Ajuda uma-naʼin atu iha hanoin neʼebé loos
1. Dalan saida mak diʼak liu atu koʼalia ba uma-naʼin?
1 Kuandu haklaken, oinsá mak ita koʼalia ba uma-naʼin? Ita koʼalia hodi kritika nia, ka ita koʼalia hodi ajuda nia atu komprende no iha hanoin neʼebé loos? Kuandu apóstolu Paulo koʼalia ba ema judeu iha Tesalónika, nia ajuda sira atu iha hanoin neʼebé loos. Rezultadu mak ema barak iha neʼebá “hamtaʼuk Naʼi”. (Apos 17:2-4, MF) Ajuda uma-naʼin atu iha hanoin neʼebé loos envolve saida?
2. Oinsá mak ita bele banati-tuir Paulo kuandu ita haklaken lia-foun diʼak?
2 Hanoin uma-naʼin nia sentimentu no fiar: Atu ajuda uma-naʼin iha hanoin neʼebé loos, diʼak atu ita hanoin kona-ba sira-nia sentimentu. Kuandu Paulo koʼalia ba ema Gregu iha Areópago, nia hahú ho buat neʼebé sira hatene no fiar. (Apos 17:22-31) Entaun, kuandu prepara buat neʼebé ita atu koʼalia, hanoin toʼok kona-ba ema sira-nia hanoin no fiar iha ita-nia haklaken-fatin. (1 Kor 9:19-22) Se uma-naʼin hanetik ita-nia koʼalia, koko atu koʼalia kona-ba buat neʼebé uma-naʼin mós fiar hodi bele kontinua koʼalia ho nia.
3. Oinsá mak ita bele uza pergunta sira ho matenek hodi ajuda uma-naʼin?
3 Uza pergunta sira ho matenek: Ita la bele hatudu dalan ba ema ida atu nia toʼo ba fatin ida se ita rasik la hatene ema neʼe iha neʼebé. Nuneʼe mós, ita la bele ajuda uma-naʼin atu iha hanoin neʼebé loos se ita la hatene saida mak nia fiar. Antes Jesus ajuda ema atu iha hanoin neʼebé loos, nia sempre husu pergunta sira atu hatene saida mak iha ema nia hanoin. Porezemplu, kuandu ema ida husu Jesus: “Haʼu sei halo sá atu hetan moris rohan-laek?” Jesus husu fali saida mak ema neʼe nia hanoin antes nia fó resposta. (Lc 10:25-28) Iha tempu seluk, kuandu Pedro fó resposta neʼebé sala, Jesus ho matenek uza pergunta sira atu hadiʼa Pedro nia hanoin. (Mt 17:24-26) Nuneʼe mós ho ita, se uma-naʼin husu pergunta ka fó sai hanoin neʼebé sala, ita bele uza pergunta sira atu ajuda nia atu iha hanoin neʼebé loos.
4. Tansá mak ita hakaʼas an ajuda uma-naʼin atu iha hanoin neʼebé loos?
4 Kuandu ita ajuda uma-naʼin atu iha hanoin neʼebé loos, ita banati-tuir Jesus nuʼudar Mestre Boot, no mós ema kristaun iha apóstolu sira-nia tempu. Hodi nuneʼe, ita hatudu katak ita respeita uma-naʼin. (1 Ped 3:15) Rezultadu diʼak mak karik nia hakarak atu ita vizita fali nia.