Haʼu hakarak mate deʼit—Bíblia bele ajuda haʼu ka lae kuandu haʼu hanoin atu oho an?
Bíblia nia resposta
Sin bele duni! Bíblia mai husi “Maromak neʼebé fó kmaan ba ema laran-triste”. (2 Korinto 7:6) Maski Bíblia laʼós livru kona-ba saúde mentál, maibé Bíblia ajuda ona ema barak atu manán hasoru sira-nia hanoin atu oho an. Bíblia nia matadalan mós bele ajuda Ita.
Eskritura saida deʼit mak bele ajuda Ita manán hasoru hanoin atu oho an?
Oinsá se Ita-nia kolega ida dehan, “Haʼu hakarak mate deʼit”?
Bíblia fó matadalan saida atu ajuda ita?
● Fó sai ita-nia sentimentu ba ema ruma.
Bíblia hatete: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.
Signifika: Ita presiza ema seluk nia apoia bainhira ita hanoin barak no sente estrese.
Se Ita lakohi fó sai ba ema seluk saida mak Ita sente, Ita-nia sentimentu negativu bele halo Ita laran-todan no neʼe susar atu tahan. Maibé se Ita fó sai saida mak Ita sente, karik Ita bele sente kmaan no iha hanoin pozitivu kona-ba Ita-nia situasaun.
Koko toʼok: Fó sai Ita-nia sentimentu ba ema ida ohin, karik fó sai ba ema ida husi Ita-nia família ka belun diʼak ida neʼebé Ita tau fiar.a Karik Ita mós bele fó sai Ita-nia sentimentu liuhusi hakerek ida-neʼe iha kadernu.
● Buka ajuda médiku.
Bíblia hatete: “Ema neʼebé isin-diʼak la presiza doutór, maibé ema moras presiza.”—Mateus 9:12.
Signifika: Ita presiza buka ajuda iha dalan médiku bainhira ita moras.
Se ema ida iha hanoin atu oho an, karik ida-neʼe hatudu katak ema neʼe iha moras mentál ruma. Hanesan moras sira seluk, Ita la presiza sente moe ho situasaun neʼe. Ita bele halo tratamentu ba moras mentál.
Koko toʼok: Keta demora atu buka ajuda husi doutór neʼebé hatene halo tratamentu ba moras mentál.
● Hanoin-hetan katak Maromak hanoin ita.
Bíblia hatete: “Manu-liin lima ho osan-besi rua neʼebé folin kiʼik, loos ka lae? Maibé, Maromak la haluha sira ida. . . . Keta taʼuk, imi folin-boot liu fali manu-liin barak.”—Lucas 12:6, 7.
Signifika: Ita mak folin-boot ba Maromak.
Karik Ita sente mesamesak, maibé Maromak haree buat neʼebé Ita hasoru daudaun. Nia hanoin Ita, maski karik Ita sente katak Ita lakohi tan atu moris. Salmo 51:17 hatete: “Oh Maromak, Ita sei la hakribi ema neʼebé laran-triste no neon-susar.” Maromak hakarak Ita atu moris tanba nia hadomi Ita.
Koko toʼok: Buka evidénsia husi Bíblia katak Maromak hadomi Ita. Porezemplu, haree kapítulu 24 husi livru Mendekatlah kepada Yehuwa.
● Halo orasaun ba Maromak.
Bíblia hatete: “Entrega imi-nia laran-susar hotu ba [Maromak], tanba nia hanoin imi.”—1 Pedro 5:7.
Signifika: Maromak konvida Ita atu koʼalia nakloke ba nia kona-ba Ita-nia sentimentu no laran-taridu.
Maromak bele fó Ita dame no forsa atu tahan situasaun susar. (Filipe 4:6, 7, 13) Liuhusi dalan ida-neʼe, nia apoia ema neʼebé halo orasaun ba nia atu husu ajuda.—Salmo 55:22.
Koko toʼok: Halo orasaun ba Maromak ohin. Temi ninia naran Jeová no fakar sai Ita-nia sentimentu ba nia. (Salmo 83:18) Husu nia atu ajuda Ita nafatin tahan.
● Hanoin kleʼan esperansa husi Bíblia kona-ba futuru.
Bíblia hatete: “Ita iha esperansa neʼe hanesan ankor neʼebé loos no metin ba ita-nia moris.”—Ebreu 6:19.
Signifika: Ita-nia emosaun bele tun-saʼe hanesan ró iha tasi ho laloran boot, maibé esperansa husi Bíblia bele hametin Ita.
Esperansa neʼe laʼós mehi deʼit maibé ida-neʼe bazeia ba Maromak nia promesa atu halakon buat neʼebé hamosu ita-nia susar hotu.—Apokalipse 21:4.
Koko toʼok: Aprende liután kona-ba esperansa husi Bíblia hodi lee informasaun ho títulu “Esperansa kapás iha futuru”.
● Halo atividade ruma neʼebé Ita gosta.
Bíblia hatete: “Laran neʼebé kontente mak ai-moruk neʼebé diʼak.”—Provérbios 17:22.
