Se ema korrije Ita

TANSÁ MAK SUSAR?

“Kuandu ema korrije ita, neʼe hanesan nia hatete ita halo buat ruma neʼebé la loos. Ema nunka dehan hanesan neʼe: ‘Haʼu gosta tebes ema seluk hatete mai haʼu katak haʼu mak halo sala!’”—Amy, tinan 17.a

Dala ruma kuandu Ita-nia inan-aman, mestre-mestra sira ka ema seluk korrije Ita, Ita sente susar atu simu ka lae? Se nuneʼe, informasaun neʼe bele ajuda Ita.

SAIDA MAK ITA PRESIZA HATENE

Ema hotu presiza ema korrije sira.

“Ita hotu halo sala dala barak.”—Tiago 3:2.

“Lalika sente moe se ema korrije Ita tanba Ita halo buat ruma la loos.”—Jessica.

Ema korrije Ita, neʼe la dehan katak Ita ema aat.

“Jeováb fó dixiplina ba ema neʼebé nia hadomi hanesan aman ida fó dixiplina ba oan neʼebé monu loos ba nia laran.”—Provérbios (Amsal) 3:12.

“Bainhira ema korrije haʼu, haʼu komprende katak karik susar tebes ba ema neʼe atu koʼalia ida-neʼe mai haʼu, no tuir loloos, nia hadomi haʼu mak nia fó konsellu neʼe.”—Tamara.

Hetan korrije bele halo Ita sai ema diʼak liu.

“Rona ba dixiplina no sai matenek.”—Provérbios (Amsal) 8:33.

“Atubele haburas hahalok hanesan ema boot nian, ita tenkesér hetan korrije. Ita bele hatene ema seluk nia hanoin kona-ba ita no ida-neʼe sei ajuda ita atu hadiʼa hahalok la diʼak neʼebé karik ita mós la hatene.”—Deanne.

SAIDA MAK ITA BELE HALO?

Tenke iha hanoin neʼebé luan. Karik Ita sei hirus kedas tanba ema korrije Ita. Maibé hein lai. Hanoin toʼok se Ita mak fó konsellu neʼe ba ema seluk, hanesan Ita-nia alin. Konsellu neʼe mak diʼak ka lae? Ita hakarak alin atu simu konsellu ka lae? Se Ita hanoin hanesan neʼe, Ita bele komprende konsellu neʼe mak loos no diʼak ba Ita.—Bíblia nia matadalan: Eclesiastes (Pengkhotbah) 7:9.

“Dala ruma ita hirus tanba ema korrije ita toʼo ita haluha katak ema neʼe hakarak ajuda ita sai ema neʼebé diʼak. Loloos, nia lakohi hakanek ita-nia laran.”—Theresa.

Haraik-an nafatin. Keta foti-an hodi la simu korrije. Maibé iha parte seluk, lalika laran-tun demais tan deʼit Ita presiza hadiʼa Ita-nia hahalok ruma. Ema neʼebé haraik an, sira simu konsellu no la laran-tun demais. La haluha katak, konsellu neʼebé Ita sente todan tebes, karik neʼe mak konsellu neʼebé Ita presiza duni. Se Ita lakohi simu korrije neʼe, Ita lakon oportunidade diʼak atu hadiʼa Ita-nia hahalok.—Bíblia nia matadalan: Provérbios (Amsal) 16:18.

“Atu sai ema maduru, importante tebes atu simu korrije. Se ita la simu, ita sei la hetan buat diʼak husi konsellu neʼe, no karik ikusmai ita lori problema ba ita-nia an.”—Lena.

Hatudu agradese. Maski Ita sente susar atu simu korrije neʼe, maibé diʼak se Ita fó obrigadu ba ema neʼebé korrije Ita. Ita bele fiar katak ema neʼe hanoin Ita-nia diʼak no hakarak Ita atu hetan susesu.—Bíblia nia matadalan: Salmo (Mazmur) 141:5.

“Sempre hatete ‘Obrigadu’, liuliu se Ita presiza konsellu neʼe. Maski Ita hanoin dehan, ‘Konsellu neʼe la kona haʼu’, maibé Ita fó agradese deʼit tanba ema neʼe hanoin Ita no hakbesik Ita hodi koʼalia.”—Carla.