Violénsia laʼós solusaun

Ohin loron, ema barak liután fiar katak violénsia mak solusaun bainhira mosu konflitu ka bainhira presiza rezolve problema. Maibé hanoin hanesan neʼe la hanesan ho Jesus Kristu nia hanorin ka hahalok. Hanoin toʼok kona-ba buat balu neʼebé nia hatete no halo.

Saida mak Jesus hatete

Iha Jesus nia diskursu iha Foho, nia hanorin katak hirus, agresaun no violénsia laʼós solusaun ba situasaun bainhira ema la konkorda malu. Hanoin toʼok ezemplu balu.

• “Buat hotu neʼebé imi hakarak ema halo ba imi, imi mós tenke halo ba sira.” (Mateus 7:12; Lucas 6:31) Ukun-Fuan neʼe dala barak bolu nuʼudar Ukun-Fuan Osan-mean,a neʼe fó laran-manas mai ita atu hatudu hahalok diʼak ba ema seluk. Tanba la iha ema ida mak hakarak ema seluk atu hatudu hahalok aat ba sira, entaun ita mós presiza hatudu respeitu no laran-diʼak ba ema seluk, maski ita la konkorda ho sira.

• “Se ema ruma basa ó-nia hasan sorin loos, see tan ó-nia hasan sorin karuk ba nia.” (Mateus 5:38, 39; Lucas 6:29) Jesus la hanorin katak ema tenke simu deʼit bainhira ema halo aat ba sira. Duké halo nuneʼe, nia korrije ideia neʼebé sala neʼebé karik ulun-naʼin relijiaun balu mak hanorin, neʼebé dehan katak ema bele selu aat fali. Nia hatete ba ninia dixípulu sira katak sira labele selu aat fali ba ema, maibé sira tenke hatudu laran-maus bainhira ema provoka no halo sira hirus.b

• “Hadomi nafatin imi-nia inimigu.” (Mateus 5:43, 44; Lucas 6:27) Jesus hanorin katak ita tenke hatudu laran-diʼak ba ema neʼebé odi ita ka trata aat ita. Neʼe laʼós katak ita konkorda ho sira-nia hahalok sala.c Maibé, se ita hatudu laran-diʼak ba ema neʼebé odi ita, ida-neʼe bele book sira atu hatún hirus, no mós bele book sira atu hatudu fali laran-diʼak ba ita.

Saida mak Jesus halo no sei halo

Jesus hanorin katak violénsia laʼós solusaun, maibé nia mós halo tuir buat neʼebé nia hanorin. Iha kalan neʼebé ema kaer Jesus, ninia dixípulu ida luta hodi defende nia, maibé Jesus hatete: “Hatama fali ó-nia surik ba ninia fatin, tanba ema hotu neʼebé kaer surik sei mate ho surik.” (Mateus 26:52) Jesus hatudu domin ba ninia inimigu sira hodi fó perdua ba sira neʼebé halo aat ba nia, no mós halo orasaun kona-ba sira!—Lucas 23:33, 34; 1 Pedro 2:23.

Bíblia promete katak lakleur tan Jesus nuʼudar Ulun-Naʼin dame nian, sei halakon violénsia hotu. (Isaias 9:6, 7) Atu hetan informasaun liután kona-ba ida-neʼe, lee artigu. “Oinsá funu no konflitu sei remata?.”