Saida mak Bíblia hanorin kona-ba moris kaben nian?
Bíblia nia resposta
Maromak kria mane no feto primeiru, no tuirmai nia fó kaben sira. Maromak hahú arranju kaben nian nuʼudar relasaun neʼebé espesiál entre mane no feto. Arranju neʼe mós sai nuʼudar fundasaun ba sira atu iha oan iha futuru.—Génesis 1:27, 28; 2:18.
Maromak hakarak feen-laʼen sira atu moris kontente. (Provérbios 5:18) Iha Bíblia, Maromak fó matadalan kona-ba moris kaben nian no mós fó sai prinsípiu neʼebé bele ajuda feen-laʼen atu iha moris kaben nian neʼebé kontente.
Iha informasaun neʼe
Ita presiza rejistu ita-nia kazamentu tuir lei atu halo Maromak kontente ka lae?
Tuir Bíblia, feen no laʼen iha knaar no responsabilidade saida deʼit?
Bíblia bele ajuda haʼu atu iha moris kaben nian neʼebé kontente ka lae?
Saida mak Maromak nia matadalan kona-ba moris kaben nian?
Husi uluk kedas, Maromak hahú arranju kaben nian atu mane ida no feto ida bele hamutuk. (Génesis 2:24) Maromak la simu poligamia, hahalok omoseksuál ka mane no feto neʼebé hela hamutuk maski seidauk kaben. (1 Korinto 6:9; 1 Tesalónika 4:3) Jesus hanorin ninia dixípulu sira atu halo tuir Maromak nia matadalan kona-ba moris kaben nian neʼebé Maromak temi uluk kedas.—Marcos 10:6-8.
Tuir Maromak nia haree, moris kaben nian mak buat neʼebé permanente. Bainhira mane ida no feto ida kaben, sira promete atu laran-metin ba malu no atu moris hamutuk nuʼudar feen-laʼen toʼo mate. Maromak hakarak feen-laʼen sira atu kumpre promesa neʼe.—Marcos 10:9.
Saida mak Bíblia hanorin kona-ba haketak malu no soe-malu?
Dala ruma feen-laʼen moris ketak ba tempu balu, karik tanba sira ida presiza ba vizita família atu tau matan ba família neʼebé moras ba tempu balu. Maibé Bíblia la anima feen-laʼen atu haketak malu tanba deʼit hasoru problema iha moris kaben nian. Bíblia anima feen-laʼen neʼebé hasoru problema iha moris kaben nian atu hakaʼas an rezolve sira-nia problema.—1 Korinto 7:10
Razaun ida deʼit tuir Bíblia atu feen-laʼen bele soe-malu mak adultériu. (Mateus 19:9) Tan neʼe, tuir Bíblia nia matadalan, se feen-laʼen deside atu haketak malu ka soe-malu tanba razaun seluk, sira naʼin-rua labele namora ka kaben fali ho ema seluk.—Mateus 5:32; 1 Korinto 7:11.
Ita presiza rejistu ita-nia kazamentu tuir lei atu halo Maromak kontente ka lae?
Maromak hakarak ema Kristaun atu halo tuir governu nia lei sira kona-ba kazamentu. (Tito 3:1) Se iha dalan ba feen-laʼen atu rejistu sira-nia kazamentu tuir lei no sira halo nuneʼe duni, sira hatudu katak sira respeitu autoridade sira no mós Maromak nia matadalan kona-ba moris kaben nian neʼebé permanente.a
Tuir Bíblia, feen no laʼen iha knaar no responsabilidade saida deʼit?
Feen-laʼen nia responsabilidade. Feen no laʼen tenke hatudu domin ba malu no respeitu malu. (Éfeso 5:33) Sira presiza tau matan ba sira-nia kaben nia presiza seksuál iha dalan neʼebé hatudu domin no tenke hasees an husi hahalok la laran-metin. (1 Korinto 7:3; Ebreu 13:4) Se feen-laʼen iha oan, sira presiza serbisu hamutuk atu haboot sira-nia oan.—Provérbios 6:20.
Bíblia la fó sai informasaun neʼebé klaru kona-ba oinsá feen-laʼen tenke fahe serbisu uma-laran nian no mós serbisu atu manán osan. Feen-laʼen ida-idak bele deside hamutuk kona-ba buat neʼebé diʼak liu ba sira-nia família.
Laʼen nia knaar. Bíblia hatete katak “laʼen mak ulun ba ninia feen”. (Éfeso 5:23) Laʼen nuʼudar ulun, signifika nia presiza dirije ninia família no halo desizaun neʼebé diʼak ba ninia feen no mós oan sira.
Nia presiza hakaʼas an atu tau matan ba ninia família nia presiza fíziku, emosaun no espirituál. (1 Timóteo 5:8) Nia hatudu katak nia hafolin ninia feen nia hahalok diʼak no mós abilidade liuhusi serbisu hamutuk ho ninia feen no tetu didiʼak ninia feen nia hanoin no sentimentu bainhira halo desizaun ruma. (Provérbios 31:11, 28) Bíblia hatete katak laʼen ida presiza halo ninia responsabilidade ho domin.—Koloso 3:19.
Feen nia knaar. Bíblia hatete katak feen “tenke hatudu respeitu kleʼan ba ninia laʼen”. (Éfeso 5:33) Maromak sente kontente bainhira feen ida respeitu ninia laʼen no mós knaar neʼebé nia simu husi Maromak.
Feen nia knaar mak atu apoia ninia laʼen, ajuda ninia laʼen halo desizaun neʼebé diʼak no apoia ninia laʼen nuʼudar ulun. (Génesis 2:18) Bíblia gaba tebes feen neʼebé kumpre ninia knaar importante iha moris kaben nian.—Provérbios 31:10.
Maromak haruka feen-laʼen sira atu iha oan ka lae?
Lae. Uluk, Maromak fó mandamentu ba ninia atan balu atu iha oan. (Génesis 1:28; 9:1) Maibé ema Kristaun la presiza halo tuir mandamentu neʼe. Jesus nunka haruka ninia dixípulu sira atu iha oan. No ninia dixípulu sira iha tempu uluk mós nunka fó sai katak feen-laʼen tenke iha oan. Feen-laʼen sira bele deside rasik se sira hakarak iha oan ka la iha oan.
Bíblia bele ajuda haʼu atu iha moris kaben nian neʼebé kontente ka lae?
Bíblia fó sai prinsípiu oioin neʼebé bele ajuda feen-laʼen neʼebé foin kaben atu halaʼo sira-nia moris kaben nian iha dalan neʼebé diʼak. Bíblia nia prinsípiu bele ajuda feen-laʼen sira atu hamenus ka hadiʼa problema sira.
Bíblia nia prinsípiu sira bele ajuda feen-laʼen atu . . .
hatudu domin neʼebé loos.—1 Korinto 13:4-7; Koloso 3:14.
tahan bainhira iha hanoin neʼebé la hanesan.—1 Korinto 10:24
a Atu hatene Bíblia nia hanorin kona-ba kaben tradisionál ka barlakeadu, haree informasaun iha Menara Pengawal 15 Outubru 2006, pájina 21, parágrafu 12.