PERGUNTA HUSI JOVEN SIRA
Oinsá haʼu bele treinu haʼu-nia konxiénsia?
Husi opsaun sira tuirmai, Ita bele kompara Ita-nia konxiénsia ho saida?
mapa
espellu
belun
juís
Ita bele kompara Ita-nia konxiénsia ho buat haat neʼe. Informasaun neʼe sei esplika tanbasá.
Konxiénsia mak saida?
Ita-nia konxiénsia mak kbiit iha ita-nia laran neʼebé ajuda ita atu rekoñese saida mak loos no sala. Bíblia hatete katak ita-nia konxiénsia mak hanesan ho ukun-fuan neʼebé hakerek ona iha ita-nia laran. (Roma 2:15) Konxiénsia neʼebé diʼak ajuda ita atu hatene se desizaun neʼebé ita atu halo ka desizaun neʼebé ita halo ona mak diʼak ka la diʼak.
Ita-nia konxiénsia mak hanesan ho mapa. Ita-nia konxiénsia dirije ita atu laʼo iha diresaun neʼebé loos atu nuneʼe ita bele hasees an husi susar.
Ita-nia konxiénsia mak hanesan ho espellu. Ita-nia konxiénsia hatudu sai ita-nia morál sira, no hatudu sai ita mak ema hanesan saida.
Ita-nia konxiénsia mak hanesan ho belun diʼak. Ita-nia konxiénsia bele fó konsellu diʼak ba ita no ajuda ita hetan susesu, naran katak ita rona ba ita-nia konxiénsia.
Ita-nia konxiénsia mak hanesan ho juís. Ita-nia konxiénsia fó-sala ba ita-nia an bainhira ita halo sala ruma.
Konxiénsia neʼebé diʼak bele ajuda Ita atu halo desizaun neʼebé matenek
Buat neʼebé importante: Ita-nia konxiénsia mak importante atu ajuda Ita (1) halo desizaun neʼebé matenek no (2) hatudu katak Ita arrepende an no hakaʼas an atu hadiʼa Ita-nia sala.
Tanbasá Ita presiza treinu Ita-nia konxiénsia?
Bíblia haruka ita atu “kontinua iha konxiénsia neʼebé diʼak”. (1 Pedro 3:16) Neʼe susar atu halo se Ita seidauk treinu Ita-nia konxiénsia.
“Uluk haʼu sempre bosok haʼu-nia inan-aman kona-ba haʼu bá neʼebé no nafatin subar ida-neʼe husi sira. Foufoun, haʼu-nia konxiénsia fó-sala mai haʼu, maibé tuirmai haʼu la sente katak neʼe mak sala boot.”—Jennifer.
Ikusmai, Jennifer nia konxiénsia book nia atu fó sai ba ninia inan-aman buat neʼebé nia halo no nia para atu lohi sira.
Hanoin toʼok: Jennifer nia konxiénsia bele fó-sala ba nia sedu liu ka lae?
“Susar atu halaʼo moris neʼebé oin rua no neʼe mós lori estrese. Bainhira ita-nia konxiénsia husik ita halo desizaun ida neʼebé sala, tuirmai fasil liután atu halo desizaun seluk neʼebé sala.”—Matthew.
Ema balu lakohi rona ba sira-nia konxiénsia. Bíblia hatete katak sira “la hatene morál neʼebé loos”. (Éfeso 4:19) Bíblia Kadi Kapasidade hatete: “Sira la iha ona moe.”
Hanoin toʼok: Bainhira ema nia konxiénsia la fó-sala ba sira-nia an bainhira halo hahalok sala, sira-nia moris mak diʼak liu ka lae? Karik ikusmai problema saida deʼit mak sira sei hasoru?
Buat neʼebé importante: Atu kontinua iha konxiénsia neʼebé diʼak, Ita presiza ‘treinu ona Ita-nia kbiit [atu tetu didiʼak] atu hatene saida mak loos no saida mak sala’.—Ebreu 5:14.
Oinsá Ita bele treinu Ita-nia konxiénsia?
