Série regulár foun neʼebé bele uza atu komesa estudu Bíblia
1. Livru Haklaken ba públiku sei iha série regulár foun saida? Série regulár foun neʼe uza atu halo saida?
1 Komesa fulan oinmai, Livru Haklaken ba públiku sei iha série regulár foun neʼebé bele ajuda ita atu komesa estudu Bíblia. Série regulár foun neʼe ho títulu: “Aprende husi Maromak nia Liafuan.” Karik ema balu iha ita-nia haklaken-fatin sei gosta atu lee série regulár foun neʼe. Maski nuneʼe, série regulár foun sira-neʼe halo hodi ita bele uza atu koʼalia hamutuk ho uma-naʼin.
2. Série regulár foun neʼe inklui saida deʼit?
2 Inklui saida deʼit: Títulu no subtítulu sira mak pergunta neʼebé ita bele uza atu husu ba uma-naʼin kuandu koʼalia hamutuk. Maski hakerek eskritura sira neʼebé importante, maibé la hakerek liafuan husi eskritura sira-neʼe iha parágrafu. Hanesan neʼe, uma-naʼin bele lee kedas husi Maromak nia Liafuan. Parágrafu sira badak deʼit hodi haklaken-naʼin bele koʼalia kona-ba informasaun iha parágrafu ida ka rua hamutuk ho uma-naʼin iha odamatan. Série regulár foun ida-idak iha gambar neʼebé hatudu livru Bíblia Hanorin. Ita bele uza ida-neʼe atu komesa estuda ho uma-naʼin se nia interese.
3. Kuandu haklaken uma ba uma, oinsá mak ita bele uza série regulár foun atu komesa estuda Bíblia iha odamatan?
3 Oinsá atu uza: Kuandu fahe livru fulan-fulan ba uma-naʼin Ita bele husu pergunta ida husi Aprende husi Maromak nia Liafuan, neʼebé Ita hanoin uma-naʼin sei hakarak hatene. Porezemplu, Livru Haklaken 1 Janeiru, koʼalia kona-ba tansá mak Bíblia importante. Karik Ita bele husu: “Ita haree Bíblia nuʼudar Maromak nia Liafuan ka livru ida neʼebé diʼak deʼit? [Hein ba resposta.] Haʼu iha informasaun diʼak kona-ba neʼe.” Lee pergunta primeiru ba uma-naʼin, no lee parágrafu, depois lee eskritura husi Bíblia. Lee fali pergunta no husu uma-naʼin nia hanoin. Se uma-naʼin gosta, Ita bele kontinua hodi koʼalia hamutuk kona-ba pergunta númeru rua. Antes husik uma-naʼin, hatudu pergunta tuirmai no halo planu atu vizita fali hodi koʼalia hamutuk kona-ba pergunta neʼe. Hakaʼas an atu vizita fali semana-semana hodi koʼalia hamutuk pergunta sira iha série regulár foun neʼe toʼo Livru Haklaken foun mai. Dalan seluk mak hodi konvida kedas uma-naʼin atu estuda Bíblia, no depois uza Aprende husi Maromak nia Liafuan atu hatudu oinsá halaʼo estudu.
4. Oinsá mak ita bele uza série regulár foun sira kuandu ita vizita fali ema?
4 Diʼak mós atu uza série regulár foun neʼe ba Ita-nia vizita fali seluk no sira neʼebé Ita vizita kada fulan atu fahe livru fulan-fulan. Ita bele hatete: “Iha buat foun iha Livru Haklaken. Haʼu hakarak hatudu oinsá atu uza ida-neʼe.” Ami harohan hodi husu katak série regulár foun neʼe sei ajuda ema barak liután atu “simu matenek kona-ba lia-loos”.—1 Tim 2:4.