“Ksolok ba sira neʼebé hatudu nafatin integridade” ba Jeová

1-2. (a) Governu balu halo saida ba Jeová nia povu, maibé Jeová nia povu halo saida? (b) Maski ema kontra, maibé tanbasá Jeová nia povu sente kontente? (Bele mós fó komentáriu kona-ba foto iha livru oin.)

AGORA daudaun, autoridade sira hanetik ka bandu ita-nia atividade iha rai 30 liu. Iha rai sira-neʼe balu, autoridade sira hatama irmaun-irmán sira ba komarka. Sira halo sala saida? Ba Jeová, sira la halo sala ida. Buat neʼebé sira halo mak lee no estuda Bíblia, haklaken no tuir reuniaun hamutuk ho maluk fiar-naʼin sira. Sira mós kontinua neutrál. Maski ema kontra makaʼas, maibé Jeová nia atan sira-neʼe nafatin hatudu integridade,b no adora deʼit Jeová. Neʼe lori ksolok ba sira.

² Klaru katak Ita haree ona foto husi Testemuña balu neʼebé aten-brani no kontinua oin-midar. Sira sente haksolok tanba hatene katak Jeová kontente ho sira tanba sira kaer metin ba sira-nia integridade. (1 Krón 29:17a) Jesus hatete: “Ksolok ba sira neʼebé hetan terus bainhira halo hahalok loos . . . Haksolok no kontente bá, tanba imi-nia kolen boot tebes.”—Mt 5:10-12.

EZEMPLU BA ITA

3. Tuir Apóstolu 4:19, 20, apóstolu sira halo saida bainhira ema kontra sira, no tanbasá sira halo nuneʼe?

³ Irmaun-irmán sira hasoru daudaun susar neʼebé apóstolu sira mós hasoru bainhira ema kontra sira tanba haklaken kona-ba Jesus. Dala barak, ema Judeu nia tribunál aas liu “haruka sira atu labele koʼalia tan buat ruma ka hanorin hodi Jesus nia naran”. (Após 4:18; 5:27, 28, 40) Saida mak apóstolu sira halo? (Lee Apóstolu 4:19, 20.) Sira hatene katak Maromak neʼebé iha podér boot liu mak ‘fó mandamentu ba sira atu haklaken ba ema no fó sasin ho didiʼak’ kona-ba Kristu. (Após 10:42) Entaun Pedro no João reprezenta sira-nia maluk no ho aten-brani dehan katak sira sei halo tuir Maromak duké juís sira-neʼe no mós nunka para atu haklaken kona-ba Jesus. Neʼe hanesan sira husu pergunta tuirmai neʼe ba autoridade sira: ‘Imi brani atu dehan katak imi-nia mandamentu mak boot liu Maromak nian ka?’

4. Tuir Apóstolu 5:27-29, ezemplu saida mak apóstolu sira hatudu ba ema Kristaun hotu, no oinsá ita bele banati-tuir sira?

⁴ Apóstolu sira hatudu ezemplu kapás ba ema Kristaun loos hotu kona-ba “halo tuir Maromak nuʼudar ukun-naʼin duké halo tuir ema”. (Lee Apóstolu 5:27-29.) Apóstolu sira nafatin laran-metin maski ema baku sira. Depois sai husi tribunál, sira “haksolok tanba sira hetan moe tanba Jesus nia naran” no sira kontinua haklaken.—Após 5:40-42.

5. Ita presiza buka resposta ba pergunta saida deʼit?

⁵ Apóstolu sira-nia ezemplu hamosu pergunta balu. Porezemplu, oinsá mak sira-nia desizaun atu halo tuir Maromak duké ema, la kontra malu ho mandamentu atu “hakruʼuk ba autoridade sira”? (Rom 13:1) Oinsá ita bele halo tuir Paulo nia liafuan kona-ba “halo tuir governu no autoridade sira” no iha tempu hanesan hatudu integridade ba Maromak nuʼudar Ukun-Naʼin neʼebé aas liu?—Tito 3:1.

“AUTORIDADE SIRA”

6. (a) Sé mak “autoridade sira” neʼebé temi iha Roma 13:1, no ita iha obrigasaun atu fó saida ba sira? (b) Saida mak hanesan husi ukun-naʼin hotu?

