Karta husi Grupu Administradór
Irmaun-irmán doben sira:
Ita-nia Aman Jeová iha lalehan mak Maromak domin nian. Bíblia hatete: “Maromak mak domin.” (1 Joao 4:8) Maibé Bíblia la dehan katak “Maromak mak forsa” maski Jeová mak iha títulu Maromak Forsa Boot Liu Hotu tanba Jeová sempre halaʼo ninia ukun ho domin. Ida-neʼe book ita atu hakbesik ba Jeová!
Ita kontente tanba Jeová laʼós hanesan ditadór neʼebé obriga ita atu serbí nia. Jeová hakarak ita atu serbí nia husi laran ho domin. Kuandu ita halo ida-neʼe, ita hatudu katak ita hakarak Jeová mak ukun ita tanba ita fiar katak nia halaʼo ninia ukun iha dalan neʼebé loos no ho domin. Husi uluk kedas Maromak ukun ona iha dalan hanesan neʼe.
Duké obriga Adão ho Eva atu halo tuir Jeová, maibé Jeová fó oportunidade ba sira atu halo desizaun rasik. Se karik sira hadomi Maromak Jeová ho laran no hafolin buat neʼebé nia halo ona ba sira, sira bele tahan hasoru Satanás nia babeur no sei la kontra hasoru nia.
Foin antes Moisés mate, nia hatete ba nasaun Israel: “Iha loron neʼe, haʼu tau iha ó-nia oin moris no diʼak, no mate no aat.” (Deut 30:15) Povu Israel iha liberdade atu deside rasik oinsá sira hakarak atu halaʼo sira-nia moris. Josué mós hatete ba ema Israel sira: “Se serbí Jeová mak la diʼak iha imi-nia matan, agora hili ba imi-nia an rasik sé mak imi sei serbí.” Povu sira hatán fali ba Josué: “Ba ami, ami sei nunka hanoin atu husik Jeová.” (Jos 24:15, 16) Nuneʼe mós ho ita ohin loron. Tanba ita hadomi Jeová, ita “sei nunka hanoin” atu husik nia.
Nuʼudar ema kristaun neʼebé loos, ita komprende ho klaru kona-ba ita-nia liberdade atu foti desizaun neʼe katak sá. Porezemplu, maski katuas kristaun sira iha knaar atu fó konsellu no dala ruma fó dixiplina ba ita, maibé sira la buka atu domina ka kontrola ita-nia moris no ita-nia fiar. Apóstolu Paulo hatete ba maluk kristaun sira: “La’ós atu hatodan imi-nia fiar, maibé ami serbisu ba imi-nia ksolok; basá imi-nia fiar metin ona.”—2 Kor 1:24.
Kuandu ita halo buat ruma ho ita-nia hakarak rasik, ita sei sente kontente liu duké kuandu ema seluk mak obriga ita atu halo buat ruma! Maromak Jeová konvida ita atu halo buat neʼebé diʼak tanba ita hadomi nia. Loos duni, domin mak importante tebes, tanba Paulo mós dehan: “Haʼu fahe karik sasán hotu neʼebé haʼu iha, no saran haʼu-nia isin-lolon atu haʼu bele gaba an, maibé la iha domin, haʼu la manán buat ida.”—1 Kor 13:3.
Ita sente kontente hodi haree ita-nia maluk kristaun rihun ba rihun neʼebé serbí Jeová ho laran tan domin, tanba ida-neʼe lori hahiʼi ba Jeová no halo nia haksolok!
Jeová hadomi tebes ninia atan hotu neʼebé halo nia haksolok, inklui imi labarik no joven neʼebé hatudu katak imi hadomi Jeová duké mundu no buat neʼebé imi bele hetan husi mundu neʼe. Ami hakarak imi atu la haluha katak ami mós hadomi tebes imi.—Lc 12:42, 43.
Tanba domin ba Jeová, irmaun, irmán no joven sira iha mundu tomak hamutuk naʼin-7.782.346 uza oras 1.748.697.447 iha tinan kotuk liubá atu halaʼo serbisu haklaken. Ita mós kontente tanba ema naʼin-268.777 mak hetan batizmu hodi hatudu katak sira dedika ona sira-nia an ba Jeová. Ida-neʼe katak maizumenus ema naʼin-5.168 mak hetan batizmu kada semana. Ida-neʼe kona loos ita hotu nia laran!
Iha loron ikus sira-neʼe, ita nuʼudar Maromak nia povu tahan hasoru problema barak, hanesan moras, sai ferik-katuas, no ema fó-terus ita tanba ita-nia fiar. Maibé, ita hotu hakarak atu la “dada an” no la “lakon aten-brani”. Ami hakarak uza oportunidade neʼe atu haruka ami-nia domin boot ba imi.—Ebr 10:39; 2 Kor 4:16.
Imi-nia irmaun sira,
Grupu Administradór husi Testemuña ba Jeová