liafuan.
4 Hakaʼas an atu aprende oinsá atu hanorin lia-loos neʼebé kleʼan iha dalan neʼebé simples. Livru Sekolah Pelayanan iha pájina 227, hatete: “Atu ema bele komprende buat neʼebé Ita hanorin, ulukliu Ita mak tenke komprende didiʼak kona-ba buat neʼebé Ita sei hanorin.” Hodi fó komentáriu iha reuniaun sira mós bele ajuda ita atu rai hela informasaun neʼebé importante iha ita-nia neon hodi bele uza informasaun neʼe kuandu presiza. Entaun prepara didiʼak, hodi ida-neʼe bele aumenta Ita-nia fiar an atu hanorin ho matenek.
5. Sé deʼit iha kongregasaun laran bele ajuda ita atubele sai mestre ka mestra neʼebé diʼak liu?
5 Husi Jesus nia tempu toʼo agora, haklaken-naʼin sira aprende husi sira-nia maluk kristaun kuandu sira serbisu hamutuk atu hanorin ema seluk. (Lc 10:1) Se bele, bá hamutuk ho haklaken-naʼin neʼebé iha esperiénsia barak, hanesan pioneiru, katuas, no katuas neʼebé iha knaar atu vizita kongregasaun sira, atu halo serbisu atu hanorin Bíblia. Haree didiʼak oinsá mak sira uza dezeñu no ai-knanoik sira iha livru neʼebé ita uza atu hanorin lia-loos husi Bíblia. Husu sira atu fó-hatene mai Ita kona-ba oinsá mak Ita bele sai mestre ka mestra neʼebé diʼak liu. (Prov 1:5; 27:17) Hafolin hanorin neʼebé Ita simu husi Ita-nia irmaun-irmán sira, tanba, tuir loloos, hanorin neʼe mai husi Maromak.—2 Kor 3:5.
6. Buat importante saida mak ita presiza halo atu sai mestre ka mestra atu hanorin Maromak nia Liafuan?
6 Sadere ba Maromak Jeová no simu hanorin neʼebé nia fó mai ita. Husu Maromak atu ajuda Ita atu laʼo ba oin. (Sal 25:4, 5) Ita mós bele hetan laran-ksolok kuandu ajuda ema seluk atu sai hanesan Ita, nuʼudar mestre ka mestra ida atu hanorin Maromak nia Liafuan!