Profesia husi tempu antigu neʼebé afeta ita

1. Saida mak Jeová halo lakleur depois Adão no Eva halo sala? (Génesis 3:15)

LAKLEUR depois Adão no Eva halo sala, Jeová fó sai profesia furak ida neʼebé sei fó esperansa ba Adão no Eva nia oan no bei-oan sira. Profesia neʼe hakerek iha Génesis 3:15.​—Lee.

2. Tanbasá profesia neʼe importante?

² Profesia neʼe fó sai iha livru primeiru husi Bíblia. Profesia neʼe importante tanba livru sira hotu iha Bíblia liga ho ida-neʼe. Hanesan tali kesi ai-kesak ida-idak hamutuk hodi sai ai-saar, nuneʼe mós liafuan iha Génesis 3:15 liga livru ida-idak iha Bíblia hodi fó sai mensajen ida deʼit. Mensajen mak Maromak sei haruka Salvadór ida atu harahun Diabu no sira hotu neʼebé apoia nia.b Neʼe mak bensaun furak ba ema neʼebé hadomi Jeová.

3. Iha lisaun neʼe, ita sei koʼalia kona-ba pergunta saida deʼit?

³ Iha lisaun neʼe, ita sei buka resposta ba pergunta sira neʼebé liga ho profesia iha Génesis 3:15. Profesia neʼe envolve sé-sé deʼit? Oinsá profesia neʼe sai loos? Ita hetan benefísiu saida husi profesia neʼe?

PROFESIA NEʼE ENVOLVE SÉ-SÉ DEʼIT?

4. Sé mak “samea” no oinsá ita bele hatene?

⁴ Profesia iha Génesis 3:14, 15 temi kona-ba “samea” ida, samea nia “bei-oan”, “feto” ida no feto nia “bei-oan”. Bíblia ajuda ita komprende buat sira-neʼe reprezenta sé.c Mai ita koʼalia uluk kona-ba “samea”. Ita hotu hatene katak samea ida labele komprende buat neʼebé Jeová hatete iha jardín Eden. Tan neʼe samea neʼebé Jeová deside atu fó-kastigu tenke kriatura ida neʼebé matenek. Sé mak neʼe? Apokalipse 12:9 esplika ho klaru kona-ba neʼe. Eskritura neʼe fó sai katak “samea uluk nian” mak Diabu Satanás. Maibé sé mak samea neʼe nia bei-oan?

5. Sé-sé deʼit mak sai nuʼudar samea nia bei-oan?

⁵ Dala ruma Bíblia uza liafuan “bei-oan” iha dalan simbóliku atu refere ba sira neʼebé banati-tuir ema ka anju ida ho didiʼak, tan neʼe ita bele dehan katak ema ka anju neʼe mak sira-nia aman. Entaun samea nia bei-oan mak inklui kriatura espíritu no ema neʼebé kontra Jeová no ninia povu hodi banati-tuir Satanás. Neʼe inklui anju sira iha Noé nia tempu neʼebé husik sira-nia serbisu iha lalehan no mós ema aat sira neʼebé hatudu hahalok hanesan sira-nia aman Diabu.​—Gén 6:1, 2; João 8:44; 1 João 5:19; Jud 6.

6. Tanbasá “feto” neʼe laʼós Eva?

⁶ Agora mai ita buka-hatene sé mak feto neʼe. Nia laʼós Eva. Tanbasá? Hanoin toʼok kona-ba razaun ida. Profesia hatete katak feto neʼe nia bei-oan sei “harahun” samea nia ulun. Hanesan ita aprende ona, samea neʼe mak Diabu Satanás, no Eva nia bei-oan neʼebé la perfeitu la iha kbiit atu harahun kriatura espíritu hanesan Satanás. Entaun sé mak sei harahun Satanás?

7. Tuir Apokalipse 12:1, 2, 5, 10, sé mak feto neʼebé temi iha Génesis 3:15?

⁷ Livru ikus iha Bíblia fó sai kona-ba sé mak “feto” neʼebé temi iha Génesis 3:15. (Lee Apokalipse 12:1, 2, 5, 10.) Neʼe laʼós feto ida iha mundu. Bíblia hatete katak fulan mak iha ninia ain okos, no iha fitun 12 nuʼudar koroa iha ninia ulun. Nia tuur-ahi oan ida neʼebé espesiál, neʼe mak Maromak nia Ukun. Ukun neʼe iha lalehan, tan neʼe feto neʼebé temi iha Génesis 3:15 mós tenke iha lalehan. Feto neʼe reprezenta Jeová nia organizasaun parte lalehan neʼebé forma husi ninia kriatura espíritu sira neʼebé laran-metin.​—Gal 4:26.

