Halaʼo estuda neʼebé ajuda estudante Bíblia laʼo ba oin
1. Haklaken-naʼin sira neʼebé estuda Bíblia ho ema iha responsabilidade saida?
1 Se laʼós Jeová mak dada ema, la iha ema ida mak bele serbí nia. (João 6:44) Maski nuneʼe, haklaken-naʼin mós tenke halaʼo ninia knaar hodi ajuda ema hakbesik ba sira-nia Aman iha lalehan. (Tiago 4:8) Atu halo nuneʼe, presiza prepara uluk. Lee deʼit parágrafu sira no husu pergunta deʼit la toʼo ba estudante sira atu komprende no laʼo ba oin iha lia-loos.
2. Estuda ho ema iha dalan neʼebé diʼak bele lori rezultadu saida?
2 Atu estudante sira bele laʼo ba oin, haklaken-naʼin tenke ajuda sira hodi (1) komprende Bíblia hanorin saida deʼit, (2) simu Bíblia nia hanorin sira, (3) uza buat neʼebé Bíblia hanorin iha sira-nia moris. (João 3:16; 17:3; Tiago 2:26) Atu bele ajuda ema ida halo tuir hakat tolu neʼe, uza fulan ida deʼit la toʼo. Tanba hakat ida-idak reprezenta faze ida-idak ba nia atu haburas ninia relasaun ho Jeová toʼo dedika ninia an ba nia.
3. Tanbasá mak mestre diʼak ida sempre husu pergunta ho matenek?
3 Estudante Bíblia sente oinsá?: La bele ita mak koʼalia barak liu se atu hatene estudante neʼe komprende ka konkorda ho buat neʼebé nia aprende hela. Anima nia atu fó sai ninia hanoin. (Tiago 1:19) Nia komprende buat neʼebé Bíblia koʼalia kona-ba tópiku neʼe ka lae? Nia bele esplika tópiku neʼe ho ninia liafuan rasik ka lae? Nia sente oinsá kona-ba buat neʼebé nia aprende hela? Nia fiar ka lae kona-ba buat neʼebé Bíblia hanorin? (1 Tesalónika 2:13) Nia komprende ka lae katak nia tenke halo mudansa iha ninia moris tuir buat neʼebé nia aprende husi Bíblia? (Koloso 3:10) Atu hatene loloos ba resposta sira-neʼe, ita presiza husu pergunta ba nia ho matenek, depois, rona didiʼak.—Mateus 16:13-16.
4. Ita tenke halo saida se ita-nia estudante la komprende ka la halo mudansa ba ninia moris tuir buat neʼebé nia aprende husi Bíblia?
4 Atu halakon ema nia toman ka hanoin ruma neʼebé sira boot mai iha tiha ona, neʼe presiza tempu. (2 Korinto 10:5) Oinsá se ita-nia estudante la simu ka la halo mudansa ba ninia moris tuir buat neʼebé nia aprende husi Bíblia? Pasiénsia no fó tempu uitoan ba nia hodi Maromak nia Liafuan no espíritu santu bele book ninia laran. (1 Korinto 3:6, 7; Ebreu 4:12) Se estudante neʼe sente susar atu komprende ka simu Bíblia nia hanorin ruma, duké obriga nia, diʼak liu buka fali tópiku seluk hodi koʼalia ho nia. Se ita hatudu pasiénsia no domin hodi estuda nafatin Bíblia ho nia, karik loron ida ninia laran sei book nia hodi halo mudansa ba ninia moris.