Signifika: Kuandu ita halo buat ruma neʼebé halo ita sente kontente, karik ita-nia saúde mentál no emosaun sai diʼak liu.
Koko toʼok: Halo atividade ruma neʼebé baibain Ita gosta halo. Porezemplu, rona múzika neʼebé kontente, lee buat ruma neʼebé halo Ita sai laran-manas, ka halo atividade ruma neʼebé Ita gosta tebetebes. Ita mós bele sai kontente liután se Ita ajuda ema seluk, maski neʼe mak buat kiʼik deʼit.—Apóstolu 20:35.
● Tau matan ba Ita-nia saúde fíziku.
Bíblia hatete: “Treinu ita-nia isin lori buat diʼak.”—1 Timóteo 4:8.
Signifika: Ita hetan benefísiu bainhira halo ezersísiu, toba tuir tempu, no han ai-han neʼebé diʼak ba saúde.
Koko toʼok: Halo ezersísiu hodi laʼo, maski ba minutu 15 deʼit.
● Hanoin-hetan katak sentimentu no buat oioin iha ita-nia moris bele troka.
Bíblia hatete: “Imi la hatene imi-nia moris sei sai oinsá loos iha loron aban.”—Tiago 4:14.
Signifika: Dala ruma, problema ida neʼebé Ita sente susar atu tahan mak temporáriu deʼit.
Maski situasaun neʼebé Ita hasoru daudaun mak susar tebes, hanoin-hetan katak iha loron aban ida-neʼe bele troka. Tan neʼe, buka dalan oioin atu tahan. (2 Korinto 4:8) Karik ikusmai Ita-nia situasaun susar bele troka, maibé se Ita oho an, Ita labele troka ida-neʼe.
Koko toʼok: Lee Bíblia nia istória kona-ba ema sira neʼebé sente laran-kraik toʼo hakarak atu mate deʼit, no haree oinsá ikusmai sira-nia moris troka sai diʼak liu. Dala ruma sira-nia moris troka iha dalan neʼebé sira nunka bele imajina. Haree toʼok ezemplu tuirmai.
Bíblia temi kona-ba ema neʼebé hakarak atu mate ka lae?
Sin. Bíblia konta kona-ba ema balu neʼebé hatete, “Haʼu hakarak mate”. Maromak la hirus sira, maibé nia ajuda sira. Nia mós bele halo nuneʼe ba Ita.
Elias
● Sé mak Elias? Elias mak profeta ida neʼebé aten-brani. Maibé dala ruma, nia mós sente laran-kraik. Tiago 5:17 hatete: “Elias mak ema ida neʼebé iha sentimentu hanesan ita.”
● Tanbasá nia hakarak mate? Loron ida, Elias sente mesamesak, taʼuk no sente la iha folin. Tan neʼe nia husu: “Oh Jeová, . . . agora hasai deʼit haʼu-nia moris.”—1 Reis 19:4.
● Saida mak ajuda nia? Elias fakar sai ninia sentimentu hotu ba Maromak. Oinsá Maromak fó laran-manas ba nia? Maromak hatudu katak nia hanoin Elias no hatudu sai Ninia forsa boot ba Elias. Maromak mós hatete ba Elias katak nia hafolin tebes Elias no mós ajuda ba Elias hodi fó ba nia ajudante neʼebé matenek.
▸ Lee kona-ba Elias: 1 Reis 19:2-18.
Job
● Sé mak Job? Job mak mane riku ida neʼebé adora Maromak neʼebé loos hamutuk ho ninia feen no oan sira.
● Tanbasá nia hakarak mate? Derrepente deʼit, buat aat oioin akontese iha ninia moris. Nia lakon ninia rikusoin. Ninia oan sira mate hotu tanba dezastre. Nia kona moras aat ida. No tuirmai, ema duun katak nia hetan problema tanba nia halo sala boot. Job hatete: “Haʼu odi haʼu-nia moris, haʼu lakohi moris tan.”—Job 7:16.
● Saida mak ajuda nia? Job halo orasaun ba Maromak no fó sai ninia sentimentu ba ema seluk. (Job 10:1-3) Nia hetan laran-manas husi belun laran-diʼak ida naran Eliú neʼebé ajuda nia atu iha hanoin neʼebé loos kona-ba ninia situasaun. Job mós ho kontente simu konsellu no ajuda husi Maromak.
▸ Lee kona-ba Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moisés
● Nia mak sé? Moisés mak ulun-naʼin iha Izraél antigu no profeta laran-metin ida.
● Tanbasá nia hakarak mate? Moisés iha responsabilidade barak, ema kritika nia beibeik, no sente kole tebetebes. Tan neʼe, nia harohan ba Maromak: “Favór ida, oho kedas haʼu.”—Números 11:11, 15.
● Saida mak ajuda nia? Moisés fó sai ba Maromak kona-ba saida mak nia sente. Maromak ajuda Moisés hodi hamenus ninia serbisu atu nia bele sente kmaan.
▸ Lee kona-ba Moisés: Números 11:4-6, 10-17.
a Se Ita-nia hakarak atu oho an sai makaʼas tebes no la iha família ka belun atu ajuda, telefone númeru emerjénsia.