Jeová ajuda ami atu sente kontente iha fatin naran deʼit

Irmaun Mats no irmán Ann-Catrin tuir eskola Gilead iha tinan 1979 no depois neʼe sira serbí iha Iraun, Maurísia, Mianmar, Tanzánia, Uganda, no Zaíre. Iha eskola neʼe sira-nia instrutór ida mak irmaun Jack Redford, no nia fó matadalan ba sira atu simu mudansa no kontente iha fatin naran deʼit. Mai ita buka-hatene oinsá matadalan neʼe ajuda sira.

Ulukliu favór fó-hatene ami oinsá imi hetan lia-loos.

Mats: Haʼu-nia apá hela iha Polónia durante Funu Mundiál Segundu, no nia haree igreja Katólika halo hahalok aat barak. Maski nuneʼe, nia hatete beibeik: “Tenkesér iha relijiaun neʼebé loos!” Ikusmai haʼu rekoñese katak apá nia liafuan neʼe loos duni. Haʼu hola livru tuan barak no ida mak livru azúl ho títulu Kebenaran Yang Membimbing Kepada Hidup Yang Kekal. Títulu neʼe dada haʼu-nia atensaun, no haʼu lee hotu iha kalan neʼe kedas. Dadeer tuirmai, haʼu hatene katak haʼu hetan ona lia-loos!

Husi Abríl 1972, haʼu lee livru barak tan husi Testemuña ba Jeová no hetan resposta ba pergunta sira kona-ba Bíblia. Haʼu hanesan negósiu-naʼin husi Jesus nia ilustrasaun neʼebé faʼan buat hotu neʼebé nia iha hodi sosa pérola ida neʼebé folin-boot. Haʼu mós husik haʼu-nia planu atu bá universidade no sai doutór hodi nuneʼe haʼu bele “sosa” lia-loos neʼebé folin-boot. (Mt 13:​45, 46) Haʼu hetan batizmu iha data 10 Dezembru 1972.

La toʼo tinan ida, haʼu-nia inan-aman no alin-mane mós hetan batizmu. Iha Jullu 1973, haʼu komesa serbí nuʼudar pioneiru regulár. Iha ami-nia kongregasaun, iha irmán pioneiru ida neʼebé bonita no hadomi tebes Jeová, ninia naran Ann-Catrin. Ami kaben iha tinan 1975, depois neʼe, durante tinan haat ami serbí iha Strömsund, neʼe mak knua ida neʼebé furak no ema barak hafolin lia-loos.

Ann-Catrin: Haʼu-nia apá aprende lia-loos iha Stockholm bainhira besik atu remata universidade. Iha tempu neʼebá, haʼu foin fulan tolu, maibé nia sempre lori haʼu ba reuniaun no haklaken. Amá la gosta ida-neʼe no koko atu prova katak Testemuña mak sala. Maibé nia la susesu, no ikusmai nia mós hetan batizmu. Haʼu hetan batizmu bainhira tinan 13, no komesa pioneiru bainhira tinan 16. Depois serbí tiha iha Umeå, neʼebé presiza haklaken-naʼin barak liután, haʼu sai pioneiru espesiál.

Depois ami kaben, ami hetan ksolok hodi ajuda ema balu aprende lia-loos. Sira ida mak Maivor, nia mak feto joven neʼebé prontu husik oportunidade atu hetan susesu iha desportu no serbí nuʼudar pioneiru hamutuk ho haʼu-nia alin-feto. Sira tuir eskola Gilead iha tinan 1984 no agora serbí nuʼudar misionária iha Ekuadór.

Saida mak ajuda imi atu adapta no kontinua kontente ho imi-nia knaar?

Mats: Ami sempre muda ba fatin oioin. Maibé buat neʼebé ajuda ami mak hodi hakaʼas an banati-tuir Jesus, liuliu ninia haraik an. (Kol 2:​6, 7) Porezemplu, duké hein ba irmaun-irmán sira atu adapta ho ami, ami koko atu komprende sira-nia hanoin no kultura. Kuandu ami banati-tuir Jesus, neʼe halo fasil ba ami atu adapta no kontente ho ami-nia knaar.—Sal 1:​2, 3.

Ann-Catrin: Hanesan loro-matan bele ajuda ai-hun atu buras maski kuda iha fatin neʼebé foun, nuneʼe mós Jeová sai hanesan “ami-nia loro-matan” bainhira ami muda ba fatin foun. (Sal 84:11) Nia ajuda ami liuhusi irmaun-irmán sira. Porezemplu, iha ami-nia kongregasaun kiʼik iha Tehran, Iraun, irmaun-irmán sira hatudu laran-luak mai ami hanesan ema hatudu iha Bíblia nia tempu. Ami kontente atu hela iha Iraun, maibé iha Jullu 1980, governu bandu Testemuña no haruka ami sai husi rai neʼe iha oras 48 nia laran. Tuirmai, ami hetan knaar iha Zaíre (agora mak Kongu) iha Áfrika.

