Joven sira, kontinua laʼo ba oin depois batizmu

1. Joven barak kumpre ona buat diʼak saida deʼit?

TINAN-TINAN, joven Kristaun rihun ba rihun hetan batizmu. Ita mós hetan ona batizmu ka lae? Se nuneʼe, Jeová no mós irmaun-irmán sira sente kontente tebes. (Prov 27:11) Hanoin toʼok kona-ba buat diʼak oioin neʼebé Ita kumpre ona. Karik durante tinan barak, Ita estuda Bíblia ho badinas. Rezultadu mak Ita fiar metin katak Bíblia mak Maromak nia Liafuan. Ita mós koñese no hadomi Maromak neʼebé dirije ema hakerek Bíblia. No tanba Ita hadomi tebes Jeová, Ita dedika an no hetan batizmu. Ita halo desizaun neʼebé diʼak tebes.

2. Iha lisaun neʼe, ita sei aprende saida?

² Nuʼudar joven, karik Ita-nia fiar hetan koko iha dalan oioin bainhira Ita laʼo ba oin no hetan batizmu. Bainhira Ita-nia idade aumenta, Ita mós sei hasoru koko foun. Satanás sei koko atu halo fraku Ita-nia domin ba Jeová no mós koko book Ita atu la serbí tan Jeová. (Éf 4:14) Ita labele husik ida-neʼe akontese. Saida mak bele ajuda Ita atu laran-metin nafatin ba Jeová no kumpre Ita-nia dedikasaun ba nia? Ita presiza kontinua “laʼo ba oin” hodi sai ema Kristaun neʼebé maduru. (Ebr 6:1) Oinsá mak Ita bele halo ida-neʼe?

OINSÁ ATU SAI EMA KRISTAUN NEʼEBÉ MADURU?

3. Ema Kristaun hotu presiza halo saida depois hetan tiha batizmu?

³ Depois hetan tiha batizmu, ita hotu presiza halo tuir matadalan neʼebé apóstolu Paulo fó sai ba ema Kristaun iha Éfeso. Nia anima sira atu sai ema Kristaun neʼebé maduru. (Éf 4:13) Sira presiza kontinua laʼo ba oin. Paulo kompara dalan neʼebé ema Kristaun ida laʼo ba oin ho oinsá labarik ida sai boot. Inan-aman sira hadomi tebes no sente orgullu ho sira-nia oan neʼebé bebé hela. Maibé oan neʼe sei la sai bebé ba nafatin. Ikusmai nia presiza husik tiha ninia “hahalok labarik nian”. (1 Kor 13:11) Nuʼudar ema Kristaun, ita mós presiza halo nuneʼe. Depois hetan tiha batizmu, ita presiza kontinua laʼo ba oin. Mai ita haree sujestaun balu neʼebé sei ajuda ita atu halo ida-neʼe.

4. Hahalok saida mak bele ajuda Ita laʼo ba oin? Esplika toʼok. (Filipe 1:9)

⁴ Halo Ita-nia domin ba Jeová sai boot liután. Klaru katak Ita hadomi tebes Jeová. Maibé Ita bele halo Ita-nia domin ba Jeová sai boot liután. Paulo halo orasaun atu ema Kristaun iha Filipe bele halo sira-nia domin “sai boot liután”. Oinsá? Iha Filipe 1:9, apóstolu Paulo fó sai dalan ida. (Lee.) Neʼe mak liuhusi hetan “koñesimentu neʼebé loos no komprende Maromak nia hakarak ho didiʼak”. Bainhira ita koñese Jeová ho diʼak liután, ita-nia domin ba nia sai boot liután no ita sei hafolin liután ninia hahalok no ninia dalan sira. Ita hakarak atu halo nia kontente no lakohi hakanek ninia laran. Ita hakaʼas an atu komprende ninia hakarak no halo tuir ida-neʼe.

5-6. Oinsá mak ita-nia domin ba Jeová bele sai boot liután? Esplika toʼok.

⁵ Jesus banati-tuir ninia Aman nia hahalok sira ho perfeitu. Tan neʼe, bainhira ita koñese Jesus ho diʼak liután, ita-nia domin ba Jeová mós sei sai boot liután. (Ebr 1:3) Dalan diʼak liu atu koñese Jesus mak hodi estuda Evanjellu haat. Se Ita seidauk haburas toman atu lee Bíblia loroloron, Ita bele komesa lee istória sira kona-ba Jesus. Bainhira Ita lee istória sira-neʼe, tau fokus ba Jesus nia hahalok sira. Porezemplu, ema la taʼuk atu hakbesik ba nia. Ho domin, nia hakoʼak labarik sira. (Mc 10:13-16) Nia ajuda ninia dixípulu sira atu sente kmaan, no sira la taʼuk atu fó sai sira-nia sentimentu ba nia. (Mt 16:22) Jesus banati-tuir ninia Aman iha lalehan nia hahalok. Tan neʼe, ema mós la presiza taʼuk atu hakbesik ba Jeová. Ita bele halo orasaun ba nia no bele fakar sai ita-nia sentimentu ba nia. Ita bele iha konfiansa katak nia sei la buka deʼit ita-nia sala. Nia hadomi ita no hanoin ita.​—1 Ped 5:7.