⁶ Lee Roma 13:1. Iha versíkulu neʼe, fraze “autoridade sira” refere ba ema nia ukun-naʼin sira neʼebé iha podér no kontrola ema seluk. Ema Kristaun hakruʼuk ba autoridade sira-neʼe. Autoridade sira mantein dame, aplika lei sira, no dala ruma sira mós defende Jeová nia povu. (Apok 12:16) Tan neʼe ita tenke selu taxa ba sira, hamtaʼuk no respeitu sira tanba sira hakarak ida-neʼe. (Rom 13:7) Autoridade sira-neʼe iha podér tanba Jeová mak husik sira atu hetan ida-neʼe. Jesus nia liafuan ba Governadór Pónsio Pilatos ajuda ita komprende prinsípiu neʼe. Kuandu Pilatos dehan katak nia iha podér atu husik Jesus livre ka atu fó-kastigu mate ba Jesus, Jesus hatete: “Se Ita-Boot la simu kbiit husi leten, Ita la iha kbiit atu halo buat ida kontra haʼu.” (João 19:11) Hanesan Pilatos, ukun-naʼin sira ohin loron iha podér neʼebé limitadu.

7. Iha situasaun saida deʼit mak ita la presiza hakruʼuk ba ukun-naʼin sira? Sira presiza hanoin-hetan saida?

⁷ Ema Kristaun tenke halo tuir lei hotu husi ema nia governu se ida-neʼe la kontra Maromak nia ukun-fuan. Maibé ita labele halo tuir ukun-naʼin sira bainhira sira husu ita atu halo buat neʼebé Maromak la gosta ka bainhira sira bandu ita atu la halo buat neʼebé Maromak haruka ita atu halo. Porezemplu, karik governu sira haruka joven sira tama militár.c Ka karik sira bandu ita-nia Bíblia no publikasaun sira no mós bandu ita atu haklaken ka tuir reuniaun hamutuk. Bainhira autoridade sira uza sala sira-nia podér atu kontra Kristu nia dixípulu, sira sei hatán ba Maromak. Jeová haree buat neʼebé sira halo!—Ecle 5:8.

8. Saida mak diferensa entre “autoridade” sira-nia podér no Jeová nia podér no tanbasá importante atu hatene ida-neʼe?

⁸ “Autoridade sira” iha podér, bele kumpre buat diʼak, no mós kontrola ema seluk. Maibé neʼe la dehan katak sira mak perfeitu no aas liu. Iha Ida neʼebé perfeitu no aas liu fali sira, neʼe mak Maromak Jeová. Dala haat Bíblia koʼalia kona-ba Jeová nuʼudar “Ida neʼebé Aas Liu”.—Dan 7:18, 22, 25, 27.

“IDA NEʼEBÉ AAS LIU”

9. Profeta Daniel haree saida iha ninia vizaun?

⁹ Profeta Daniel haree vizaun oioin neʼebé hatudu ho klaru katak Jeová iha podér boot liu fali autoridade sira hotu. Primeiru, Daniel haree animál boot haat neʼebé reprezenta ukun boot iha mundu neʼebé mosu ona no mosu daudaun. Neʼe mak Babilónia, Média-Pérsia, Grésia, Roma no mós Bretaña ho Estadus Unidus neʼebé agora sai nuʼudar ukun boot iha mundu. (Dan 7:1-3, 17) Tuirmai Daniel haree Jeová tuur iha ninia kadunan iha lalehan. (Dan 7:9, 10) Buat neʼebé Daniel haree tuirmai mak avizu ba ukun-naʼin sira ohin loron.

10. Tuir Daniel 7:13, 14, 27, Jeová entrega ema nia ukun ba sé? Neʼe hatudu saida kona-ba nia?

¹⁰ Lee Daniel 7:13, 14, 27. Daniel konta katak Maromak hasai podér hotu husi ema nia governu no entrega ba sira neʼebé merese simu ida-neʼe no iha kbiit boot liu. Maromak entrega ba sé? Nia entrega ba “ida neʼebé hanesan oan-mane husi ema” katak Jesus Kristu no mós ba “ema santu sira neʼebé serbí Ida neʼebé Aas Liu” katak ema naʼin-144.000 neʼebé sei ukun “tinan ba tinan ba nafatin”. (Dan 7:18) Klaru katak, Jeová mak “Ida neʼebé Aas Liu” tanba nia deʼit mak iha podér atu halo hanesan neʼe.