Kuandu haʼu hatene katak ami-nia knaar foun mak iha Áfrika, haʼu tanis. Haʼu rona kona-ba samea no moras oioin iha Áfrika no neʼe halo haʼu taʼuk. Maibé feen-laʼen ida neʼebé serbí ona iha Áfrika ba tinan barak hatete: “Imi seidauk bá neʼebá! Keta taʼuk, imi sei gosta.” No sira koʼalia loos! Irmaun-irmán sira mak laran-diʼak no hadomi malu. Liutiha tinan neen, bainhira ami presiza sai husi Zaíre tanba governu bandu, haʼu sente komik tanba haʼu halo orasaun hodi dehan: “Favór ajuda ami atu hela nafatin iha Áfrika.”

Bensaun saida deʼit mak imi hetan?

Mats: Tanba ami-nia knaar, ami hetan belun misionáriu barak husi fatin oioin. No mós iha knaar balu, ami hetan estudante barak, dala ruma ami ida-idak iha estudu maizumenus 20! Ami mós nunka haluha irmaun-irmán sira iha Áfrika nia domin no laran-luak. Bainhira ami vizita kongregasaun sira iha Tanzánia, ami para ami-nia karreta iha irmaun-irmán sira-nia uma sorin no toba iha karreta laran. Irmaun-irmán sira hatudu laran-luak neʼebé “liu fali sira-nia kbiit”. (2 Kor 8:3) Buat ida tan neʼebé espesiál ba ami mak tempu atu konta istória. Ami-nia toman mak kalan antes toba, haʼu no Ann-Catrin tuur hamutuk no konta kona-ba buat neʼebé akontese iha loron neʼe, no ami hatoʼo agradese ba Jeová tanba Nia tau matan ba ami.

Ann-Catrin: Haʼu mós hetan ksolok hodi koñese irmaun-irmán sira husi nasaun oioin. Ami aprende língua foun, inklui Farsi, Fransés, Luganda, no Suahili, no aprende mós kultura oioin. Ami ajuda irmaun-irmán foun sira, sai belun diʼak, no serbí Jeová hamutuk “ho unidade”.—Sof 3:9.

Ami mós haree Jeová nia kriasaun furak oioin. Kadavés ami hetan knaar foun, ami sente Jeová mak dirije ami-nia viajen. Nia fó mai ami esperiénsia neʼebé ami nunka bele hetan se ami la sai misionáriu.

Susar saida deʼit mak imi hasoru, no saida mak ajuda imi tahan?

Mats: Ami kona moras oioin inklui malária. No Ann-Catrin hetan operasaun urjente ba dala balu. Ami mós hanoin barak kona-ba ami-nia inan-aman neʼebé idade. Ami agradese ba ami-nia alin sira neʼebé tau matan ba ami-nia inan-aman ho pasiénsia, ksolok, no domin. (1 Tim 5:4) Ami mós halo buat neʼebé ami bele atu apoia ami-nia família husi dook, maibé dala ruma ami sente triste tanba ami hakarak halo buat barak liután ba ami-nia inan-aman.

Ann-Catrin: Iha tinan 1983 bainhira ami iha Zaíre, haʼu kona moras kólera no neʼe aat tebes. Doutór hatete ba Mats: “Lori kedas ó-nia feen ba rai liʼur!” Loron tuirmai, ami saʼe aviaun hodi bá Suésia.

Mats: Ami hanoin katak ami labele tan serbí nuʼudar misionáriu, tan neʼe ami tanis. Doutór hatete katak Ann-Catrin sei la sai diʼak, maibé neineik-neineik nia sai diʼak. Liutiha tinan ida, ami fila fali ba Zaíre, no ami hetan knaar atu serbí iha kongregasaun kiʼik iha Lubumbashi neʼebé koʼalia língua Suahili.

Ann-Catrin: Bainhira serbí iha Lubumbashi, haʼu sai isin-rua, maibé lakleur abortu. Maski ami la iha planu atu iha bebé, maibé haʼu triste tebetebes bainhira ami-nia bebé mate. Maibé durante tempu susar neʼe, Jeová fó ami prezente boot. Ami hetan estudante Bíblia barak liu. La toʼo tinan ida, haklaken-naʼin iha ami-nia kongregasaun aumenta husi naʼin-35 ba 70. Ema neʼebé tuir reuniaun aumenta husi naʼin-40 ba 220. Neʼe halo ami okupadu tebes, no Jeová nia bensaun halo ami sente kontente. Toʼo agora, ami sei koʼalia kona-ba ami-nia bebé. Ami hein ba tempu neʼebé Jeová kura ami-nia laran-kanek ho kompletu iha mundu foun.

Mats: Liutiha neʼe, Ann-Catrin sai fraku tebes no kole. Iha tempu hanesan, haʼu hetan kankru estádiu haat iha tee-oan no hetan operasaun boot. Maibé agora haʼu diʼak, no Ann-Catrin mós halo buat hotu neʼebé nia bele atu serbí Jeová.

