Fahe livru kontente nuʼudar família ba ema hotu
Joven mane ida ho tinan 11 husi Kalifórnia iha Estadus Unidus, nia simu livru Halaʼo Moris Kontente nuʼudar Família, depois hakerek karta atu fó-agradese, dehan: “Haʼu agradese tebes ba livru kapás neʼe, no haʼu mós fó laran-manas ba família seluk atu lee livru neʼe. Livru ida-neʼe . . . ajuda haʼu-nia família atu moris ho dame no haksolok iha uma-laran.” Joven neʼe nia liafuan fó laran-manas mai ita atu fahe livru Kontente nuʼudar Família ba ema hotu, ho idade kiʼik toʼo boot. Iha fulan-Novembru, ita bele fahe livru neʼe hodi uza ezemplu tuirmai neʼe.
Kuandu hasoru ema neʼebé sei joven, ita bele hatete: “Joven barak hanesan Ita hanoin kona-ba atu kaben. Maibé oinsá mak ita bele hetan matadalan diʼak kona-ba neʼe? [Hein ba resposta.] Bíblia fó matadalan ba ita atu prepara didiʼak ba moris kaben nian. [Lee 2 Timoteo 3:16.] Porezemplu, joven barak laran-rua hodi hanoin katak sira seidauk prontu atu kaben. Haree toʼok saida mak livru neʼe hatete kona-ba neʼe.” Loke pájina 14 iha livru Kontente nuʼudar Família, no lee parágrafu 3. Tuirmai, hatudu subtítulu sira iha kapítulu 2. Fó livru neʼe no halo arranju atu halo vizita fali.
Kuandu koʼalia ho inan-aman, ita bele hatete: “Ami fahe informasaun diʼak ba inan-aman sira kona-ba oinsá atu haboot oan sira. Livru ida-neʼe iha informasaun barak kona-ba neʼe.” Loke pájina 55. Lee parágrafu 10 hotu no parágrafu 11 parte primeiru toʼo Deuteronômio 6:6, 7. Tuirmai, hatudu pontu balu neʼebé hakerek ho letra haliʼis iha parágrafu 12 toʼo 16. Depois hatete: “Livru ida-neʼe ajuda ona ema barak atu sai inan-aman neʼebé diʼak. Se Ita hakarak lee livru neʼe, ami kontente atu fó ba Ita.”
Ba ferik-katuas, ita bele hatete: “Ami fahe liafuan diʼak husi Bíblia. Haree toʼok, liafuan neʼe kona ita hotu, loos ka lae? [Lee 2 Timoteo 3:16. Depois hein ba resposta.] Haʼu sei lee liafuan badak husi livru neʼe, depois ami hakarak husu Ita-nia opiniaun.” Loke pájina 169 no lee fraze primeiru no segundu husi parágrafu 17. Tuirmai, husu opiniaun kona-ba neʼe. Hatudu informasaun balu tan husi livru neʼe, depois fó ba nia.
Kuandu ita vizita fali ba sira neʼebé simu livru Kontente nuʼudar Família, koko atu komesa estudu Bíblia. Ita bele hahú estudu husi kapítulu 14 iha livru Bíblia Hanorin. Entaun, mai ita hakaʼas an atu ajuda ema hotu atu halaʼo moris kontente nuʼudar família kristaun.