11. Saida tan mak Daniel hakerek neʼebé hatudu katak Jeová iha podér boot liu nasaun sira?

¹¹ Buat neʼebé Daniel haree iha ninia vizaun liga duni ho buat neʼebé nia fó sai antes neʼe. Daniel hatete katak “Maromak iha lalehan” mak “hasai liurai sira no foti liurai sira”. Daniel mós hakerek: “Maromak neʼebé Aas Liu Hotu mak Ukun-Naʼin ba ema nia nasaun sira no . . . nia entrega ukun neʼe ba ema neʼebé nia hakarak.” (Dan 2:19-21; 4:17) Iha duni situasaun balu neʼebé Jeová hasai no foti liurai sira ka lae? Sin iha!

12. Fó toʼok ezemplu oinsá Jeová hasai liurai sira husi sira-nia kadunan. (Haree dezeñu.)

¹² Jeová hatudu ona ho klaru katak nia iha podér boot liu “autoridade sira”. Hanoin toʼok kona-ba ezemplu tolu. Faraó husi rai-Ejitu halo Maromak nia povu sai nuʼudar atan no kontinua la husik sira livre. Maibé Maromak halo ninia povu livre no halo Faraó mout iha Tasi Mean. (Éx 14:26-28; Sal 136:15) Liurai Belsazar husi Babilónia halo festa ida no “foti an hasoru Naʼi iha lalehan” no “fó hahiʼi ba maromak sira neʼebé halo husi osan-mean, [no] osan-mutin” duké ba Jeová. (Dan 5:22, 23) Maibé Maromak hamoe mane foti an neʼe. “Iha kalan neʼe kedas”, ema oho Belsazar no tuirmai ninia ukun entrega fali ba ema Média no Pérsia. (Dan 5:28, 30, 31) Liurai Herodes Agripa I husi rai-Palestina haruka ema oho apóstolu Tiago no tuirmai hatama Pedro ba komarka no hanoin atu oho Pedro. Maibé Jeová hanetik Herodes atu kumpre ninia planu. “Jeová nia anju fó moras ba nia”, no nia mate.—Após 12:1-5, 21-23.

13. Fó toʼok ezemplu oinsá Jeová halakon ukun-naʼin barak neʼebé serbisu hamutuk.

¹³ Jeová mós hatudu ona katak nia iha podér boot liu fali ukun-naʼin barak neʼebé serbisu hamutuk. Nia defende ema Izraél no ajuda sira atu halakon ema Kanaan nia liurai naʼin-31 neʼebé serbisu hamutuk atu kontra Izraél. Nia mós ajuda ema Izraél manán rai barak iha Rai neʼebé Maromak Promete. (Jos 11:4-6, 20; 12:1, 7, 24) Jeová mós ajuda ema Izraél atu manán Liurai Ben-Hadad no mós liurai Síria naʼin-32 neʼebé halo funu hasoru ema Izraél.—1 Reis 20:1, 26-29.

14-15. (a) Liurai Nabukodonozór no Dário dehan saida kona-ba Jeová nia ukun? (b) Ema neʼebé hakerek Salmo ida fó sai saida kona-ba Jeová no ninia povu?

¹⁴ Dala barak Jeová hatudu katak nia mak Ida neʼebé Aas Liu. Maromak halo Liurai Nabukodonozór husi Babilónia sai bulak bainhira liurai neʼe gaba an kona-ba ninia “forsa no kbiit” no mós ninia “glória no kmanek” duké haraik an hodi rekoñese katak Jeová mak merese simu hahiʼi. Kuandu Nabukodonozór sai diʼak fali, nia “fó hahiʼi ba Maromak neʼebé Aas Liu Hotu” no rekoñese katak Jeová nia “ukun mak rohan-laek”. Nia hatutan tan: “La iha ema ida mak bele hapara nia.” (Dan 4:30, 33-35) Depois Daniel nia integridade hetan koko no Jeová salva tiha nia husi leaun kuak, Liurai Dário dehan: “Povu tenke nakdedar no taʼuk iha Daniel nia Maromak nia oin. Tanba nia mak Maromak neʼebé moris no nia iha ba nafatin. Ninia ukun sei nunka lakon, no nia ukun ba nafatin.”—Dan 6:7-10, 19-22, 26, 27.

