Ferik-katuas sira—Imi iha folin boot ba kongregasaun

Karik Ita mós labele halo buat barak tanba Ita-nia idade aumenta. No maski Ita serbí Jeová ho laran-metin ba tinan barak ona, dala ruma Ita iha hanoin negativu kona-ba Ita-nia an. Porezemplu, Ita sente laran-kraik kuandu kompara Ita-nia an agora ho tempu pasadu. Se nuneʼe, oinsá Ita bele hetan fali ksolok?

JEOVÁ HAKARAK ITA ATU HALO SAIDA?

Husu Ita-nia an: ‘Jeová hakarak haʼu atu halo saida?’ Ita bele hetan kmaan husi Deuteronómio 6:​5, neʼebé hatete: “Imi tenke hadomi Jeová, imi-nia Maromak, ho imi-nia laran tomak, ho imi-nia moris tomak no ho imi-nia kbiit tomak.”

Tuir eskritura neʼe, Jeová hakarak Ita atu serbí nia ho Ita-nia laran, moris, no kbiit tomak. Neʼe ajuda Ita atu la kompara Ita-nia an ho ema seluk, ka kompara buat neʼebé Ita bele halo agora ho buat neʼebé uluk Ita halo.

Hanoin toʼok: Bainhira Ita seidauk idade, saida mak Ita halo ona ba Jeová? Karik Ita hakaʼas an atu serbí Jeová ho laran tuir Ita-nia kbiit iha tempu neʼebá. No Ita serbí Jeová hodi halo buat hotu neʼebé Ita bele tuir Ita-nia kbiit agora. Hodi iha hanoin hanesan neʼe bele ajuda Ita atu haree katak Ita sempre halo buat barak ba Jeová. Sin, Ita fó buat neʼebé diʼak liu ba Jeová husi uluk toʼo ohin loron.

ITA BELE AJUDA EMA SELUK

Ita mós bele hanoin kona-ba neʼe: Duké fokus ba buat neʼebé Ita labele halo tanba idade, diʼak liu haree Ita-nia situasaun nuʼudar oportunidade atu ajuda ema seluk. Tuir loloos, bainhira Ita idade ona, Ita bele halo buat neʼebé uluk labele halo. Porezemplu:

Fahe Ita-nia esperiénsia ba ema seluk. Hanoin toʼok Maromak nia atan sira-nia liafuan neʼebé hakerek iha Bíblia:

Liurai David: “Uluk haʼu joven no agora haʼu idade ona, maibé haʼu seidauk haree Maromak husik hela ema laran-loos, no seidauk haree ninia oan sira husu hahán.”—Sal 37:25.

Josué: “Haree bá! Haʼu besik ona atu mate, no imi hatene didiʼak ho imi-nia laran tomak no ho imi-nia moris tomak katak Jeová, imi-nia Maromak, nia liafuan hotu neʼebé nia hatete ona sai loos duni. Ninia promesa diʼak hotu sai loos ba imi. Husi liafuan sira-neʼe hotu, la iha liafuan ida mak la sai loos.”—Jos 23:14.

David no Josué nia liafuan mak iha folin boot tebes tanba sira hatete hanesan neʼe liuhusi sira-nia esperiénsia rasik. Sira serbí Jeová ho laran-metin ba tempu kleur, tan neʼe sira-nia liafuan iha signifikadu kleʼan liután.

Se Ita serbí Jeová kleur ona, Ita mós bele konta ba ema seluk kona-ba buat neʼebé Jeová halo ona ba Ita no ba irmaun-irmán sira. Ita hanoin-hetan ka lae akontesimentu ruma neʼebé halo Ita fiar katak Jeová mak ajuda ninia povu? Se nuneʼe, fó-hatene ba ema seluk kona-ba neʼe! Neʼe bele anima ema seluk hanesan Ita rasik mós hetan anima bainhira irmaun-irmán sira neʼebé idade fahe sira-nia esperiénsia ba Ita.—Rom 1:​11, 12.

