Aumenta ita-nia matenek iha serbisu haklaken—Kuandu ema hapara ita-nia koʼalia

Tanbasá importante: Hanoin toʼok se ita hatene katak dezastre boot ida atu akontese. Se ema la halai atu buka mahon, sira sei mate. Ita bá viziñu nia uma atu fó avizu ba nia, maibé nia hapara ita koʼalia hodi dehan katak nia okupadu hela. Klaru katak ita sei la rende an lalais hodi la koko nafatin atu ajuda nia, loos ka lae? Iha ita-nia serbisu haklaken, ema barak lakohi simu ita tanba sira la hatene katak Bíblia nia mensajen bele fó moris rohan-laek ba sira. Iha tempu neʼebé ita vizita sira, karik sira okupadu hela. (Mateus 24:37-39) Ka karik sira rona buat oioin neʼebé ema koʼalia kona-ba ita no tan neʼe mak sira lakohi simu. (Mateus 11:18, 19) Karik sira hanoin katak ita hanesan deʼit ho relijiaun sira seluk neʼebé hatudu hahalok la diʼak. (2 Pedro 2:1, 2) Maibé se uma-naʼin dehan katak nia la interese, ita la bele lalais deʼit atu rende an.

Oinsá atu halo ida-neʼe:

• Antes atu bá haklaken, hanoin kona-ba saida mak uma-naʼin bele hatete neʼebé bele hapara ita-nia koʼalia, depois hanoin kona-ba oinsá ita bele hatán.

• Se uma-naʼin hatete buat ruma neʼebé atu hapara ita-nia koʼalia, koko toʼok kontinua koʼalia ba nia ho laran-maus. Karik ita bele halo nuneʼe hodi gaba nia. Porezemplu, se nia hatete katak nia iha ona relijiaun, karik ita bele hatán hodi dehan: “Neʼe diʼak tanba haʼu hakarak koʼalia ho ema neʼebé gosta Maromak.” Dala ruma, kuandu ita hatudu katak ita komprende uma-naʼin nia sentimentu ka situasaun, neʼe bele ajuda ita atu kontinua koʼalia ho nia. Porezemplu, se uma-naʼin hatete katak nia okupadu, karik ita bele hatete: “Haʼu hatene. Maibé antes haʼu bá, haʼu hakarak fó deʼit ida-neʼe ba Ita.” Se uma-naʼin dehan katak nia la interese, karik ita bele husu pergunta ba nia, hanesan: “Ita-boot la interese ba Bíblia, ka la interese ba relijiaun?”

• Haree didiʼak situasaun. La haluha katak Jeová la obriga ema atu rona. (Deuteronômio [Ulangan] 30:19) Ema ida-idak tenke lori nia responsabilidade rasik iha Jeová nia oin. (Galásia 6:5) Se uma-naʼin lakohi nafatin, diʼak atu sai husi ninia uma. Se ita hatudu respeitu ba ninia sentimentu, karik ita bele loke dalan ba haklaken-naʼin seluk atu fó sasin ba nia iha futuru.—1 Pedro 3:15.

Koko ida-neʼe durante fulan neʼe:

• Se ema foin hapara ita-nia koʼalia, kuandu sai husi ninia uma, koʼalia ho ita-nia pár kona-ba dalan saida mak diʼak atu hatán ba nia.