Série neʼebé ajuda ita-nia haklaken
1. Série “Koʼalia hamutuk kona-ba Bíblia” iha objetivu rua saida?
1 Dala ruma Livru Haklaken edisaun públiku iha série “Koʼalia hamutuk kona-ba Bíblia”. Informasaun neʼe iha objetivu rua. Primeiru mak atu ajuda lee-naʼin sira hodi hatene lia-loos husi Bíblia. Segundu mak atu hatudu mai ita oinsá ita bele koʼalia ho matenek kona-ba tópiku ruma. (1 Pedro 3:15) Oinsá mak ita bele uza ho didiʼak informasaun sira-neʼe?
2. Oinsá mak ita bele uza série neʼe iha haklaken?
2 Iha haklaken: Ita bele rai Livru Haklaken balu neʼebé fó sai série neʼe. Depois, kuandu ema neʼebé ita haklaken ka estudante Bíblia mak husu pergunta neʼebé hanesan, ita bele fó livru neʼe ba nia no koʼalia hamutuk. Se ita la iha livru neʼe, ita bele download informasaun neʼe husi jw.org/tdt.
3. Oinsá mak ita bele koʼalia hamutuk ho uma-naʼin kona-ba informasaun neʼe?
3 Oinsá mak ita bele koʼalia hamutuk kona-ba informasaun neʼe? Haklaken-naʼin balu husu uma-naʼin ka estudante atu lee iha parte uma-naʼin nian no sira rasik lee parte Testemuña nian. Sira hatete katak lee hamutuk hanesan neʼe diʼak tebes tanba ida-neʼe bele ajuda ema atu hatene ita-nia fiar iha dalan neʼebé la halo sira sente an.—Deuteronômio (Ulangan) 32:2.
4. Oinsá mak ita bele uza informasaun neʼe atu treinu ita-nia an?
4 Treinu ita-nia an no ema seluk: Kuandu ita lee informasaun neʼe, diʼak atu tau atensaun ba eskritura, ai-knanoik, no oinsá atu ajuda ema hodi troka sira-nia hanoin. Haree didiʼak mós dalan atu koʼalia. Tuirmai, koko toʼok atu halo tuir ezemplu neʼe kuandu ita haklaken. (Provérbios [Amsal] 1:5; 9:9) Irmán ida hatete: “Lee informasaun neʼe mak hanesan aprende husi maluk pioneiru neʼebé matenek atu haklaken!”
5. Oinsá mak ita bele ajuda ita-nia estudante Bíblia atu prepara ba haklaken?
5 Ita mós bele uza informasaun neʼe hodi ajuda ita-nia estudante Bíblia atu prepara ba haklaken. Lee informasaun hamutuk, hodi husu ita-nia estudante atu sai Testemuña no ita mak sai uma-naʼin. Hodi halo nuneʼe, estudante Bíblia bele hetan treinu atu fó sai sira-nia fiar iha dalan neʼebé diʼak. (Koloso 4:6) Sin, série neʼe mak dalan ida neʼebé Jeová ajuda ita atu ‘kaer didiʼak ita-nia knaar’ atu haklaken.—2 Timoteo 4:5.