AJUDA BA FAMÍLIA | HABOOT OAN
Kuandu Ita-nia oan iha hanoin atu oho an
Durante tinan hirak-neʼe nia laran, joven neʼebé oho an aumenta liután iha rai balu. Tanbasá ida-neʼe akontese? Ita-nia oan mós bele iha hanoin atu oho an ka lae?
Iha informasaun neʼe
Tanbasá inan-aman presiza hanoin kona-ba neʼe?
Husi tinan 2009 toʼo 2019, estudante husi eskola sekundária iha Estadus Unidus neʼebé iha sintoma depresaun mak aumenta porsentu 40. Durante tempu neʼe, ema neʼebé oho an mós aumenta liután.a
“Joven sira ohin loron hasoru problema barak neʼebé úniku . . . Problema sira-neʼe estraga makaʼas sira-nia saúde mentál.”—Vivek H. Murthy, U.S. Surgeon General.
Bíblia nia prinsípiu: “Laran-triste halakon ema nia forsa.”—Provérbios 17:22.
Oinsá mak Ita hatene se Ita-nia oan iha hanoin atu oho an?
Hanoin toʼok pontu balu tuirmai.
Akontesimentu. Ita-nia oan hasoru daudaun trajédia ruma ka lae, porezemplu ema la simu nia, doben fó para, buat neʼebé nia halo la susesu ka ema neʼebé nia hadomi mate? Se nuneʼe, neʼe afeta makaʼas nia liu fali buat neʼebé Ita imajina ka lae?
Hahalok. Ita-nia oan para atu ransu ho ninia kolega sira no lakon interese atu halo atividade neʼebé uluk nia gosta ka lae? Nia fó ba ema seluk sasán sira neʼebé nia hafolin tebes ka lae?
Liafuan. Ita-nia oan koʼalia kona-ba mate ka hatete liafuan ruma hanesan, “Karik diʼak liu se haʼu mate deʼit.” Nia koʼalia kona-ba lakohi sai nuʼudar naha todan ba Ita ka lae?
Klaru katak dala ruma Ita-nia oan bele koʼalia “liafuan arbiru deʼit”. (Job 6:3) Maibé, karik nia koʼalia hanesan neʼe tanba loloos nia hakarak husu ajuda. Tan neʼe keta husik liu buat naran deʼit neʼebé nia hatete kona-ba hakarak atu mate.
Se Ita-nia oan hatete katak nia iha hanoin atu oho an, karik Ita bele husu, “Ó hanoin kona-ba bainhira no oinsá atu oho an ka lae?” Ninia resposta sei hatudu sai situasaun neʼe urjente toʼo oinsá.
“Nuʼudar inan-aman, karik ita lakohi husu pergunta ba ita-nia oan sira tanba ita taʼuk atu rona ba sira-nia resposta. Maibé se buat neʼebé sira fó sai mak buat neʼebé sira sente daudaun, entaun diʼak ba ita atu hatene ida-neʼe.”—Sandra.
Bíblia nia prinsípiu: “Ema nia hanoin iha ninia laran mak hanesan bee-posu neʼebé kleʼan, Maibé ema neʼebé matenek mak bele kuru sai ida-neʼe.”—Provérbios 20:5.
Saida mak Ita bele halo se Ita-nia oan iha hanoin atu oho an?
Ho pasiénsia, buka-hatene saida mak Ita-nia oan hanoin no sente. Primeiru, gaba nia tanba fó sai ninia hanoin no sentimentu. Tuirmai Ita bele dehan: “Haʼu hakarak hatene buat neʼebé akontese daudaun iha ó-nia moris. Saida mak ó hasoru agora daudaun?” ka “Esplika toʼok mai haʼu saida mak ó sente agora daudaun?”
Ho pasiénsia rona ba Ita-nia oan nia resposta. Kuidadu atu la hatete katak buat neʼebé nia sente laʼós buat boot ka fó solusaun kedas ba ninia problema.
Bíblia nia prinsípiu: “Ema hotu tenke lalais atu rona, la ansi atu koʼalia, no neineik atu hirus.”—Tiago 1:19.
Halo planu kona-ba oinsá atu proteje Ita-nia oan. Ajuda Ita-nia oan buka-hatene buat sira tuirmai neʼe no halo lista kona-ba neʼe:
Sinál sira. Iha ka lae buat ruma neʼebé nia halo ka hanoin neʼebé baibain hamosu hakarak atu oho an?
Atividade neʼebé ajuda. Atividade saida deʼit mak bele ajuda duni nia hamenus ninia estrese no para atu hanoin kona-ba oho an?
Ema neʼebé bele fó ajuda. Iha ka lae ema balu neʼebé Ita-nia oan bele hakbesik kuandu presiza ajuda? Karik neʼe inklui Ita, ema boot seluk neʼebé nia bele tau fiar, doutór saúde mentál nian ka organizasaun ida neʼebé hetan treinu atu ajuda ema neʼebé iha hanoin atu oho an.
Halo planu kona-ba oinsá atu proteje Ita-nia oan
Bíblia nia prinsípiu: “Ema badinas nia planu sei hetan duni susesu.”—Provérbios 21:5.
Tau atensaun. Maski Ita-nia oan haree hanesan diʼak ona, maibé nafatin cek ninia situasaun.
“Bainhira haʼu-nia oan dehan katak nia la iha tan hanoin atu oho an, haʼu hanoin katak problema neʼe hotu ona. Maibé haʼu-nia hanoin sala duni. Tanba derrepente deʼit ema ida bele hasoru problema seluk no hanoin atu oho an bele mosu fali.”—Daniel.
Ajuda Ita-nia oan komprende lia-loos importante ida kona-ba ema nia sentimentu, katak sentimentu mak temporáriu deʼit. Livru ida (The Whole-Brain Child) hatete: “Ita-nia sentimentu mak hanesan klima neʼebé sempre troka. Ita la matenek se ita hamriik iha udan laran no nega katak la udan. Maibé ita mós la matenek se ita hanoin katak loro-matan sei nunka mosu fali.”
Fó kmaan: Fó-hatene ba Ita-nia oan katak Ita hadomi nia no Ita sempre prontu atu apoia nia. Ita mós bele dehan, “Haʼu sei halo buat hotu neʼebé haʼu bele atu ajuda ó hasoru ida-neʼe.”
Bíblia nia prinsípiu: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.
a Ema barak neʼebé iha depresaun la oho an. Maibé realidade mak ema barak neʼebé oho an mak sira neʼebé iha depresaun.