Aumenta ita-nia matenek iha serbisu haklaken—Fahe livru Bíblia Hanorin

Tanbasá importante: Livru Bíblia Hanorin mak livru neʼebé importante tebes husi ita-nia pasta haklaken nian. Maibé, antes atu bele uza livru neʼe hodi estuda ho ema, ita presiza fahe uluk livru neʼe ba nia. Tan neʼe mak ita ida-idak tenke aumenta ita-nia matenek oinsá atu fahe livru neʼe iha ita-nia serbisu haklaken. (Provérbios [Amsal] 22:29) Iha sujestaun oioin atu fahe livru neʼe, no haklaken-naʼin ida-idak tenkesér hili sujestaun neʼebé mak nia sente katak diʼak ba nia naʼin rasik atu uza.

Oinsá atu halo ida-neʼe:

Hanoin didiʼak pergunta ida neʼebé liga ho kapítulu husi livru Bíblia Hanorin, depois husu ba uma-naʼin. Bainhira atu hahú kapítulu ida-idak, iha pergunta balu, karik ita bele uza pergunta ida husi pergunta sira-neʼe. Kuandu uma-naʼin hatán tiha pergunta neʼe, lee eskritura ida ba nia no tuirmai loke ba parágrafu neʼebé koʼalia kona-ba pergunta neʼe no karik bele koʼalia uitoan ho nia kona-ba parágrafu neʼe.
Sujestaun seluk mak ita bele uza informasaun sira husi pájina 3 toʼo 7 atu dada uma-naʼin nia atensaun no tuirmai loke ba kapítulu neʼebé koʼalia kona-ba informasaun sira-neʼe. Porezemplu, karik ita bele koʼalia kona-ba dezastre neʼebé foin akontese daudauk no esplika katak ema barak mós hakarak hatene resposta ba pergunta sira iha pájina 3. Ka ita bele koʼalia dehan ohin ita mai atu fahe esperansa kona-ba futuru, no depois loke ba dezeñu sira iha pájina 4-5, tuirmai husu, “Husi Bíblia nia promesa sira-neʼe, ida neʼebé mak Ita gosta atu haree iha futuru?” Dalan seluk mak karik ita bele hatete katak ita vizita ema atu ajuda ema buka resposta ba sira-nia pergunta sira. Tuirmai loke ba pergunta sira iha pájina 6, no husu ba nia pergunta ida neʼebé mak nia hakarak atu husu.
Husu kedas atu estuda Bíblia ho uma-naʼin. Karik ita bele hatete: “Ami hatudu daudauk oinsá atu estuda Bíblia ho ema liuhusi livru neʼe. Uluk Ita haree ona livru neʼe ka lae? [Hein ba resposta.] Se Ita iha tempu uitoan, haʼu hakarak atu hatudu ba Ita oinsá bele uza livru neʼe hodi estuda ho Ita-nia Bíblia rasik.”

Koko ida-neʼe durante fulan neʼe:

Iha tempu adorasaun família nian, pratika toʼok oinsá atu halo tuir sujestaun sira iha leten.
Bainhira bá haklaken, fahe buat neʼebé ita planu atu koʼalia ho haklaken-naʼin seluk. (Provérbios [Amsal] 27:17) Se dalan neʼebé ita uza la fó rezultadu diʼak, uza fali dalan seluk.