Oinsá mak ita bele kontrola hanoin neʼebé halo Ita laran-tun?

DALA ruma Ita sente laran-tun ka lae? Tuir loloos, ita hotu dala ruma sente hanesan neʼe. Ohin loron ita hasoru problema oioin hanesan la iha justisa, violénsia barak, no susar kona-ba buka moris. Tan neʼe, ita la hakfodak katak buat sira-neʼe halo ema barak sente laran-tun, no sente katak sira la iha folin.

Maibé sentimentu hanesan neʼe perigu tebes, tanba ida-neʼe bele halo ita la fiar an, hanoin lamoos, no halo ita la kontente. Bíblia hatete: “Ó sente ona laran-tun iha tempu neʼebé susar ka lae? Ó-nia kbiit sei sai menus.” (Provérbios [Amsal] 24:10) Ita presiza kbiit ka forsa atu halaʼo ita-nia moris iha mundu neʼebé nakonu ho susar. Nuneʼe, importante tebes atu kontrola ita-nia hanoin atu la sai laran-tun demais.a

Bíblia fó matadalan neʼebé diʼak kona-ba oinsá mak ita bele kontrola ita-nia hanoin atu la laran-tun demais. Maromak Jeová, nuʼudar ita-nia Kriadór no Maromak neʼebé tau matan ba moris hotu, nia lakohi ita sai laran-tun demais ka lakon esperansa. (Salmo [Mazmur] 36:9) Tan neʼe, mai ita koʼalia kona-ba dalan tolu oinsá Maromak nia Liafuan bele ajuda ita atu kontrola hanoin neʼebé halo ita laran-tun.

Maromak hanoin Ita

Ema balu hanoin katak Maromak la iha tempu atu hanoin sira-nia sentimentu. Ita mós sente hanesan neʼe ka lae? Tuir loloos, Bíblia hatudu katak ita-nia Kriadór hanoin duni kona-ba ita ida-idak nia sentimentu. Maromak nia atan ida hatete: “Jeová sei besik ba ema neʼebé sente susar iha laran, no salva ema neʼebé laran-kraik.” (Salmo [Mazmur] 34:18) Ita kontente tebes hodi hatene katak Maromak neʼebé boot liu hotu nafatin besik ho ita kuandu ita iha susar laran!

Ita-nia Kriadór laʼós Maromak neʼebé la iha sentimentu. Bíblia hatete katak “Maromak mak domin”. (1 Joao 4:8) Nia hadomi ema hotu no hanoin ema neʼebé iha susar laran. Porezemplu, maizumenus tinan 3.500 liubá, Maromak nia povu, ema Israel, sai atan iha rai-Egiptu. Kona-ba sira, nia hatete: “Haʼu haree loloos terus neʼebé haʼu-nia povu hasoru iha Egiptu, no haʼu rona tiha sira-nia lian halerik tanba ema hanehan sira atu halo serbisu; tanba haʼu hatene ho loloos terus neʼebé sira hasoru. Haʼu sei tun hodi halo sira livre husi ema Egiptu sira-nia liman.”—Êxodo (Keluaran) 3:7, 8.

Maromak komprende didiʼak ita-nia sentimentu. Ita bele fiar nuneʼe tanba “nia mak halo ita, laʼós ita rasik”. (Salmo [Mazmur] 100:3) Tan neʼe, maski ita sente katak ita-nia família ka kolega la komprende ita, maibé ita bele fiar katak Maromak komprende ita. Maromak nia Liafuan hatete: “Dalan neʼebé ema haree, la hanesan ho dalan neʼebé Maromak haree, tanba ema haree deʼit buat neʼebé matan bele haree; maibé kona-ba Jeová, nia haree ema nia laran.” (1 Samuel 16:7) Sin, Maromak bele haree buat hotu neʼebé iha ita-nia laran.

Loos, Maromak Jeová hatene mós ita-nia sala no fraku sira. Maibé ita kontente tanba ita-nia Maromak neʼebé domin prontu atu fó perdua mai ita. Maromak leno David atu hakerek: “Hanesan aman ida hatudu laran-sadiʼa ba ninia oan sira, Aman Jeová hatudu laran-sadiʼa ba sira neʼebé taʼuk ba nia. Nia hatene loos oinsá mak nia kria ita, nia hanoin-hetan katak ita mak rai-rahun.” (Salmo [Mazmur] 103:13, 14) Maski dala ruma ita hanoin beibeik ita rasik nia sala no sente laran-tun, maibé Maromak la haree ita hanesan neʼe. Nia buka buat neʼebé diʼak iha ita no la hanoin fali ita-nia sala, se ita hakribi ona sala neʼe.—Salmo (Mazmur) 139:1-3, 23, 24.