Dalan seluk tan atu anima ema seluk mak hodi hakaʼas an atu tuir reuniaun iha Reuniaun-Fatin. Kuandu Ita halo nuneʼe, Ita bele lori benefísiu ba ema seluk no Ita-nia an. Irmán Connie neʼebé temi ona hatete: “Tuir reuniaun ajuda haʼu atu la laran-kraik. Kuandu haʼu simu domin husi irmaun-irmán sira iha Reuniaun-Fatin, neʼe halo haʼu la triste tan. Haʼu koko atu hatudu agradese ba sira hodi fó prezente kiʼik. No haʼu hakaʼas an atu hola parte iha atividade espirituál nian hamutuk ho irmaun-irmán sira.”

JEOVÁ HAFOLIN ITA-NIA LARAN-METIN

Bíblia fó sai ezemplu barak kona-ba ema neʼebé iha limitasaun maibé Jeová hadomi tebes. Hanoin toʼok kona-ba Simeão. Nia mak ema Izraél ida neʼebé idade ona bainhira Jesus foin moris. Kuandu Simeão bá templu, karik nia haree ema barak neʼebé idade kiʼik liu mak halaʼo knaar importante oioin. Oinsá ho Simeão? Karik nia bele hanoin katak nia la iha tan folin ba Jeová tanba nia idade ona no labele halo buat barak. Maibé Jeová la hanoin hanesan neʼe. Nia haree Simeão nuʼudar “ema laran-loos” neʼebé ‘hamtaʼuk Nia’, no fó priviléjiu ba Simeão atu haree Jesus neʼebé sei bebé. Jeová mós uza Simeão atu fó sai profesia kona-ba Mesias nia futuru! (Lc 2:​25-35) Klaru, Jeová la haree Simeão nuʼudar katuas neʼebé isin fraku ona, maibé nuʼudar ema neʼebé fiar metin no “nakonu ho espíritu santu”.

Ita mós bele fiar katak Jeová hafolin Ita kuandu Ita serbí nia ho laran-metin maski Ita iha limitasaun. Jeová sei kontente ho sakrifísiu neʼebé ema “fó hodi tuir buat neʼebé sira iha, laʼós tuir buat neʼebé sira la iha”.—2 Kor 8:12.

Entaun, fokus deʼit ba buat neʼebé Ita bele halo. Porezemplu, hanoin toʼok kona-ba dalan oioin neʼebé Ita bele haklaken maski neʼe mak ba tempu badak deʼit. Karik Ita mós bele anima irmaun-irmán sira hodi telefone sira ka hakerek karta. Maski Ita halo buat kiʼik deʼit hodi hatudu domin ba Ita-nia maluk fiar-naʼin sira, neʼe bele fó impaktu boot ba sira, liuliu tanba anima neʼe mai husi ema neʼebé serbí Jeová kleur ona.

Balu iha limitasaun iha dalan fíziku maibé bele halo buat barak ba Jeová. Haree toʼok esperiénsia husi Áfrika Leste iha kaixa “Neʼe salva ema nia moris”.

Keta haluha katak Ita-nia ezemplu kona-ba fiar no laran-metin ba tempu kleur bele fó korajen ba ema seluk. No Ita bele fiar katak ‘Maromak nunka hatudu hahalok aat hodi haluha Ita-nia serbisu no Ita-nia domin neʼebé Ita hatudu ona ba ninia naran, tanba Ita serbí ona no kontinua serbí ema santu sira’.—Ebr 6:10.

OKUPADU ATU AJUDA EMA SELUK

Peskiza hatudu katak ferik-katuas neʼebé ajuda ema seluk mak iha posibilidade boot liu atu iha saúde diʼak, iha hanoin no memória diʼak, no moris naruk.

Klaru, maski ita halo buat diʼak oioin mós labele hapara ita atu sai ferik-katuas. Só Maromak nia Ukun deʼit mak bele halo ida-neʼe hodi halakon sala no mate neʼebé ita simu husi Adão.—Rom 5:12.

Maibé hodi halo buat neʼebé Jeová hakarak Ita atu halo, inklui ajuda ema seluk atu koñese nia, neʼe sei ajuda Ita atu mantein Ita-nia esperansa no mós Ita-nia saúde. Tan neʼe, irmaun-irmán sira neʼebé idade ona, favór hanoin-hetan katak Jeová hafolin buat hotu neʼebé imi halo hodi serbí nia, no kongregasaun mós hafolin duni imi-nia ezemplu furak kona-ba fiar metin.