Fó benvindu ba sira!
1. Reuniaun saida mak fó oportunidade kapás mai ita atu fó sasin? Tanbasá?
1 Loron atu komemora Memoriál fó oportunidade kapás mai ita atu fó sasin ba ema seluk. Hanoin toʼok kona-ba ida-neʼe: Iha tinan neʼe, karik ema naʼin-10.000.000 liu neʼebé seidauk Testemuña ba Jeová sei tuir Memoriál hodi rona kona-ba oinsá Maromak Jeová no Jesus hatudu domin boot ba ema hotu. (Joao 3:16; 15:13) Sira sei aprende kona-ba bensaun sira neʼebé sira bele hetan tanba Jeová nia prezente neʼe. (Isa 65:21-23) Maibé iha tempu neʼe, laʼós irmaun neʼebé sei hatoʼo diskursu deʼit mak iha knaar atu fó sasin. Ita hotu neʼebé tuir Memoriál sei iha oportunidade atu fó sasin hodi simu ho laran-diʼak sira neʼebé mai tuir reuniaun espesiál neʼe.—Rom 15:7.
2. Oinsá mak ita bele simu ho laran-diʼak ema foun sira neʼebé mai tuir Memoriál?
2 Duké buka deʼit tuur-fatin no hein toʼo reuniaun hahú, diʼak liu uza tempu neʼe atu fó koñese ita-nia an ba ema foun sira. Tanba ema barak sei tuir ita-nia reuniaun neʼe ba dala primeiru, karik sira sente moe uitoan. Entaun, hodi hatudu oin-midar no kumprimenta sira ho laran-diʼak, neʼe sei halo sira sente kmaan. Atu hatene se ema ida tuir Memoriál tanba simu konvite, karik ita bele husu se ida-neʼe mak dala primeiru neʼebé nia tuir ita-nia reuniaun ka se nia koñese ema ruma iha kongregasaun. Ita bele konvida nia atu tuur hamutuk ho ita, nuneʼe bele uza ita-nia Bíblia no livru knananuk hamutuk ho nia. Se ita uza Reuniaun-Fatin atu halaʼo Memoriál, karik ita bele hatudu no esplika ba nia buat balu kona-ba ita-nia Reuniaun-Fatin. Kuandu reuniaun Memoriál hotu tiha, ita mós bele fó-hatene katak ita prontu atu hatán ninia pergunta ruma. Se ita-nia kongregasaun tenke sai lalais tanba kongregasaun seluk sei uza fali Reuniaun-Fatin, ita bele hatete: “Haʼu hakarak rona Ita-nia hanoin kona-ba reuniaun neʼe, oinsá mak haʼu bele kontaktu Ita?” Tuirmai, halo planu atu vizita nia iha loron seluk. Katuas kongregasaun sira hakarak fó laran-manas liuliu ba haklaken-naʼin sira neʼebé la haklaken ona neʼebé tuir Memoriál.
3. Tanbasá mak importante atu simu ho laran-diʼak sira neʼebé mai tuir Memoriál?
3 Ba ema barak neʼebé sei tuir Memoriál, karik neʼe mak dala primeiru neʼebé sira sei haree haksolok, dame no unidade neʼebé ita iha nuʼudar Jeová nia povu. (Sal 29:11; Isa 11:6-9; 65:13, 14) Saida mak ema foun sira sei hanoin-hetan depois tuir Memoriál? Ida-neʼe depende ba dalan neʼebé ita sei simu no ajuda sira.