Tan neʼe, kuandu ita sente katak ita la iha folin, ita presiza hakaʼas an atu la husik sentimentu neʼe domina ita-nia neon. Ita presiza hanoin-hetan oinsá Maromak nia haree kona-ba ita!—1 Joao 3:20.

Haburas relasaun besik ho Maromak

Hodi haree ita-nia an hanesan Maromak haree ita, oinsá mak ida-neʼe ajuda ita? Ida-neʼe ajuda ita atu halo hakat tuirmai hodi kontrola ita-nia hanoin atu la sai laran-tun demais. Neʼe mak haburas relasaun besik ho Maromak hodi sai ninia belun. Maibé, ita ema bele sai Maromak nia belun ka lae?

Nuʼudar Aman neʼebé hadomi ita, Maromak Jeová hakarak duni atu ajuda ita haburas relasaun besik ho nia. Bíblia fó laran-manas mai ita, dehan: “Hakbesik ba Maromak, no nia sei hakbesik imi.” (Tiago 4:8) Hanoin toʼok, maski ita sala-naʼin no iha fraku, maibé ita bele hakbesik ba Maromak neʼebé Aas Liu Hotu no sai ninia belun. Neʼe mak buat neʼebé furak tebes, loos ka lae?

Liuhusi Bíblia, Maromak fó-hatene kona-ba ninia an atu ita bele koñese nia didiʼak. Hodi lee Bíblia beibeik, ita bele aprende kona-ba Maromak nia hahalok sira neʼebé furak tebes.b Nuʼudar ita hanoin kleʼan kona-ba Maromak Jeová nia hahalok sira-neʼe, ita sei sente katak ita hakbesik liután ba nia, no ita sei haree ho klaru katak nia mak ita-nia Aman neʼebé hadomi loos ita no hatudu laran-diʼak mai ita.

Hanoin kleʼan kona-ba buat neʼebé ita lee iha Bíblia bele ajuda ita iha dalan seluk tan. Ita bele hakbesik liután ba ita-nia Aman iha lalehan hodi haburas hanoin neʼebé hanesan ho Maromak nia hanoin, no husik Maromak nia hanoin neʼe hadiʼa ita-nia an, fó kmaan no hatudu dalan mai ita. Ita presiza halo nuneʼe liuliu kuandu ita luta hasoru sentimentu neʼebé halo ita neon-susar. Ema neʼebé hakerek salmu ida hatete: “Bainhira haʼu hanoin barak no ida-neʼe hatodan haʼu, Ita konsola haʼu no halo haʼu sente hakmatek.” (Salmo [Mazmur] 94:19, Contemporary English Version) Loos duni, Maromak nia Liafuan bele fó kmaan mai ita. Se ita ho haraik-an simu lia-loos neʼebé mai husi Maromak nia Liafuan, neineik-neineik ita sei la sai laran-tun demais, maibé ita sei sente kmaan, no sente dame neʼebé mai husi Maromak. Sin, Maromak Jeová fó kmaan mai ita hanesan aman ida neʼebé hamaus nia oan neʼebé nia hadomi kuandu oan neʼe laran-triste.

Dalan ida seluk atu sai Maromak nia belun mak hodi koʼalia beibeik ba nia. Bíblia hatete katak “wainhira ita husu buat ruma tuir nia hakarak, [Maromak] rona ita”. (1 Joao 5:14) Kona-ba buat saida deʼit neʼebé halo ita taʼuk ka laran-taridu, ita bele halo orasaun ba Maromak no husu ninia ajuda. Se ita fó sai buat hotu iha ita-nia fuan-laran ba Maromak, ita bele hetan dame iha laran. Apóstolu Paulo hakerek: “Iha buat hotu, harohan no hamulak bá hodi fó-agradese; hatoʼo imi-nia harohan ba Maromak. Nuneʼe, Maromak dame nian sei rai hela imi-nia fuan no laran iha Kristu Jesus.”—Filipe 4:6, 7.