Ami rekoñese katak laʼós ami deʼit mak hetan susar. Iha tinan 1994, ema barak tebes mak mate iha Ruanda tanba oho malu. Depois neʼe, ami vizita irmaun-irmán sira iha kampu refujiadu balu. Ami haree ho matan rasik oinsá sira tahan, hatudu fiar, no laran-luak ba malu, no neʼe hanorin ami katak Jeová iha kbiit atu tau matan ninia povu iha situasaun naran deʼit.—Sal 55:22.

Ann-Catrin: Ami mós hetan susar boot bainhira ami tuir inaugurasaun ba sukursál iha Uganda iha tinan 2007. Depois programa remata, ami halo viajen hamutuk ho misionáriu no ema Betel maizumenus naʼin-25 atu bá Nairobi, Kénia. Bainhira besik fronteira atu tama ba Kénia, trek boot ida xoke ami-nia bís oin. Kondutór no ami-nia belun naʼin-lima mate kedas iha fatin, no irmán ida mate depois toʼo tiha ospitál. Ami hakarak tebes atu hasoru fali ami-nia belun sira!—Job 14:​13-15.

Haʼu-nia kanek fíziku nian diʼak ona. Maibé haʼu, Mats, no mós ema seluk sei iha trauma depois asidente neʼe. Haʼu sai pániku iha kalan no sente hanesan kona atakasaun fuan. Neʼe halo ami taʼuk. Maibé hodi halo orasaun ba Jeová no hanoin kona-ba ami-nia eskritura favoritu balu, ajuda ami atu sente kalma. Ami mós konsulta ho doutór espesialista, no neʼe ajuda tebes. Agora ami-nia sintoma sai diʼak liu, no ami kontinua husu Jeová atu fó kmaan ba ema seluk neʼebé iha situasaun hanesan ho ami.

Bainhira imi esplika oinsá imi konsege tahan susar, imi hatete katak Jeová lori imi hanesan “manu-tolun”. Neʼe katak sá?

Mats: Iha lian Suahili, iha fraze neʼebé dehan, “Ema tau matan ba ami hanesan lori manu-tolun”. Baibain ema lori manu-tolun ho kuidadu atu labele nakfera. Nuneʼe mós ho Jeová, nia tau matan didiʼak ba ami iha ami-nia knaar hotu. Ami sempre iha buat neʼebé ami presiza, tuir loloos liu fali buat neʼebé ami presiza. Dalan ida neʼebé ami sente Jeová nia domin no apoiu mak liuhusi Grupu Administradór neʼebé hatudu laran-diʼak mai ami.

Ann-Catrin: Haʼu hakarak konta kona-ba ezemplu ida oinsá Jeová ajuda ami. Loron ida, haʼu simu telefone no rona katak haʼu-nia apá moras todan no baixa iha ospitál. Mats foin sai diʼak husi malária. Ami-nia osan la toʼo atu sosa tiket aviaun atu bá Suésia, tan neʼe ami deside atu faʼan ami-nia karreta. Lakleur, feen-laʼen ida telefone ami tanba sira rona kona-ba ami-nia situasaun no hakarak sosa tiket ba ema ida. Depois neʼe, irmán ferik ida telefone ami, nia rai osan balu iha kaixa neʼebé hakerek “Ba ema neʼebé presiza”. Iha minutu balu nia laran deʼit, Jeová ajuda ami atu bele hetan tiket!—Ebr 13:6.

Bainhira hanoin fali kona-ba tinan 50 neʼebé imi serbí Jeová tempu-tomak, imi aprende saida?

Ann-Catrin: Haʼu aprende katak ami bele hetan forsa bainhira ami “kalma nafatin no tau fiar” ba Jeová. Bainhira ami halo nuneʼe, ami la presiza luta tanba Jeová sei luta ba ami. (Isa 30:15; 2 Krón 20:​15, 17) Tanba ami hakaʼas an atu serbí Jeová ho laran tomak, ami hetan bensaun barak neʼebé ami labele hetan husi dalan seluk.

Mats: Lisaun importante liu neʼebé haʼu aprende mak atu sadere ba Jeová iha situasaun hotu no haree oinsá nia ajuda haʼu. (Sal 37:5) Jeová sempre ajuda haʼu hanesan nia promete ba ninia atan hotu. Ami kontinua sente Jeová nia ajuda toʼo ohin loron nuʼudar ami halaʼo ami-nia knaar iha Betel Mianmar.

Ami espera katak joven sira neʼebé hakarak aumenta liután sira-nia serbisu ba Jeová mós sei sente Ninia domin neʼebé laran-metin hanesan ami sente. Ami fiar katak sira bele hetan esperiénsia hanesan neʼe se sira sadere ba Jeová nia ajuda maski halo knaar iha fatin naran deʼit.