Atu bele treinu Ita-nia konxiénsia, Ita presiza prinsípiu neʼebé Ita bazeia Ita-nia hahalok bá. No tuirmai Ita bele kompara Ita-nia hahalok ho prinsípiu sira-neʼe. Ema balu halo tuir prinsípiu sira husi:
família no kultura
belun sira
ema neʼebé famozu
Maibé Bíblia nia prinsípiu kona-ba oinsá atu halaʼo moris mak diʼak liu. Ita la hakfodak ho ida-neʼe tanba Bíblia “mai husi Maromak”, no nia mak Ida neʼebé kria ita no hatene buat neʼebé diʼak liu ba ita.—2 Timóteo 3:16.
Hanoin toʼok kona-ba ezemplu balu.
PRINSÍPIU: “Ami hakarak atu hatudu laran-moos iha buat hotu.”—Ebreu 13:18.
Oinsá prinsípiu neʼe bele afeta Ita-nia konxiénsia bainhira Ita hetan tentasaun atu bosok iha ezame, lohi Ita-nia inan-aman ka naʼok?
Se Ita-nia konxiénsia book Ita atu onestu iha buat hotu, oinsá ida-neʼe sei lori benefísiu ba Ita agora no mós iha futuru?
PRINSÍPIU: “Hasees an husi sala seksuál.”—1 Korinto 6:18.
Oinsá prinsípiu neʼe bele afeta Ita-nia konxiénsia bainhira Ita hetan tentasaun atu haree pornografia ka halo relasaun seksuál antes kaben?
Se Ita-nia konxiénsia book Ita atu hasees an husi sala seksuál, oinsá neʼe sei lori benefísiu ba Ita agora no mós iha futuru?
PRINSÍPIU: “Hatudu laran-diʼak ba malu, hanoin malu, perdua malu ho laran.”—Éfeso 4:32.
Oinsá prinsípiu neʼe bele afeta Ita bainhira mosu problema entre Ita no Ita-nia maun-alin ka belun ida?
Se Ita-nia konxiénsia book Ita atu fó perdua no hanoin malu, oinsá neʼe sei lori benefísiu ba Ita agora no mós iha futuru?
PRINSÍPIU: “Jeová . . . odi ema hotu neʼebé gosta violénsia.”—Salmo 11:5.
Prinsípiu neʼe tenke fó influénsia saida ba Ita kona-ba filme, programa televizaun no vídeo game neʼebé Ita hili?
Se Ita-nia konxiénsia book Ita atu la hili atividade halimar nian neʼebé hatudu violénsia, oinsá neʼe sei lori benefísiu ba Ita agora no mós iha futuru?
ESPERIÉNSIA: “Haʼu iha kolega sira neʼebé halimar vídeo game neʼebé hatudu violénsia, no haʼu mós halimar game sira-neʼe. Tuirmai, haʼu-nia apá hatete katak haʼu labele halimar tan game sira-neʼe. Entaun haʼu halimar game sira-neʼe bainhira haʼu bá haʼu-nia kolega sira-nia uma. Bainhira haʼu fila ba uma, haʼu la fó sai ida-neʼe ba apá. Dala ruma haʼu-nia apá husu: ‘Ó diʼak hela ka?’ No haʼu hatán deʼit katak haʼu diʼak hela. Maibé loron ida, haʼu lee Salmo 11:5 no komesa fó-sala ba haʼu-nia an kona-ba buat neʼebé haʼu halo. Haʼu rekoñese katak haʼu presiza para atu halimar game sira-neʼe. No haʼu halo nuneʼe duni. Haʼu-nia kolega ida mós para atu halimar vídeo game neʼebé hatudu violénsia tanba haʼu-nia ezemplu.”—Jeremy.
Hanoin toʼok: Bainhira mak Jeremy nia konxiénsia komesa laʼo ho didiʼak, no bainhira mak nia komesa rona ba ninia konxiénsia? Saida mak Ita aprende husi Jeremy nia esperiénsia?
Buat neʼebé importante: Ita-nia konxiénsia hatudu sai Ita mak ema oinsá no saida mak importante ba Ita. Saida mak Ita-nia konxiénsia fó sai kona-ba Ita?