Aumenta ita-nia matenek iha serbisu haklaken—Hatudu ezemplu oinsá atu estuda, hodi uza livru Bíblia Hanorin

Tanbasá importante: Bainhira ita husu ema atu estuda Bíblia ho ita, karik ema balu hanoin sira presiza tama klase ida ka tuir kursu ruma. Duké husu, koko hatudu ba sira oinsá mak ita estuda Bíblia ho ema. Uza deʼit minutu balu, ita bele hatudu ba sira katak estuda Bíblia mak laʼós buat susar ida, no bele aprende buat barak.

Oinsá atu halo ida-neʼe:

• Fó koñese tiha ita-nia an ba nia, husu uma-naʼin se nia iha pergunta ruma kona-ba futuru.

• Fó-hatene ba nia katak ema seluk mós husu pergunta hanesan ninian, depois, hatudu lista husi livru Bíblia Hanorin ba nia. Esplika ba nia katak lisaun sira husi livru neʼe bele ajuda ema komprende lalais buat saida mak Bíblia hanorin kona-ba futuru no tópiku seluk tan. Tuirmai, husu kapítulu neʼebé mak nia gosta liu atu koʼalia hamutuk.

• Fó livru neʼe ida ba nia no ajuda nia loke ba kapítulu neʼebé nia hili. Loke tiha, esplika katak pergunta sira iha títulu nia okos bele hetan resposta iha parágrafu sira tuirmai.

• Husu uma-naʼin lee parágrafu primeiru, se nia hakarak. Tuirmai lee pergunta iha okos no koʼalia kona-ba resposta ba parágrafu neʼe hamutuk. Loke no koʼalia kona-ba eskritura neʼebé liga ba resposta neʼe. Hatudu ba nia oinsá mak ita marka resposta neʼe iha ita rasik nia livru.

• Lee parágrafu tuirmai. Maibé, agora husu uma-naʼin mak hatán pergunta ho ninia liafuan rasik.

• Fó laran-manas ba nia no arranja atu mai fali loron seluk hodi koʼalia hotu kapítulu neʼe.

• Se ida-neʼe mak tempu diʼak ba nia, hatudu vídeo kona-ba Oinsá mak ami halaʼo estudu Bíblia ho ema? husi sítiu jw.org.

Koko ida-neʼe durante fulan neʼe:

• Halo orasaun ba Jeová hodi husu nia fó bensaun ba ita-nia hakaʼas an hodi hahú estuda Bíblia ho ema.—Filipe 2:13.

• Hatudu ba ema, pelumenus dala ida, oinsá atu estuda Bíblia hodi uza livru Bíblia Hanorin, ka hatudu vídeo Oinsá mak ami halaʼo estudu Bíblia ho ema? bainhira bá haklaken.