⁶ Jesus hanoin tebes ema. Apóstolu Mateus hatete: “Kuandu nia haree ema-lubun, nia hanoin tebes sira, tanba nia haree katak ema hanehan no la tau matan ba sira, no sira hanesan bibi neʼebé bibi-atan la iha.” (Mt 9:36) Jeová mós hanoin tebes ema ka lae? Jesus hatete: “Haʼu-nia Aman iha lalehan lakohi kiʼikoan sira-neʼe ida lakon.” (Mt 18:14) Ita sente kontente tebes tanba hatene katak Jeová hadomi tebes ita. Bainhira ita koñese didiʼak Jesus, ita-nia domin ba Jeová sai boot liután.

7. Oinsá ransu ho ema Kristaun neʼebé maduru bele ajuda Ita?

⁷ Bainhira Ita koñese didiʼak irmaun-irmán sira neʼebé maduru, neʼe bele ajuda Ita atu hadomi Jeová liután no sai maduru liután. Ita bele haree oinsá sira moris kontente no la arrepende sira-nia desizaun atu serbí Jeová. Husu sira atu konta sira-nia esperiénsia kona-ba serbí Jeová. Husu matadalan husi sira bainhira Ita presiza halo desizaun importante ida. Hanoin-hetan katak “se iha konsellu-naʼin barak, ida-neʼe sei lori susesu”.​—Prov 11:14.

8. Saida mak Ita bele halo se Ita duvida ho Bíblia nia hanorin balu?

⁸ Halakon Ita-nia dúvida sira. Hanesan temi iha parágrafu 2, Satanás sei koko hanetik Ita atu sai ema Kristaun neʼebé maduru. Karik nia sei hamosu dúvida kona-ba Bíblia nia hanorin balu. Porezemplu, karik Ita rona hanorin neʼebé dehan katak Maromak la kria ema no ita mai husi prosesu evolusaun. Bainhira kiʼik, karik Ita la hanoin kona-ba neʼe, maibé agora mestre sira hanorin ida-neʼe iha eskola. Karik mestre sira-nia esplikasaun kona-ba evolusaun rona lójiku. Maibé karik sira nunka hanoin kona-ba evidénsia neʼebé hatudu katak iha duni Kriadór. Hanoin-hetan prinsípiu iha Provérbios 18:17 neʼebé dehan: “Ema neʼebé konta uluk ninia kazu haree hanesan nia mak loos, toʼo ema neʼebé duun nia mai no husu pergunta ba nia hodi hetan lia-loos.” Duké simu kedas ideia sira neʼebé Ita rona iha eskola nuʼudar faktu, estuda didiʼak lia-loos husi Maromak nia Liafuan Bíblia. Halo riset hodi uza ita-nia publikasaun sira. Koʼalia ho irmaun-irmán sira neʼebé uluk fiar ba evolusaun. Husu tanbasá sira fiar katak iha duni Kriadór neʼebé hadomi ema. Diskusaun hanesan neʼe bele ajuda Ita hetan faktu sira neʼebé hatudu katak iha duni Kriadór.

9. Ita aprende saida husi Melissa nia esperiénsia?

⁹ Irmán ida naran Melissa halo riset kona-ba kriasaun no neʼe ajuda halakon ninia dúvida.b Nia hatete: “Iha eskola, mestre sira-nia esplikasaun kona-ba evolusaun halo ita hanoin katak evolusaun mak faktu. Foufoun, haʼu lakohi halo riset tanba taʼuk katak teoria evolusaun mak loos. Maibé tuirmai haʼu hanoin katak Jeová hakarak ita-nia fiar bazeia ba evidénsia. Tan neʼe haʼu halo riset. Haʼu lee livru Apakah Ada Pencipta yang Mempedulikan Anda? no broxura Moris Hotu Mosu Mesak Deʼit ka lae? no mós broxura Asal Mula Kehidupan​—Lima Pertanyaan yang Patut Direnungkan. Informasaun sira-neʼe ajuda tebes haʼu. Diʼak liu halo kedas riset bainhira duvida kona-ba buat ruma.”

