Maski haʼu moedór, haʼu sai misionária ida

Haʼu moris iha tinan 1951 iha Vienna, Áustria. Haʼu-nia inan-aman mak Katólika. Haʼu mak moedór, maibé haʼu fiar Maromak no sempre halo orasaun. Bainhira haʼu tinan sia, apá komesa estuda Bíblia ho Testemuña ba Jeová, no lakleur amá mós estuda.

Lakleur ami sai parte ba kongregasaun Döbling iha Vienna. Nuʼudar família, ami halo buat barak hamutuk. Ami lee no estuda Bíblia, tuir reuniaun, no halo serbisu voluntáriu iha asembleia. Durante tempu neʼe, haʼu-nia apá ajuda haʼu atu haburas domin ba Jeová. Nia sempre halo orasaun atu haʼu no haʼu-nia alin-feto sai pioneiru. Maibé haʼu la iha hakarak atu sai pioneiru.

KOMESA SERBÍ TEMPU-TOMAK

Haʼu hetan batizmu iha 1965 kuandu haʼu tinan 14. Maibé, haʼu sente susar atu haklaken ba ema neʼebé haʼu la koñese. Haʼu sempre sente katak haʼu la iha folin no hakarak tebes atu joven seluk simu haʼu. Tan neʼe, lakleur depois hetan tiha batizmu, haʼu komesa habelun ho ema neʼebé la serbí Jeová. Maski haʼu gosta ransu ho sira, maibé haʼu sente la diʼak tanba gasta tempu barak ho sira. Maibé haʼu labele para atu ransu ho sira. Saida mak ajuda haʼu?

Tempu neʼebá, feto joven ida ho tinan 16 naran Dorothée sai haklaken-naʼin. Haʼu hakfodak ho ninia laran-manas kona-ba haklaken. Haʼu idade boot liu nia uitoan, maibé haʼu ladún bá haklaken. Haʼu hanoin: ‘Haʼu-nia inan-aman Testemuña, maibé Dorothée la iha família neʼebé iha lia-loos. Nia tenke tau matan ba ninia amá neʼebé moras, maibé nia sempre bá haklaken!’ Ninia ezemplu motiva haʼu atu halo buat barak liután ba Jeová. Lakleur, ami serbí hamutuk nuʼudar pioneiru estra, no tuirmai nuʼudar pioneiru regulár. Dorothée nia laran-manas book tebes haʼu. Nia ajuda haʼu atu hahú estuda Bíblia ho haʼu-nia estudante primeiru. Ikusmai, haʼu mós komesa sente laran-manas atu haklaken husi uma ba uma, iha dalan, no iha situasaun seluk.

Bainhira haʼu serbí nuʼudar pioneiru ba fulan balu, irmaun ida naran Heinz muda mai ami-nia kongregasaun. Nia aprende lia-loos iha Kanadá bainhira nia vizita ninia maun neʼebé Testemuña. Nia hetan knaar atu serbí nuʼudar pioneiru espesiál iha ami-nia kongregasaun. Haʼu laran-monu kedas ba nia. Maibé nia hakarak sai misionáriu no haʼu la iha hakarak atu sai misionária. Tan neʼe, foufoun haʼu subar haʼu-nia sentimentu. Maibé ikusmai, haʼu no Heinz komesa namora, kaben, no serbí hamutuk nuʼudar pioneiru.

PLANU ATU SAI MISIONÁRIU

Dala barak, Heinz fó sai ninia hakarak atu sai misionáriu. Maski nia nunka obriga haʼu, maibé nia ajuda haʼu atu hanoin kona-ba planu neʼe hodi husu pergunta hanesan: “Tanba ita la iha oan, ita bele halo buat barak liután ba Jeová ka lae?” Maski haʼu mak pioneiru, maibé atu serbí nuʼudar misionária mak susar tebes ba haʼu tanba haʼu mak moedór. Maibé, Heinz kontinua ajuda haʼu atu hanoin kona-ba neʼe. Nia mós anima haʼu atu fokus ba ema seluk duké haʼu-nia an. Ninia liafuan ajuda tebes haʼu.

