Prepara didiʼak atu hanorin
1. Tansá mak ita tenke hakaʼas an atu ajuda estudante atu hafolin lia-loos husi Bíblia?
1 Atubele book estudante nia laran atu serbí Maromak Jeová, ita presiza prepara didiʼak antes atu halaʼo estudu Bíblia ho nia. Ita presiza hakaʼas an atu ajuda ita-nia estudante atu hafolin lia-loos husi Bíblia. Hodi halo nuneʼe, ita bele book nia atu serbí Maromak ho nia hakarak rasik. (Deut 6:5; Prov 4:23; 1 Kor 9:26) Oinsá mak ita bele halo ida-neʼe?
2. Oinsá mak orasaun bele ajuda ita atu prepara didiʼak atu halaʼo estudu?
2 Halo orasaun kuandu prepara: Maromak Jeová deʼit mak bele halo fini lia-loos nian atu buras iha estudante sira-nia laran. Tan neʼe, antes atu komesa prepara ba estudu, diʼak ba ita atu halo orasaun kona-ba estudante ida-idak nia presiza. (1 Kor 3:6; Tgo 1:5) Orasaun iha dalan hanesan neʼe mós bele ajuda ita atu hatene oinsá mak ita bele ajuda estudante atu “hatene loloos” Maromak Jeová nia hakarak.—Kol 1:9, 10.
3. Oinsá mak ita bele prepara hodi hanoin estudante nia presiza?
3 Hanoin kona-ba estudante: Jesus hatene katak atubele hanorin ho diʼak, importante atu hanoin kona-ba ema neʼebé rona. Iha tempu neʼebé la hanesan, ema husu Jesus: “Haʼu sei halo saida atu hetan moris rohan-laek?” Jesus hatán ba ema ida-idak iha dalan neʼebé la hanesan. (Lc 10:25-28; 18:18-20) Nuneʼe, diʼak atu ita hanoin kona-ba ita-nia estudante nia presiza kuandu ita prepara. Eskritura saida deʼit mak ita hakarak lee ho nia? Informasaun hira mak ita hakarak atu estuda? Informasaun saida mak susar ba estudante atu komprende ka simu? Se ita bele hanoin nanis pergunta ruma neʼebé estudante sei husu, ita sei prontu hodi bele hatán ho diʼak.
4. Prepara ho diʼak inklui saida deʼit?
4 Estuda fali informasaun: Maski ita estuda informasaun dala barak ona, maibé informasaun neʼe sei foun ba ita-nia estudante. Se ita hakarak book sira-nia laran, importante atu ita prepara didiʼak. Ida-neʼe katak ita rasik mós tenke halo buat neʼebé ita hakarak ita-nia estudante atu halo. Estuda informasaun, lee eskritura sira hodi hanoin estudante nia presiza, no karik ita presiza riska pontu importante sira.—Rom 2:21, 22.
5. Oinsá mak ita bele halo tuir Maromak Jeová?
5 Maromak Jeová hakarak haree estudante ida-idak atu laʼo ba oin iha lia-loos. (2 Ped 3:9) Hodi uza tempu atu prepara didiʼak ba estudu ida-idak, ita hatudu domin hanesan Maromak.