Uza broxura Liafuan Diʼak hodi hanorin
1. Broxura Liafuan Diʼak halo iha dalan oinsá?
1 Hanesan iha Ita-nia Serbisu Kristaun fulan Jullu hatete katak ekipamentu importante ida husi ita-nia pasta hanorin mak broxura Liafuan Diʼak Husi Maromak! Broxura neʼe iha eskritura barak mak la hakerek sai liafuan sira, neʼe hodi uma-naʼin bele haree rasik no aprende husi Bíblia. Livru barak neʼebé ita halo, uma-naʼin bele lee no aprende rasik deʼit, maibé ho broxura neʼe tenke haklaken-naʼin ida mak bele hanorin uma-naʼin neʼe. Tan neʼe mak bainhira ita fahe ba ema, ita tenke hatudu ba sira oinsá atu estuda broxura neʼe hodi nia bele aprende liafuan diʼak sira husi Bíblia.—Mateus 13:44.
2. Oinsá mak ita bele uza broxura Liafuan Diʼak bainhira ita foin hasoru ema?
2 Foin hasoru dala primeiru: Karik ita bele hatete: “Ohin loron ema hanoin barak kona-ba mundu nia futuru. Tuir Ita-nia hanoin, iha futuru, mundu neʼe sei sai diʼak liu ka aat liu? [Hein ba resposta.] Tuir loloos, Bíblia hakerek kona-ba esperansa saida mak Maromak sei lori ba ita. Iha broxura neʼe ita bele haree Bíblia nia resposta ba ema nia pergunta sira.” Fó broxura ida ba uma-naʼin no husu nia atu hili pergunta ida husi broxura nia kotuk. Tuirmai, uza parágrafu primeiru husi lisaun neʼebé nia hili hodi hatudu ba nia oinsá mak ita bele estuda broxura neʼe. Se lae, ita bele uza dalan seluk, hanesan husu pergunta ida husi lisaun laran neʼebé ita prepara diʼak tiha ona, no tuirmai hatudu ba nia oinsá mak hodi uza broxura neʼe bele ajuda nia buka resposta ba pergunta balu husi Bíblia. Se iha vídeo ruma husi jw.org neʼebé ajuda atu esplika lisaun neʼe, bele loke no hatudu ba uma-naʼin.
3. Esplika oinsá mak ita bele uza broxura Liafuan Diʼak atu halaʼo estuda ho ema.
3 Oinsá atu halaʼo estuda: (1) Lee uluk pergunta ho letra metan sira atu ajuda uma-naʼin fó atensaun ba pontu importante. (2) Lee parágrafu neʼebé tuir pergunta. (3) Lee eskritura sira neʼebé hakerek ho letra haliʼis, no husu pergunta iha dalan neʼebé bele ajuda uma-naʼin atu haree oinsá mak eskritura neʼe fó resposta ba pergunta neʼebé hakerek ho letra metan. Se iha vídeo ruma neʼebé ajuda atu esplika pergunta neʼe, maibé ita seidauk hatudu ba uma-naʼin, diʼak atu loke ba nia. (4) Kuandu pergunta sira ho letra metan mak iha tan parágrafu rua ka liu, koʼalia tiha parágrafu primeiru, uza hakat 2 no 3 ba parágrafu restu sira. (5) Hotu tiha, husu fali uma-naʼin hatán fali pergunta ho letra metan sira hodi haree toʼok nia komprende ona ka seidauk.
4. Saida mak bele ajuda ita atu uza ekipamentu kapás neʼe ho diʼak?
4 Hatene didiʼak uluk ita-nia broxura kapás neʼe no aproveita oportunidade neʼebé diʼak atu uza. Antes atu bá estuda, hanoin uluk kona-ba ita-nia estudante nia situasaun no oinsá mak ita bele esplika didiʼak eskritura sira atu nia bele komprende. (Provérbios [Amsal] 15:28; Apóstolu 17:2, 3) Se ita mak uza beibeik no iha matenek atu uza broxura neʼe, karik ita sei haree katak ekipamentu neʼe mak diʼak tebes atu hanorin lia-loos ba ema!