Maromak hakarak haʼu atu halo saida iha haʼu-nia moris?

Bíblia nia resposta

Maromak hakarak Ita atu koñese liután kona-ba nia, hakbesik ba nia, no tuirmai hadomi no serbí nia ho Ita-nia laran tomak. (Mateus 22:37, 38; Tiago 4:8) Oinsá atu halo ida-neʼe? Hodi aprende kona-ba Jesus nia moris no hanorin. (João 7:16, 17) Jesus hanorin kona-ba Maromak nia hakarak, no nia rasik mós moris tuir Maromak nia hakarak. Tuir loloos, Jesus dehan katak objetivu iha ninia moris mak “laʼós atu halo haʼu-nia hakarak, maibé halo ida neʼebé haruka haʼu mai nia hakarak”.—João 6:38.

Atu hatene saida mak Maromak nia hakarak ba haʼu, haʼu presiza hetan sinál, vizaun, no mehi espesiál ruma ka lae?

Lae, Maromak fó sai ninia mensajen ba ema liuhusi Bíblia. Bíblia fó-hatene kona-ba buat neʼebé ita presiza atu “sai prontu hodi halo serbisu diʼak hotu”. (2 Timóteo 3:16, 17) Maromak hakarak Ita atu uza Bíblia no Ita-nia “kbiit atu hanoin” hodi buka-hatene saida mak Maromak nia hakarak ba Ita.—Roma 12:1, 2; Éfeso 5:17.

Haʼu bele halo tuir duni Maromak nia hakarak ka lae?

Sin bele, tanba Bíblia dehan: “Ninia ukun-fuan sira la susar liu atu kumpre.” (1 João 5:3) Neʼe la dehan katak sempre fasil atu halo tuir Maromak nia mandamentu sira. Maibé bainhira Ita hakaʼas an atu halo nuneʼe, Ita sei simu bensaun barak. Jesus dehan: “Ksolok ba sira neʼebé rona Maromak nia liafuan no halo tuir!”—Lucas 11:28.