Pergunta husi lee-naʼin
Bainhira mak ita sei para atu haklaken liafuan diʼak?
Jesus hatete: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.” (Mt 24:14) Liafuan Gregu neʼebé tradús nuʼudar “rohan” iha versíkulu neʼe no mós iha versíkulu 6 no 13 mak telos. Liafuan neʼe refere ba tempu neʼebé Satanás nia mundu sei lakon iha funu Armagedon. (Apok 16:14, 16) Neʼe katak ita sei kontinua haklaken liafuan diʼak toʼo tempu neʼebé besik loos ona ba mundu nia rohan. Hodi komprende eskritura neʼe bele hadiʼa ita-nia kumpriensaun uluk nian.
Uluk ita komprende katak ita sei para haklaken liafuan diʼak bainhira Babilónia Boot lakon no terus boot hahú. (Apok 17:3, 5, 15, 16) Ita fiar katak bainhira terus boot hahú ona, Jeová sei la fó tan oportunidade ba ema atu simu liafuan diʼak. (Isa 61:2) Ita mós hanoin katak ema neʼebé moris liu terus boot mak ema neʼebé hatudu ona sira-nia laran-metin ba Jeová antes terus boot hahú. Ita kompara sira hanesan ema Judeu neʼebé moris liu tempu neʼebé Jeruzalein naksobu iha tinan 607 AEC. Ema Judeu sira-neʼe hetan ona marka iha sira-nia reen-toos atu bele hetan salvasaun tanba antes neʼe sira adora Jeová no odi hahalok aat. (Eze 5:11; 9:4) Maibé, komparasaun neʼe la tuir duni Jesus nia liafuan iha Mateus 24:14, neʼebé hatudu katak karik ema sei iha oportunidade atu simu liafuan diʼak toʼo tempu neʼebé besik loos ona ba mundu nia rohan iha Armagedon.
Tanba ita-nia kumpriensaun kona-ba Mateus 24:14 sai klaru, presiza mós halo mudansa ba kumpriensaun kona-ba mensajen hanesan jelu-fatuk boot iha Apokalipse 16:21. Tuir loloos, eskritura rua neʼe apoia malu tanba neʼe iha ligasaun metin ho ema nia atitude ba mensajen kona-ba Maromak nia Ukun. Apóstolu Paulo hakerek katak, ba “sira neʼebé atu hetan salvasaun”, mensajen neʼe mak liafuan diʼak hanesan ‘buat morin neʼebé sei lori ba moris’. Maibé ba ema neʼebé kontra Maromak, neʼe mak hanesan ‘iis neʼebé lori ba mate’. (2 Kor 2:15, 16, nota) Sira odi mensajen neʼe tanba fó sai katak sira mak parte husi Satanás nia mundu neʼebé aat, no lakleur tan sei lakon ba nafatin.—João 7:7; 1 João 2:17; 5:19.
Apokalipse 16:21 mós fó sai katak jelu-fatuk neʼe mak “boot tebetebes”. Neʼe katak durante terus boot, karik serbisu haklaken sei lori impaktu boot liután ba ema, tanba sira sei hatene liután kona-ba Jeová nia naran neʼebé santu. (Eze 39:7) Entaun, depois Babilónia Boot lakon tiha, iha ka lae ema ruma neʼebé sei simu mensajen kona-ba Maromak nia Ukun nuʼudar buat neʼebé morin? Karik iha. Karik sira sei hanoin-hetan ka rekoñese katak antes neʼe Testemuña ba Jeová koʼalia ona kona-ba Babilónia Boot sei lakon.
Neʼe hanesan ho buat neʼebé akontese ba ema Ejitu iha Moisés nia tempu. Bainhira Jeová hamosu Susar Sanulu hodi “tesi-lia no fó kastigu ba maromak hotu iha rai-Ejitu”, “ema barak neʼebé laʼós ema Izraél” deside atu bá hamutuk ho Jeová nia povu. (Éx 12:12, 37, 38) Karik ema estranjeiru sira-neʼe komesa tau fiar ba Jeová bainhira haree katak Moisés nia avizu kona-ba Susar Sanulu sai loos.
Ema neʼebé tau fiar ba Jeová depois Babilónia Boot lakon sei hetan oportunidade atu apoia Kristu nia alin sira neʼebé sei hela iha rai. (Mt 25:34-36, 40) Maibé, bainhira Jesus nia alin hotu saʼe ona ba lalehan antes funu Armagedon hahú, ema sei la iha tan oportunidade atu hetan tesi-lia nuʼudar bibi-malae.
Kumpriensaun foun neʼe hatudu sai ho klaru liután kona-ba Jeová nia domin neʼebé boot no laran-sadiʼa. Sin, Jeová “lakohi ema ida lakon maibé nia hakarak ema hotu atu arrepende sala”.—2 Ped 3:9.