Uluk haʼu laran-susar tebes, maibé haʼu hetan ona esperansa

HAʼU moris iha rai-Ungria. Loron ida, iha fulan-Juñu tinan 1991 haʼu ho kolega sira bá pasiar iha Mota Tisza. Haʼu foin mak bá fatin neʼe, tan neʼe haʼu hanoin mota neʼe naruk. Haʼu haksoit tun kedas deʼit ba bee laran. Maibé loloos bee la naruk ida! Tan neʼe haʼu-nia ruin tolu iha kanuruk tohar tiha no haʼu-nia ruin-kotuk kanek. Kolega ida haree haʼu la book an iha bee laran, nia foti haʼu sai ho kuidadu. Falta uitoan, haʼu atu mate ona iha bee laran.

Iha tempu neʼebá haʼu sei sente hela no iha haʼu-nia laran haʼu hatene buat ruma laloos ona iha haʼu-nia isin. Ema bolu ambulánsia no sira tenke tula haʼu bá ospitál ho elikópteru. Toʼo iha ospitál, doutór sira atende kedas haʼu no halo operasaun ba haʼu-nia kotuk. Depois, haʼu baixa fali iha ospitál ida iha Budapeste, sidade kapitál. Ba fulan tolu nia laran, haʼu toba latan deʼit. Maski haʼu-nia ulun bele book an, maibé husi haʼu-nia kabaas tun toʼo ba ain, la bele book an ona. Momentu neʼebá, haʼu sei tinan 20 hela maibé haʼu tenke sadere deʼit ba ema seluk. Haʼu sente fuan rahun tebes, la iha folin toʼo hakarak mate deʼit.

Depois haʼu filafali ba uma no haʼu-nia inan-aman hakaʼas an halo buat barak atubele tau matan mai haʼu. Haʼu haree sira kole tebes, sira mós triste. Neʼe halo haʼu sente terus liután no laiha liu haksolok iha haʼu-nia laran. Tanba haʼu sente mout tebes iha triste nia laran, neʼe halo doutór mentál nian tenkesér koʼalia beibeik mai haʼu kona-ba oinsá ba oin haʼu bele tahan haʼu-nia kondisaun neʼe no labele rende an.

Haʼu komesa hanoin kona-ba haʼu-nia moris. Haʼu husu ba haʼu-nia an: ‘Tan saida mak ita ema moris? Tansá mak terus boot neʼe tenke kona haʼu?’ Haʼu lee livru barak atu buka-hatene kona-ba haʼu-nia pergunta hirak-neʼe. Haʼu mós koko lee Bíblia maibé susar tebes atu komprende. Tan neʼe mak haʼu la lee tan Bíblia. Haʼu koʼalia ho amu ida maibé ninia liafuan hotu la bele hatán haʼu-nia pergunta sira.

Toʼo tinan 1994, Testemuña ba Jeová naʼin-rua ba uma vizita haʼu-nia apá. Haʼu-nia apá husu ba sira atu koʼalia mai haʼu. Sira esplika mai haʼu katak Maromak sei hadiʼa mundu neʼe sai fali hanesan jardín furak ida neʼebé moras no terus la iha tan. Haʼu sente neʼe furak tebes maibé haʼu-nia laran sei rua-rua hela. Sira fó livru rua ba haʼu no bainhira haʼu lee hotu tiha livru sira-neʼe, haʼu hakarak estuda Bíblia ho sira. Sira mós fó-hatene mai haʼu katak haʼu presiza halo orasaun ba Maromak.

Haʼu koʼalia beibeik ho Testemuña sira, no sira uza Bíblia hodi hatán ba haʼu-nia pergunta hotu. Haʼu komesa fiar ona katak Maromak hadomi no hanoin tebes haʼu. Haʼu estuda Bíblia ba tinan rua, no iha loron 13, fulan-Setembru, tinan 1997, haʼu hetan batizmu iha haʼu-nia uma deʼit. Loron neʼebá mak loron neʼebé haʼu kontente tebes iha haʼu-nia moris.

Iha tinan 2007, haʼu muda ba fatin ema aleijadu nian iha Budapeste. Tanba hela iha fatin neʼe, haʼu bele uza tempu barak hodi fó-hatene ba ema seluk kona-ba buat furak neʼebé haʼu rasik aprende ona. Se klima mak diʼak, entaun haʼu bá tuur iha liʼur hodi koʼalia ho ema. Haʼu uza kadeira-roda espesiál ida neʼebé haʼu rasik bele hanehan ninia remote ho haʼu-nia hasan-hun.

Família ida iha haʼu-nia kongregasaun, laran-luak tebes. Sira ajuda haʼu hodi hola komputadór ida neʼebé haʼu bele kontrola ho haʼu-nia ulun deʼit. Ho komputadór neʼe, haʼu bele telefone ema liuhusi internét no hakerek karta ba ema hodi haklaken ba sira. Tanba haʼu uza tempu barak hodi haklaken ba ema, haʼu aprende oinsá bele dada lia ho ema no haʼu la hanoin barak tan kona-ba haʼu-nia moras neʼe.

Haʼu mós bele tuir reuniaun kristaun sira. Ami-nia Reuniaun-Fatin mak iha uma-andár leten. Bainhira haʼu toʼo iha neʼebá, haʼu-nia maluk kristaun sira leba haʼu ho kadeira-roda saʼe ba andár leten. Durante reuniaun, se haʼu hakarak fó komentáriu, irmaun neʼebé tuur iha haʼu-nia sorin mak hiʼit liman. Nia mós ajuda haʼu kaer Bíblia no livru sira atu nuneʼe haʼu bele haree.

Haʼu sente moras tebes loron no kalan, no presiza ema seluk atu ajuda halo buat hotu mai haʼu. Tan neʼe dala ruma halo haʼu sente triste. Maibé hakbesik ba Maromak Jeová halo haʼu sente kmaan tanba haʼu hatene Maromak sempre rona haʼu bainhira haʼu koʼalia sai haʼu-nia sentimentu tomak iha orasaun. Haʼu lee Bíblia loroloron, neʼe mós halo haʼu bele sente iha kbiit fali. No mós haʼu-nia maluk kristaun sira ajuda tebes haʼu. Sira mak belun diʼak neʼebé sempre apoia haʼu, fó kmaan ba haʼu no halo orasaun ba haʼu. Ho buat hotu neʼe mak halo haʼu la hanoin barak tan no haʼu-nia laran bele hakmatek fali.

Haʼu hanoin fali uluk bainhira haʼu laran-susar tebetebes, Maromak Jeová lolo liman hodi fó kmaan mai haʼu. Nia mós fó esperansa mai haʼu katak haʼu sei la moras tan iha mundu foun. Tan neʼe, haʼu hein namanas ba futuru neʼebé haʼu sei “laʼo no haksoit hodi fó hahiʼi ba Maromak” tanba nia laran-diʼak no domin boot tebes.—Apóstolu 3:6-9.