¹⁵ Ema neʼebé hakerek Salmo ida dehan: “Jeová estraga ona nasaun sira-nia planu; nia sobu ema nia hanoin sira.” Nia hatutan tan: “Ksolok ba nasaun neʼebé adora Jeová nuʼudar ninia Maromak, povu neʼebé Nia hili ona atu sai Ninian.” (Sal 33:10, 12) Ita iha razaun neʼebé loos atu kontinua kaer metin ita-nia integridade ba Jeová!

FUNU IKUS

16. Ita bele fiar metin kona-ba saida durante “terus boot”, no tanbasá? (Haree dezeñu.)

¹⁶ Ita lee ona buat neʼebé Jeová halo iha tempu uluk. Entaun saida mak Jeová sei halo iha futuru? Ita bele fiar metin katak durante “terus boot” neʼebé atu mai, Jeová sei salva ninia povu neʼebé laran-metin. (Mt 24:21; Dan 12:1) Nia sei halo ida-neʼe bainhira grupu nasaun sira katak Gog husi rai-Magog ataka sira neʼebé laran-metin ba Jeová iha mundu tomak. Maski karik grupu neʼe inklui nasaun 193 hotu neʼebé sai nuʼudar membru ba Nasoins Unidas, maibé sira-nia kbiit labele kompara ho Ida neʼebé Aas Liu no mós tropa lalehan nian. Jeová promete: “Haʼu sei fó duni glória ba haʼu-nia an iha nasaun barak nia oin, no halo santu haʼu-nia an, no mós halo sira hatene kona-ba haʼu. Nuneʼe sira sei hatene duni katak haʼu mak Jeová.”—Eze 38:14-16, 23; Sal 46:10.

17. Bíblia fó sai profesia saida kona-ba liurai sira iha rai no saida mak sei akontese ba ema neʼebé hatudu integridade?

¹⁷ Bainhira Gog ataka Jeová nia povu, neʼe sei hamosu funu Armagedon no iha funu neʼe Jeová sei halakon “liurai sira iha mundu tomak”. (Apok 16:14, 16; 19:19-21) “Ema laran-loos deʼit mak sei hela iha rai, no ema neʼebé hatudu nafatin integridade mak sei hela nafatin iha neʼebá.” —Prov 2:21, nota.

ITA TENKE KONTINUA HATUDU INTEGRIDADE

18. Saida mak ema Kristaun barak prontu atu halo, no tanbasá? (Daniel 3:28)

¹⁸ Durante tinan barak, ema Kristaun barak prontu atu lakon sira-nia liberdade no mós tau sira-nia moris iha perigu laran tanba sira hadomi Jeová nuʼudar sira-nia Ukun-Naʼin neʼebé Aas Liu. Sira kaer metin ba sira-nia integridade hanesan joven Ebreu naʼin-tolu neʼebé kontinua laran-metin ba Ida neʼebé Aas Liu, no nia salva sira husi fornu neʼebé ahi lakan makaʼas.—Lee Daniel 3:28.

19. Jeová sei tesi-lia ba ninia povu bazeia ba saida, no ita presiza halo saida agora?

¹⁹ Liurai David hakerek katak importante atu kaer metin ita-nia integridade ba Maromak. Nia dehan: “Jeová sei tesi-lia ba ema hotu. Oh Jeová, tesi-lia ba haʼu tuir haʼu-nia hahalok loos no tuir haʼu-nia integridade.” (Sal 7:8, nota) David mós hakerek: “Haʼu harohan katak haʼu-nia integridade no laran-loos sei proteje haʼu.” (Sal 25:21, nota) Dalan diʼak liu atu halaʼo moris mak hodi kontinua laran-metin ba Jeová no mantein ita-nia laran-metin maski ita hasoru situasaun naran deʼit! Hodi halo nuneʼe, ita sei sente hanesan ema neʼebé hakerek Salmo ida neʼebé dehan: “Ksolok ba sira neʼebé hatudu nafatin integridade . . . , sira neʼebé halo tuir Jeová nia ukun-fuan.”—Sal 119:1, nota.