Neineik-neineik, haʼu haburas haʼu-nia hakarak atu serbí nuʼudar misionária, tan neʼe ami prenxe formuláriu atu tuir Eskola Gilead. Maibé, irmaun neʼebé tau matan ba sukursál hatete katak diʼak liu haʼu aprende uluk língua Inglés. Tan neʼe, haʼu hakaʼas an atu aprende Inglés. Maibé liutiha tinan tolu, ami hakfodak tanba derrepente deʼit ami simu knaar atu serbí iha kongregasaun ho língua Iugoslavu iha Salzburg, Áustria. Ami haklaken ho língua Iugoslavu ba tinan hitu, inklui serbí nuʼudar katuas área ba tinan ida. Língua neʼe mak susar, maibé ami iha estudante Bíblia barak.

Iha tinan 1979, irmaun sira husi sukursál husu ami atu bá vizita Bulgária. Tanba governu bandu serbisu haklaken iha neʼebá, entaun sira haruka ami atu finje bá pasiar no lori livru kiʼik ba irmán naʼin-lima neʼebé hela iha sidade kapitál, Sofia. Haʼu taʼuk tebes, maibé Jeová ajuda haʼu atu kumpre knaar neʼe. Irmán naʼin-lima neʼe aten-brani no kontente maski polísia bele kaer sira no hatama ba komarka. Sira-nia ezemplu anima tebes haʼu atu halo buat naran deʼit neʼebé Jeová nia organizasaun husu.

Liutiha tempu balu, ami prenxe fali formuláriu ba Eskola Gilead, no ami hetan konvite. Ami hanoin katak ami sei tuir eskola iha língua Inglés iha Estadus Unidus. Maibé iha Novembru 1981, Jeová nia organizasaun halaʼo Eskola Gilead primeiru iha Alemaña. Tanba eskola neʼe halaʼo iha língua Alemaun, neʼe halo fasil ba haʼu atu komprende. Entaun, ami sei hetan knaar iha neʼebé?

SERBÍ IHA NASAUN NEʼEBÉ NAKONU HO VIOLÉNSIA

Ami hetan knaar iha Kénia! Maibé sukursál Kénia husu ami se ami prontu atu serbí iha Uganda ka lae. Maizumenus tinan sanulu antes neʼe, militár nia boot ida naran Idi Amin mak hadau governu iha Uganda. Durante ninia ukun, ema rihun ba rihun mate no ema barak moris susar. Tuirmai iha tinan 1979, ema neʼebé kontra Idi Amin mak hadau fali governu. Neʼe halo haʼu taʼuk atu muda ba Uganda. Maibé Eskola Gilead prepara ona ami atu tau fiar ba Jeová. Tan neʼe, ami hatete ami prontu.

Situasaun iha Uganda mak susar tebes. Iha Buku Tahunan 2010, Heinz konta: “Governu ladún iha kapasidade atu oferese bee, eletrisidade, buat báziku seluk tan, no ami mós labele telefone malu. . . . Ema tiru malu no naʼok sasán, liuliu iha kalan. . . . Tan neʼe kuandu rai nakukun ona, ema hotu tama ba uma laran no hein ka halo orasaun atu ema la mai naʼok sasán ka oho sira.” Maski hasoru susar, irmaun-irmán sira iha Uganda nafatin mantein sira-nia espiritualidade!

Iha tinan 1982, Heinz no haʼu toʼo iha Kampala, Uganda nia sidade kapitál. Durante fulan lima primeiru, ami hela iha irmaun Sam no irmán Christina Waiswa nia uma hamutuk ho sira-nia oan naʼin-lima no família naʼin-haat. Família Waiswa dala barak han loron ida dala ida deʼit, maibé sira sempre prontu atu fahe buat neʼebé sira iha ba ami. Durante hela hamutuk família Waiswa, ami aprende buat barak neʼebé ajuda ami, porezemplu oinsá atu uza bee uitoan deʼit atu hariis no uza bee neʼebé hanesan atu rega sentina. Iha tinan 1983, Heinz no haʼu muda ba uma iha área neʼebé seguru.

Ami hadomi serbisu haklaken iha Kampala. Haʼu hanoin-hetan, iha fulan ida nia laran ami fahe revista 4.000! Maibé buat neʼebé furak liu mak kuandu haree ema simu lia-loos. Sira respeitu Maromak no hakarak koʼalia kona-ba Bíblia. Baibain, ami ida-idak iha estudu Bíblia 10 toʼo 15. No ami aprende buat barak husi estudante sira. Porezemplu, maski semana-semana sira tenke laʼo ain atu tuir reuniaun, sira nunka muramura no sempre oin-midar.