8. Sé mak feto nia bei-oan prinsipál no bainhira mak nia sai nuʼudar bei-oan neʼe? (Génesis 22:15-18)

⁸ Maromak nia Liafuan mós ajuda ita hatene sé mak feto nia bei-oan prinsipál. Bei-oan neʼe tenke mai husi Abraão nia liña jerasaun. (Lee Génesis 22:15-18.) Hodi tuir profesia neʼe, Jesus mai duni husi Abraão nia jerasaun. (Lc 3:23, 34) Maibé bei-oan neʼe tenke iha kbiit boot liu fali ema atu bele harahun Diabu Satanás. Tan neʼe bainhira Jesus tinan 30, Jeová hili Jesus nuʼudar ninia Oan-Mane liuhusi espíritu santu. Bainhira Jesus simu espíritu santu, nia sai nuʼudar feto neʼe nia bei-oan prinsipál. (Gal 3:16) Depois Jesus mate no moris hiʼas, Maromak “tau koroa glória no hahiʼi nian” no fó “kbiit tomak iha lalehan no rai” ba nia, inklui kbiit atu “harahun Diabu nia serbisu hotu”.​—Ebr 2:7; Mt 28:18; 1 João 3:8.

9-10. (a) Sé tan mak sai parte ba feto nia bei-oan no bainhira mak sira sai feto nia bei-oan? (b) Tuirmai ita sei aprende saida?

⁹ Maibé iha tan ema seluk neʼebé sai nuʼudar feto neʼe nia bei-oan. Apóstolu Paulo nia liafuan ba ema Judeu no ema husi nasaun seluk neʼebé iha esperansa atu bá lalehan ajuda ita hatene kona-ba neʼe. Nia hatete: “Se imi Kristu nian, imi mak Abraão nia bei-oan duni, imi sei simu liman-rohan tuir Maromak nia promesa.” (Gal 3:28, 29) Bainhira Jeová hili ema Kristaun ida ho espíritu santu atu bá lalehan, ema neʼe sai parte ba feto nia bei-oan. Entaun Jesus Kristu no ema nain-144.000 neʼebé ukun hamutuk ho nia mak sai parte ba feto nia bei-oan. (Apok 14:1) Sira hotu hakaʼas an atu banati-tuir sira-nia Aman Maromak Jeová.

¹⁰ Ita hatene ona sé-sé deʼit mak temi iha Génesis 3:15. Agora mai ita haree oinsá Jeová kumpre profesia neʼe neineik-neineik no oinsá profesia neʼe lori benefísiu mai ita.

OINSÁ PROFESIA NEʼE SAI LOOS?

11. Oinsá mak samea hakanek feto nia bei-oan nia “ain-tuban”?

¹¹ Tuir profesia iha Génesis 3:15, samea neʼe sei hakanek feto nia bei-oan nia “ain-tuban”. Neʼe sai loos bainhira Satanás uza ema Judeu no ema Roma atu oho Maromak nia Oan-Mane. (Lc 23:13, 20-24) Bainhira ema ida nia ain-tuban kanek, nia labele laʼo ba tempu balu. Nuneʼe mós ho Jesus, bainhira nia mate, nia labele halo buat ida ba tempu balu tanba nia iha rate laran durante loron tolu.​—Mt 16:21.

12. Oinsá no bainhira mak feto nia bei-oan harahun samea nia ulun?

¹² Profesia iha Génesis 3:15 hatudu katak Jesus sei la mate ba nafatin. Tanbasá? Tanba tuir profesia neʼe, bei-oan sei harahun samea nia ulun. No atu ida-neʼe bele akontese, Jesus tenke hetan moris-hiʼas. Neʼe sai loos duni. Iha loron terseiru depois Jesus mate, nia hetan moris-hiʼas nuʼudar kriatura espíritu neʼebé sei nunka mate tan. Jesus sei harahun Satanás iha tempu neʼebé Maromak deside ona. (Ebr 2:14) Sira neʼebé sei ukun hamutuk ho Kristu sei ajuda atu halakon Maromak nia inimigu hotu iha rai katak samea nia bei-oan.​—Apok 17:14; 20:4, 10.d

ITA HETAN BENEFÍSIU SAIDA HUSI PROFESIA NEʼE?

13. Ita hetan daudaun benefísiu saida tanba Maromak kumpre profesia neʼe?

¹³ Se ita mak Maromak nia atan, ita hetan daudaun benefísiu tanba Maromak kumpre profesia neʼe. Jesus mai iha rai nuʼudar ema no haleno ninia Aman nia hahalok sira ho perfeitu. (João 14:9) Tan neʼe bainhira ita aprende kona-ba Jesus, ita bele koñese no hadomi Maromak Jeová. Ita mós hetan benefísiu husi Jesus nia hanorin no mós dalan neʼebé nia dirije kongregasaun Kristaun ohin loron. Nia hanorin ita atu halaʼo ita-nia moris iha dalan neʼebé Jeová simu. Ita hotu mós bele hetan benefísiu tanba Jesus hetan kanek iha ninia ain-tuban ka mate. Oinsá? Bainhira Jesus moris-hiʼas, nia entrega folin husi ninia raan nuʼudar sakrifísiu neʼebé perfeitu atu “hamoos ita-nia sala hotu”.​—1 João 1:7.

