Ita uza didiʼak ka lae?
1 “Haʼu hakarak duni uza ida-neʼe atu haklaken!” Ida-neʼe mak buat neʼebé irmán ida hakerek depois nia lee Menara Pengawal 1 Januari 2008. Ita lee tiha ona artigu sira neʼebé mosu fulan-fulan, ka kada fulan rua ka tolu iha Menara Pengawal públiku nian ka lae? Ita buka dalan ona atu hatudu artigu sira-neʼe ba ema iha serbisu haklaken ka lae?
2 “Apa yang Yesus Ajarkan”: Karik, artigu ida-neʼe ajuda ona Ita atu komesa estudu Bíblia. Diʼak atu lee títulu husi artigu neʼe ba uma-naʼin no depois neʼe hatudu saida mak Jesus hatete kona-ba tópiku neʼe iha parágrafu primeiru. Bainhira ema hatudu interese, bele kontinua atu koʼalia hodi uza títulu kiʼik neʼebé metan, nuʼudar pergunta sira atu halo ema hanoin. Husu sira-nia hanoin kona-ba pergunta neʼe. Uza tempu uitoan atu hatudu dezeñu neʼebé liga ho parágrafu neʼe, no hakat ba parágrafu tuirmai. Karik, Ita bele koʼalia kona-ba parte primeiru husi artigu neʼe, no bainhira Ita vizita fali Ita bele koʼalia kona-ba parte segundu. Diʼak se prontu atu kontinua estudu hodi uza livru Bíblia Hanorin.
3 “Kunci Kebahagiaan Keluarga”: Artigu neʼe, neʼebé mosu fulan tolu dala ida, sei ajuda laʼen, feen, no inan-aman atu hatene oinsá mak sira bele halo tuir matadalan husi Bíblia bainhira hasoru problema neʼebé bele halakon dame iha família laran. Ita mós bele uza artigu sira-neʼe atu ajuda ema neʼebé laʼós Testemuña atu hafolin matenek husi Bíblia.—2 Tim 3:16, 17.
4 Artigu ba joven sira: Artigu ho tema “Untuk Kaum Muda” fó oportunidade ba ema atu hanoin kona-ba istória husi Bíblia. Ita bele uza artigu sira-neʼe atu ajuda ema klosan, neʼebé Ita hasoru iha haklaken, atu hatene katak estuda Maromak nia Liafuan iha folin boot bainhira halo tuir iha sira-nia moris. (Sal 119:9, 105) Bainhira koʼalia ho inan-aman sira, Ita bele hatudu artigu ho tema “Ajarkan Anak-Anak Anda”, neʼebé mosu fulan rua dala ida. Artigu sira-neʼe bele ajuda labarik kiʼikoan atu aprende lisaun importante husi ema iha Bíblia laran. Ita lee tiha ona artigu sira-neʼe ho Ita-nia oan sira ka lae?
5 Artigu seluk: Fulan-fulan, artigu ho tema “Pembaca Bertanya” koʼalia kona-ba pergunta ida neʼebé baibain ema laʼós Testemuña mak husu. Ita bele hatudu artigu ida-neʼe bainhira ita fahe livru fulan-fulan husi uma ba uma. Artigu ho tema “Karta husi . . .” konta esperiénsia balu husi misionáriu no haklaken-naʼin seluk hodi hatudu saida mak sira hasoru bainhira halaʼo serbisu haklaken. Artigu sira-neʼe ajuda ema neʼebé hatudu interese atu hatene katak lia-foun diʼak neʼe haklaken iha mundu tomak, nuʼudar sinál kona-ba Jesus nia hiʼit an mai no ukun.—Mt 24:3, 14.
6 Fulan-fulan iha artigu ho tema “Mendekatlah Kepada Allah”, neʼebé foti husi programa atu lee Bíblia ba Eskola Servisu Teokrátiku. Artigu neʼe bele book ema neʼebé laran-moos atu hakarak aprende liután kona-ba Maromak Jeová. Artigu ho tema “Tirulah Iman Mereka”, neʼebé mosu tinan ida dala haat, ajuda lee-naʼin atu haree istória husi Bíblia iha sira-nia neon, hodi ajuda sira atu koñese didiʼak ema sira neʼebé iha Bíblia laran, hanesan buat neʼebé sira hili, hasoru, no fiar.
7 Ita haksolok tebes atu hetan Menara Pengawal fulan-fulan neʼebé kompletu atu uza iha haklaken! Mai ita hakaʼas an atu hatene didiʼak artigu hotu neʼebé iha livru laran no uza didiʼak iha ita-nia serbisu haklaken.