Nuʼudar Ita halo tuir programa atu lee Bíblia, hanoin kleʼan, no halo orasaun, Ita sei haree katak Ita-nia relasaun ho Ita-nia Aman iha lalehan sai besik liután. Hodi iha relasaun neʼebé metin ho nia, ida-neʼe sei ajuda ita atu kontrola hanoin neʼebé halo ita sai laran-tun. Saida tan mak bele ajuda Ita?

Kaer ita-nia esperansa ba futuru

Maski ita hasoru situasaun susar naran deʼit, ita bele hanoin nafatin kona-ba buat neʼebé diʼak. Tanbasá? Tanba Maromak fó mai ita esperansa kona-ba futuru. Apóstolu Pedro esplika kona-ba esperansa furak neʼe hodi dehan: “Tuir [Maromak] nia promesa, ita hein lalehan foun no rai foun, iha neʼebé justisa sei hela ba nafatin.” (2 Pedro 3:13) Promesa neʼe katak sá?

Liafuan “lalehan foun”, neʼe katak Maromak nia Ukun iha lalehan ho Jesus Kristu nuʼudar liurai. “Rai foun” katak ema sira neʼebé sei moris iha rai, neʼebé sei simu Maromak nia bensaun. Iha “lalehan foun” nia ukun, ema hotu iha rai sei sai livre husi susar hotu neʼebé halo sira laran-tun. Kona-ba ema fiar-metin sira neʼebé sei moris iha tempu neʼebá, Bíblia promete katak Maromak “sei hamaran sira-nia matabeen husi sira-nia matan; mate la iha ona, no ema sei la tanis tan eh laran-susar”.—Apokalipse 21:4.

Esperansa furak neʼe halo Ita sente kontente, loos ka lae? Tan neʼe mak Bíblia fó laran-manas ba ema kristaun neʼebé loos atu “haksolok iha esperansa”. (Roma 12:12) Se ita hanoin nafatin Maromak nia promete ba futuru, no mós kona-ba tansá mak ita bele fiar ba promete neʼe, ida-neʼe sei ajuda ita atu la sai laran-tun demais.—Filipe 4:8.

Bíblia hatete katak ita-nia esperansa atu hetan salvasaun mak hanesan kapasete. (1 Tesalonika 5:8) Iha tempu antigu, kuandu soldadu ida atu bá funu, nia nunka haluha atu uza ninia kapasete. Nia hatene katak kapasete neʼe proteje nia husi kroʼat sira neʼebé bele hakanek nia ulun. Hanesan kapasete proteje ulun, nuneʼe mós esperansa proteje ita-nia neon. Hodi hanoin beibeik kona-ba ita-nia esperansa ba futuru, ida-neʼe bele ajuda ita atu la hanoin demais kona-ba buat neʼebé halo ita sai taʼuk ka laran-tun.

Sin, Ita bele kontrola hanoin neʼebé halo Ita sente laran-tun. Tan neʼe, diʼak atu Ita hanoin didiʼak oinsá Maromak nia haree kona-ba Ita, hakbesik liután ba nia, no kaer Ita-nia esperansa ba futuru. Hodi halo buat sira-neʼe, Ita bele fiar katak Ita sei moris iha tempu neʼebé la iha tan buat ida neʼebé halo Ita sai laran-tun!—Salmo (Mazmur) 37:29.

[Nota–rodapé]

[Liafuan ne’ebé foti husi pájina 27]

“Haʼu hatene ho loloos terus neʼebé sira hasoru.”—ÊXODO 3:7, 8

[Liafuan ne’ebé foti husi pájina 28]

“Bainhira haʼu hanoin barak no ida-neʼe hatodan haʼu, Ita konsola haʼu no halo haʼu sente hakmatek.”—SALMO 94:19, CONTEMPORARY ENGLISH VERSION

[Liafuan ne’ebé foti husi pájina 29]

“Maromak dame nian sei rai hela imi-nia fuan no laran iha Kristu Jesus.”—FILIPE 4:7

[Kaixa/Dezeñu iha pájina 29]

Eskritura sira kona-ba Maromak Jeová neʼebé fó kmaan mai ita

“Jeová, Maromak neʼebé laran-sadiʼa no laran-luak, neineik atu hirus no nakonu ho domin neʼebé laran-metin no nakonu ho lia-loos.”—ÊXODO (KELUARAN) 34:6.