14. Oinsá ita hatene katak profesia neʼe la sai loos kedas iha tempu neʼebá?

¹⁴ Jeová nia liafuan iha profesia neʼebé nia fó sai iha jardín Eden hatudu katak profesia neʼe la sai loos kedas iha tempu neʼebá. Maibé presiza tempu atu feto neʼe iha bei-oan, atu Diabu halibur sira neʼebé apoia nia no atu grupu rua neʼe sai inimigu ka odi malu. Se ita komprende profesia neʼe, neʼe sei ajuda ita tanba profesia neʼe fó sai katak mundu neʼebé Satanás kontrola sei odi Maromak nia atan sira. Jesus mós hatete buat neʼebé hanesan ba ninia dixípulu sira. (Mc 13:13; João 17:14) Ita bele haree duni profesia neʼe sai loos, liuliu hahú husi tinan 100 liubá.

15. Tanbasá mundu odi ita liután? Tanbasá ita la presiza taʼuk ba Satanás?

¹⁵ Lakleur depois Jesus sai Liurai iha tinan 1914, Satanás soe tun tiha ba rai. Agora Satanás iha deʼit rai no hein ba tempu neʼebé nia atu lakon. (Apok 12:9, 12) Maibé nia la hein hakmatek deʼit. Satanás hirus tebes no ataka Maromak nia povu. (Apok 12:13, 17) Tan razaun neʼe mak mundu neʼebé Satanás kontrola odi liután Maromak nia povu. Maibé ita la presiza taʼuk Satanás no sira neʼebé apoia nia. Ita bele iha fiar metin hanesan apóstolu Paulo neʼebé dehan: “Se Maromak hamutuk ho ita, sé mak bele kontra ita?” (Rom 8:31) Ita bele fiar metin ba Jeová tanba ita haree parte barak husi profesia iha Génesis 3:15 sai loos ona.

16-18. Oinsá irmaun Curtis, irmán Ursula no irmán Jessica hetan benefísiu tanba komprende profesia iha Génesis 3:15?

¹⁶ Jeová nia promesa iha Génesis 3:15 bele ajuda ita tahan susar naran deʼit. Irmaun Curtis neʼebé serbí nuʼudar misionáriu iha rai-Guame hatete: “Haʼu hasoru susar oioin no sente laran-kraik no neʼe koko haʼu-nia laran-metin ba Jeová. Maibé medita kona-ba profesia iha Génesis 3:15 ajuda ona haʼu atu kontinua iha fiar metin ba Aman iha lalehan.” Irmaun Curtis hein namanas ba tempu neʼebé Jeová sei halakon ita-nia susar hotu.

¹⁷ Irmán Ursula neʼebé hela iha área Baveira hatete katak komprende kona-ba Génesis 3:15 ajuda nia atu fiar katak Bíblia mai husi Maromak. Nia admira tebes dalan neʼebé profesia hotu iha Bíblia liga ho profesia neʼe. Nia mós hatete: “Bainhira haʼu aprende katak Jeová halo kedas buat ruma atu fó esperansa ba ema, neʼe book tebes haʼu-nia laran.”

¹⁸ Irmán Jessica husi Mikronézia hatete: “Haʼu hanoin-hetan oinsá haʼu sente bainhira haʼu hetan lia-loos. Profesia neʼebé hakerek iha Génesis 3:15 sai loos daudaun. Neʼe ajuda haʼu atu hanoin-hetan katak moris agora laʼós moris neʼebé loloos. Profesia neʼe mós hametin haʼu-nia fiar katak serbí Jeová lori moris neʼebé diʼak liu agora no iha futuru.”

19. Tanbasá ita bele fiar katak parte ikus husi profesia neʼe sei sai loos?

¹⁹ Hanesan ita aprende ona, profesia iha Génesis 3:15 sai loos daudaun. Ita hatene ona sé mak feto nia bei-oan no samea nia bei-oan. Jesus mak feto nia bei-oan prinsipál no nia sai diʼak ona husi ninia kanek iha ain-tuban. Agora nia mak Liurai neʼebé Kbiit Boot no sei nunka mate. Jeová besik hili hotu ona ema sira neʼebé sei ukun hamutuk ho ninia Oan-Mane iha lalehan neʼebé mós sai nuʼudar feto nia bei-oan. Tanba parte primeiru husi profesia neʼe sai loos ona, ita bele fiar metin katak parte ikus kona-ba harahun samea nia ulun mós sei sai loos. Ita sei kontente tebes bainhira Satanás la iha tan. Maibé agora keta rende an. Ita bele tau fiar ba Maromak. Liuhusi feto nia bei-oan, Maromak sei haraik bensaun ba “nasaun sira hotu iha mundu”.​—Gén 22:18.