Iha 1985 no 1986, akontese funu rua tan iha Uganda. Dala barak ami haree soldadu sira neʼebé sei labarik no lori kilat ka halo pasa-revista. Durante tempu neʼebá, ami halo orasaun atu iha matenek no kalma hodi bele hetan ema neʼebé interese. No Jeová hatán ami-nia orasaun. Dala barak ami haluha tiha ami-nia taʼuk kuandu ami hasoru ema neʼebé interese ba lia-loos.

Ami mós kontente haklaken ba ema estranjeiru. Porezemplu, ami hasoru doutór ida naran Murat Ibatullin no ninia feen Dilbar, sira husi Tatarstan (Rúsia Sentrál). Ami halaʼo estudu ho feen-laʼen neʼe. Ikusmai sira hetan batizmu no serbí Jeová ho laran-metin. Haʼu mós hasoru feto ida husi Ukránia naran Tatjana Vileyska neʼebé hakarak atu oho an. Depois Tatjana hetan tiha batizmu, nia fila fali ba Ukránia no halo serbisu tradusaun ba ita-nia publikasaun sira.a

KNAAR FOUN

Iha tinan 1991 kuandu ami feriadu hela iha Áustria, sukursál Áustria kontaktu ami no fó-hatene kona-ba ami-nia knaar foun, neʼe mak iha Bulgária. Depois governu komunista iha Europa Leste monu, Testemuña ba Jeová hetan liberdade atu haklaken iha Bulgária. Hanesan temi tiha ona, uluk ami lori publikasaun subasubar ba nasaun neʼe, maibé agora ami simu knaar atu haklaken iha neʼebá.

Irmaun sira haruka ami bá kedas Bulgária, tan neʼe ami la konsege fila ba ami-nia uma iha Uganda atu haloot sasán ka fó adeus ba belun sira. Ami bá Betel iha Alemaña, no hetan karreta hodi bá Bulgária. Ami simu knaar atu serbí iha grupu kiʼik ida ho haklaken-naʼin maizumenus 20 iha sidade Sofia.

Ami hasoru dezafiu balu iha Bulgária. Primeiru, ami la hatene língua. Segundu, ami iha deʼit livru rua neʼebé tradús ba língua Búlgaru, neʼe mak Kebenaran yang Membimbing kepada Hidup yang Kekal no Livru Istória husi Bíblia. Terseiru, ami sente susar atu hahú estuda Bíblia. Maski nuneʼe, ami-nia grupu kiʼik neʼe haklaken ho laran-manas. Igreja Ortodoksu nota ida-neʼe, no komesa fó-terus mai ami.

Iha tinan 1994, governu la rekoñese tan Testemuña ba Jeová nuʼudar relijiaun ida, no ema Bulgária barak hanoin katak ami mak grupu relijiaun neʼebé perigu. Polísia kaer irmaun balu. Média fó sai informasaun falsu hodi hatete katak Testemuña sira oho labarik no book maluk Testemuña atu oho an. Susar tebes ba ami atu haklaken. Dala barak ami hasoru ema neʼebé hirus no hakilar ami, bolu polísia, no tuda ami ho sasán. Ami mós labele hetan publikasaun sira, no susar atu aluga fatin hodi halaʼo reuniaun. Dala ida polísia mai hapara ami-nia reuniaun boot. Ami nunka hasoru ema neʼebé odi ami hanesan neʼe. Neʼe diferente tebes ho ema iha Uganda neʼebé prontu atu estuda Bíblia! Saida mak ajuda ami atu tahan?

Ami kontente bainhira ransu ho irmaun-irmán sira iha Bulgária. Sira kontente tanba hetan lia-loos no hafolin tebes buat neʼebé ami halo ba sira. Ema hotu tau matan no apoia malu. Liuhusi esperiénsia neʼe, ami aprende katak ami bele sente kontente iha knaar naran deʼit se ami fokus liu ba ema seluk duké ami-nia problema.

Liutiha tinan balu, situasaun sai diʼak. Ita-nia organizasaun hetan fali rejistu iha 1998, no lakleur deʼit ami bele hetan publikasaun barak iha língua Búlgaru. Tuirmai, iha 2004 organizasaun harii edifísiu foun ba sukursál. Ohin loron, iha kongregasaun 57 no haklaken-naʼin 2.953 iha Bulgária. No iha 2024, ema naʼin-6.475 mak tuir Memoriál. Uluk iha deʼit irmán naʼin-lima iha Sofia, maibé agora ami iha kongregasaun sia! Ami haree duni katak “sira neʼebé uitoan . . . sai rihun ida”.—Isa 60:22.

