Susar: Neon-susar

DALA ruma Ita sente neon-susar, triste, hirus ka odi ka lae? Se Ita sente hanesan neʼe, neʼe bele halo Ita la iha forsa tan atu halo buat neʼebé iha folin. Se nuneʼe, Ita bele halo saida?a

EZEMPLU HUSI BÍBLIA: LIURAI DAVID

Iha Liurai David nia moris, nia hasoru susar barak neʼebé haterus nia no halo nia laran-triste tebes. Saida mak ajuda nia atu la rende an? Nia entrega ninia susar ba Maromak nia liman hodi halo orasaun beibeik. (1 Samuel 24:12, 15) Nia mós hakerek poezia sira atu fó sai ninia sentimentu.b

SAIDA MAK GREGORY HALO?

Gregory neʼebé temi ona iha pájina 3, hetan moras kakutak nian neʼebé halo nia neon halai tun-saʼe. Oinsá mak nia bele tahan hasoru ida-neʼe? Nia dehan: “Uluk dala barak haʼu sente neon-susar demais. Maibé haʼu-nia feen no belun sira ajuda haʼu sente laran-hakmatek fali. Haʼu mós bá konsulta hodi buka-hatene didiʼak kona-ba haʼu-nia moras, no halo mudansa balu ho haʼu-nia toman. Agora, neineik-neineik haʼu sente diʼak fali tanba haʼu hatene ona oinsá atu kontrola moras neʼe, no kuidadu an husi buat naran deʼit neʼebé bele halo haʼu-nia moras sai aat liu.”

SAIDA MAK ITA BELE HALO?

Se Ita sente neon-susar demais, koko toʼok halo buat sira tuirmai neʼe:

• Hakerek Ita-nia sentimentu iha diáriu.

• Koʼalia sai Ita-nia sentimentu ba Ita-nia família ka belun diʼak ida.

• Hanoin didiʼak tansá mak Ita sente neon-susar. Porezemplu, husu toʼok ba Ita-nia an: ‘Loloos, haʼu iha razaun duni atu sente triste ka lae?’

• Keta husik Ita-nia an sente triste ka hirus nafatin. Halo buat ruma neʼebé bele ajuda Ita haluha kona-ba problema sira neʼebé halo Ita neon-susar.c

Keta haluha: Dala barak ita sente neon-susar laʼós tanba situasaun susar neʼebé haleʼu ita, maibé tanba ita hanoin demais kona-ba situasaun neʼe.