10-11. Saida mak bele ajuda Ita moos nafatin iha dalan morál? (1 Tesalónika 4:3, 4)

¹⁰ La simu hahalok sala. Bainhira joven, hakarak seksuál bele sai makaʼas no dala ruma ema seluk bele fó presaun ba Ita atu halo sala seksuál. Satanás hakarak Ita atu halo tuir deʼit Ita-nia hakarak rasik. Saida mak bele ajuda Ita atu moos nafatin iha dalan morál? (Lee 1 Tesalónika 4:3, 4.) Halo orasaun ba Jeová hodi fó sai Ita-nia sentimentu no husu nia atu fó forsa ba Ita. (Mt 6:13) Hanoin-hetan katak Jeová hakarak ajuda Ita, laʼós fó-kastigu ba Ita. (Sal 103:13, 14) Ita mós bele buka ajuda husi Bíblia. Melissa neʼebé temi ona ohin, luta makaʼas ho hanoin neʼebé la moos. Nia hatete: “Lee Bíblia loroloron ajuda haʼu atu la rende an no mós fó-hanoin haʼu katak haʼu mak Jeová nian no haʼu hakarak serbí nia.”​—Sal 119:9.

¹¹ Keta koko atu rezolve Ita-nia problema mesak deʼit. Importante atu koʼalia ho Ita-nia inan-aman kona-ba susar neʼebé Ita hasoru, maski dala ruma la fasil atu koʼalia kona-ba tópiku neʼebé privadu hanesan neʼe. Melissa hatete: “Haʼu halo orasaun hodi husu aten-brani no tuirmai haʼu koʼalia ba apá kona-ba haʼu-nia problema. Depois neʼe, haʼu sente kmaan tebes. Haʼu hatene katak Jeová sente orgullu ho haʼu.”

12. Oinsá atu bele halo desizaun neʼebé diʼak?

¹² Halo desizaun tuir Bíblia nia prinsípiu. Nuʼudar Ita sai boot, Ita-nia inan-aman sei fó liberdade ba Ita atu halo desizaun oioin. Maibé Ita rasik seidauk iha esperiénsia barak. Saida mak Ita bele halo atu la foti desizaun neʼebé bele estraga Ita-nia relasaun diʼak ho Jeová? (Prov 22:3) Irmán Claudia esplika buat neʼebé ajuda nia atu halo desizaun diʼak. Nia rekoñese katak ema Kristaun neʼebé maduru la presiza ukun-fuan espesífiku kona-ba situasaun hotu. Nia hatete: “Duké komprende deʼit ukun-fuan sira, haʼu presiza komprende Bíblia nia prinsípiu sira.” Bainhira lee Bíblia, husu ba Ita-nia an: ‘Eskritura neʼe hanorin saida kona-ba Jeová nia hanoin? Eskritura neʼe fó sai prinsípiu ruma neʼebé bele ajuda haʼu atu hatudu hahalok diʼak ka lae? Haʼu sei hetan benefísiu saida se haʼu halo tuir ida-neʼe?’ (Sal 19:7; Isa 48:17, 18) Bainhira Ita lee Bíblia no medita kona-ba Bíblia nia prinsípiu sira, fasil liu atu foti desizaun sira neʼebé halo Jeová kontente. Bainhira Ita sai maduru liután, Ita sei nota katak Ita la presiza ukun-fuan ba situasaun ida-idak tanba Ita komprende Jeová nia hanoin kona-ba situasaun neʼe.

13. Belun sira neʼebé diʼak bele fó influénsia saida mai Ita? (Provérbios 13:20)

¹³ Habelun ho ema neʼebé hadomi Jeová. Hanesan temi ona, Ita-nia belun sira bele ajuda Ita atu sai maduru. (Lee Provérbios 13:20.) Irmán Sara lakon ninia ksolok, maibé tuirmai buat ruma akontese no neʼe ajuda nia sente haksolok fali. Irmán Sara hatete: “Haʼu komesa habelun ho ema neʼebé diʼak. Haʼu no irmán joven ida komesa prepara Livru Haklaken hamutuk semana-semana. Belun seluk ajuda haʼu sai brani atu fó komentáriu iha reuniaun. Haʼu-nia belun sira fó influénsia diʼak mai haʼu, tan neʼe haʼu komesa hafolin estuda mesak no orasaun. Haʼu-nia relasaun diʼak ho Jeová sai metin liután no haʼu komesa sente haksolok fali.”

14. Oinsá mak Julien habelun ho ema neʼebé fó influénsia diʼak ba nia?

¹⁴ Oinsá atu bele habelun ho ema neʼebé fó influénsia diʼak ba Ita? Julien neʼebé agora serbí nuʼudar katuas kongregasaun hatete: “Bainhira haʼu joven, haʼu habelun ho irmaun-irmán sira neʼebé haklaken ho haʼu. Sira laran-manas no ajuda haʼu atu rekoñese katak serbisu haklaken bele lori ksolok. Haʼu komesa halo planu atu serbí nuʼudar pioneiru. Haʼu mós rekoñese katak haʼu la iha belun diʼak barak tanba haʼu toman atu habelun deʼit ho ema neʼebé idade hanesan ho haʼu. Tuirmai haʼu serbí iha Betel no habelun ho ema Betel. Sira-nia ezemplu ajuda haʼu halo desizaun diʼak kona-ba atividade halimar nian no neʼe ajuda haʼu hakbesik liután ba Jeová.”