TAHAN HASORU SUSAR

Haʼu iha problema barak ho haʼu-nia saúde. Dala barak doutór hetan tumór iha haʼu-nia isin, inklui ida iha kakutak. Haʼu hetan tratamentu radiasaun no mós hetan operasaun iha Índia ba oras-12 atu hasai tumór iha haʼu-nia kakutak, maibé la konsege hasai hotu. Tuirmai ami hela ba tempu balu iha sukursál Índia, no kuandu haʼu-nia kondisaun diʼak uitoan, ami fila ba Bulgária.

Durante tempu neʼe, Heinz kona moras úniku ida naran Huntington neʼebé nia hetan husi ninia inan-aman. Moras neʼe halo susar ba nia atu laʼo, koʼalia, no book an. Nuʼudar ninia moras sai aat liután, haʼu mós presiza ajuda nia liután. Dala ruma, haʼu kole tebes no hanoin barak kona-ba ami-nia situasaun iha futuru. Maibé, irmaun joven ida naran Bobi sempre konvida Heinz atu haklaken hamutuk. Bobi la moe kona-ba Heinz nia dalan atu koʼalia no book an. Haʼu sempre husu Bobi nia ajuda kuandu presiza. Maski Heinz no haʼu deside atu la iha oan hodi bele serbí Jeová liután, ami sente katak Jeová fó Bobi mai ami nuʼudar oan ida!—Mc 10:​29, 30.

Heinz mós kona moras kankru, no ikusmai mate iha tinan 2015. Haʼu hanoin tebes haʼu-nia laʼen. Nia sempre ajuda haʼu atu la hanoin barak. Tan neʼe, susar tebes mai haʼu atu simu realidade. Maibé iha haʼu-nia neon, nia moris hela! (Lc 20:38) Haʼu sempre hanoin kona-ba ninia liafuan neʼebé hatoʼo ho laran-diʼak no ninia matadalan. Haʼu agradese tebes ba tinan barak neʼebé ami serbí Jeová hamutuk ho laran-metin.

AGRADESE BA JEOVÁ NIA AJUDA

Jeová ajuda duni haʼu durante haʼu-nia susar hotu. Nia mós ajuda haʼu atu manán hasoru sentimentu moe no sai misionária neʼebé hadomi ema seluk. (2 Tim 1:7) Ho Jeová nia ajuda, agora haʼu no haʼu-nia alin-feto serbí tempu-tomak. Nia ho ninia laʼen serbí nuʼudar katuas área iha kongregasaun neʼebé koʼalia língua Sérviu iha Europa. Jeová hatán duni orasaun neʼebé haʼu-nia apá hatoʼo iha tinan barak liubá!

Haʼu mós sente dame bainhira estuda Bíblia. Iha tempu susar, haʼu aprende atu “harohan ho laran tomak”, hanesan Jesus. (Lc 22:44) Dalan ida neʼebé Jeová hatán haʼu-nia orasaun mak liuhusi domin no laran-diʼak husi irmaun-irmán sira iha kongregasaun iha Nadezhda, Sofia. Sira konvida haʼu atu ransu hamutuk no sempre hatete katak sira hadomi haʼu. Neʼe halo haʼu kontente tebes.

Haʼu sempre hanoin kleʼan kona-ba moris-hiʼas. Haʼu imajina katak haʼu haree haʼu-nia inan-aman iha uma oin, sira haree joven hanesan tempu neʼebé sira foin kaben, no haʼu-nia alin-feto prepara hahán. Haʼu mós imajina Heinz hamriik besik ninia kuda. Hodi halo hanesan neʼe bele halakon haʼu-nia sentimentu negativu no sente agradese tebes ba Jeová.

Bainhira haʼu hanoin kona-ba haʼu-nia moris no kona-ba futuru, haʼu sente hanesan buat neʼebé David hatete iha Salmo 27:​13, 14: “Se haʼu la fiar katak haʼu bele haree Jeová nia laran-diʼak iha ema moris nia leet, agora haʼu iha neʼebé? Tau esperansa ba Jeová; sai aten-brani no sai forte bá. Sin, tau esperansa ba Jeová.”