“Ninia matan hateke bá-mai iha rai hotu atu hatudu ninia forsa atu ajuda sira neʼebé fó sira-nia laran tomak ba nia.”—2 CRÔNICAS (2 TAWARIKH) 16:9.

“Jeová sei besik ba ema neʼebé sente susar iha laran, no salva ema neʼebé laran-kraik.”—SALMO (MAZMUR) 34:18.

“Ita, oh, Jeová, diʼak no prontu atu fó perdua.”—SALMO (MAZMUR) 86:5.

“Jeová neʼe diʼak ba ema hotu, no ninia laran-sadiʼa hatudu iha buat hotu neʼebé nia kria.”—SALMO (MAZMUR) 145:9.

“Haʼu Jeová, ó-nia Maromak, haʼu kaer ó-nia liman-loos, Ida neʼebé hatete ba ó: ‘Keta taʼuk. Haʼu rasik sei ajuda ó.’”—ISAÍAS (YESAYA) 41:13.

“Rahun-diʼak ba . . . Aman laran-diʼak nian no Maromak ksolok hotu nian.”—2 KORINTO 1:3.

“Ita bele sai laran-metin iha Maromak futar oin: wainhira ita-nia laran haksesuk ita, basá Maromak boot liu fali ita-nia laran, no Nia hatene buat hotu.”—1 JOAO 3:19, 20.

[Kaixa/Dezeñu iha pájina 30]

Sira bele kontrola hanoin neʼebé halo sira sai laran-tun

“Haʼu-nia aman lanu-teen, no nia mós fó susar barak mai haʼu. Tan neʼe, husi kiʼik kedas, haʼu sempre sente katak haʼu la iha folin. Maibé, kuandu haʼu komesa estuda Bíblia ho Testemuña ba Jeová, haʼu aprende Maromak nia promete kona-ba moris rohan-laek iha rai. Esperansa ida-neʼe halo haʼu laran-kontente tebes. Haʼu sai toman atu lee Bíblia beibeik. Haʼu sempre iha Bíblia iha haʼu-nia sorin. Kuandu haʼu sente laran-tun tebes, haʼu foti Bíblia no lee eskritura sira neʼebé fó kmaan mai haʼu. Hodi lee kona-ba Maromak nia hahalok furak sira, ida-neʼe fó fiar mai haʼu katak haʼu iha folin boot iha ninia matan.”—Kátia, feto ho tinan 33.c

“Haʼu uluk tua-teen, uza droga oioin hanesan marijuana no kokaína, no toman horon iis neʼebé halo lanu. Ikusmai haʼu lakon tiha buat hotu neʼebé haʼu iha, no haʼu sai ema neʼebé ezmola iha lurón. Maibé kuandu haʼu estuda Bíblia ho Testemuña ba Jeová, ida-neʼe halo haʼu troka haʼu-nia moris tomak no haburas relasaun besik ho Maromak. Maski dala ruma haʼu fó-sala ba haʼu-nia an no sente haʼu la iha folin, no tenke luta hasoru sentimentu hanesan neʼe, maibé haʼu aprende atu tau fiar ba Maromak nia laran-sadiʼa no laran-diʼak. Haʼu fiar duni katak Maromak sei kontinua fó kbiit mai haʼu atu tahan hasoru hanoin neʼebé halo haʼu laran-tun. Hodi hatene lia-loos husi Bíblia mak buat neʼebé diʼak liu iha haʼu-nia moris tomak.”—Renato, mane ho tinan 37.

“Husi kiʼik kedas, haʼu sempre kompara haʼu-nia an ho haʼu-nia maun no sente katak haʼu-nia maun diʼak liu fali haʼu. Maski sei susar mai haʼu atu fiar an, maibé haʼu hakaʼas an hodi la husik sentimentu neʼe domina haʼu. Haʼu halo orasaun beibeik ba Maromak Jeová, no nia ajuda haʼu atu kontrola sentimentu neʼe. Hodi hatene katak Maromak hadomi tebes haʼu no hanoin haʼu, ida-neʼe halo haʼu laran-kontente tebes!”—Roberta, feto ho tinan 45.

[Nota–rodapé]