15. Paulo fó avizu saida ba Timóteo kona-ba ransu? (2 Timóteo 2:20-22)

¹⁵ Oinsá se Ita nota katak ema ruma iha kongregasaun la fó influénsia diʼak ba Ita? Apóstolu Paulo hatene katak iha ema balu neʼebé la hafolin buat espirituál iha kongregasaun, tan neʼe nia fó avizu ba Timóteo atu labele ransu ho sira. (Lee 2 Timóteo 2:20-22.) Ita-nia relasaun diʼak ho Jeová mak folin-boot tebes. Ita hakaʼas an atu iha relasaun diʼak ho Jeová no ita sei la husik ema ida atu estraga ida-neʼe.​—Sal 26:4.

OINSÁ HALO PLANU BELE AJUDA ITA SAI MADURU?

16. Ita bele halo planu saida deʼit?

¹⁶ Halo planu neʼebé diʼak. Ita presiza halo planu neʼebé bele ajuda hametin Ita-nia fiar no sai maduru liután. (Éf 3:16) Porezemplu, karik Ita deside atu sai toman lee no estuda Bíblia beibeik. (Sal 1:2, 3) Ka karik Ita deside atu halo orasaun husi laran no dala barak liu fali uluk. Karik Ita presiza kontrola an liután kona-ba atividade halimar neʼebé Ita hili no oinsá Ita uza Ita-nia tempu. (Éf 5:15, 16) Bainhira Ita hakaʼas an atu laʼo ba oin liután, Jeová kontente ho Ita.

17. Ita bele hetan benefísiu saida kuandu ajuda ema seluk?

¹⁷ Ita bele sai ema Kristaun neʼebé maduru bainhira Ita ajuda ema seluk. Jesus hatete: “Kontente liu atu fó duké simu.” (Após 20:35) Ita sei sente kontente se Ita uza Ita-nia tempu no enerjia atu ajuda ema seluk. Porezemplu, karik Ita bele halo planu atu ajuda irmaun-irmán sira neʼebé idade ka moras. Karik Ita bele kompras ba sira ka ajuda sira aprende oinsá atu uza sira-nia sasán eletróniku. Se Ita mak irmaun ida, Ita bele halo planu atu sai atan ba kongregasaun atu nuneʼe Ita bele ajuda liután irmaun-irmán sira. (Flp 2:4) Ita mós bele hatudu domin ba ema seluk hodi haklaken liafuan diʼak kona-ba Maromak nia Ukun. (Mt 9:36, 37) Se bele, halo planu atu serbí Jeová tempu-tomak.

18. Oinsá serbí tempu-tomak bele ajuda Ita atu sai maduru liután?

¹⁸ Serbí tempu-tomak bele ajuda Ita atu laʼo ba oin liután no hakbesik liután ba Jeová. Se Ita serbí nuʼudar pioneiru, neʼe bele loke dalan ba Ita atu tuir Eskola ba Haklaken-Naʼin Tempu-Tomak. Karik Ita bele serbí iha Betel ka ajuda projetu konstrusaun. Irmán joven ida naran Kaitlyn hatete: “Depois hetan tiha batizmu, haʼu gasta tempu atu haklaken ho irmaun-irmán sira neʼebé iha esperiénsia barak, neʼe ajuda haʼu atu sai maduru liután. Sira-nia ezemplu book haʼu atu aumenta haʼu-nia koñesimentu kona-ba Bíblia no mós haʼu-nia matenek atu haklaken.”

19. Bainhira Ita laʼo ba oin, bensaun saida deʼit mak Ita sei hetan?

¹⁹ Bainhira Ita kontinua laʼo ba oin, Jeová sei haraik bensaun oioin ba Ita. Ita sei la gasta Ita-nia enerjia ba buat neʼebé folin-laek. (1 João 2:17) Ita sei la hetan laran-kanek neʼebé mosu tanba halo desizaun sala. Ita sei hetan susesu no kontente neʼebé loos. (Prov 16:3) Ita-nia ezemplu diʼak sei anima irmaun-irmán sira neʼebé joven no mós idade. (1 Tim 4:12) No importante liu, Ita sei sente kontente no dame tanba hatene katak Ita halo Jeová kontente no iha relasaun diʼak ho nia.​—Prov 23:15, 16.