Moris ho susesu, neʼe depende ba saida?

Hanoin toʼok situasaun haat tuirmai neʼe:

Tuir Ita-Boot nia hanoin, sé mak moris ho susesu neʼebé loloos?

• 

  ALEX

  Alex halaʼo ninia negósiu ida. Nia serbisu badinas, respeitu ema no la hatene bosok ema. Alex nia negósiu neʼe laʼo ho diʼak. Tan neʼe, ninia família nia moris han hemu nian, la susar.

• 

  FELIZ

  Feliz mós halaʼo negósiu ida, nia manán osan barak liu fali Alex. Maibé nia serbisu loron-kalan tanba nia hakarak ninia negósiu boot liu fali negósiu sira seluk. Nia mós kona moras oioin.

• 

  ZELA

  Zela mak eskola-oan ida. Nia tuir eskola pre-sekundária, no nia mak aluna ida neʼebé badinas estuda no gosta aprende. Tan neʼe, ninia valór mós diʼak.

• 

  ELENA

  Elena nia valór diʼak liu fali Zela nian. Ninia naran tama iha lista ba estudante sira neʼebé valór aas. Maibé nia sempre nyontek bainhira ezame no ladún interese kona-ba estuda.

Se Ita-Boot hanoin Feliz ho Elena, ka sira naʼin-haat hotu mak ema neʼebé hetan ona susesu, karik Ita-Boot hanoin moris ho susesu neʼe depende deʼit ba rezultadu diʼak, no ema nia hahalok mak ladún importante.

Maibé se Ita-Boot hanoin Alex ho Zela mak ema neʼebé hetan ona susesu, karik Ita-Boot hanoin moris ho susesu neʼe depende ba ema nia hahalok. Ita-Boot mós hanoin halaʼo moris ho morál no hahalok diʼak mak importante liu. Mai ita hanoin kona-ba neʼe.

• Saida mak diʼak liu ba Zela nia moris aban-bainrua? Hetan valór neʼebé boot liu ka nafatin gosta atu aprende?

• Saida mak diʼak liu ba Alex nia oan sira? Iha osan barak hodi hola sasán hotu neʼebé sira hakarak ka iha aman ida neʼebé hakarak fahe tempu hodi hamutuk ho sira?

Saida mak ita aprende husi ezemplu hirak-neʼe? Moris ho susesu neʼebé falsu mak bele haree husi liʼur deʼit. Maibé moris ho susesu neʼebé loloos neʼe depende ba oinsá halaʼo moris ho morál no hahalok diʼak.